1 Badikani, igogu lukwalo gwebubili gwandamukwalila, mububili gwadzo ndagwisa mukumbudza kuyetila kuti mube nemikumbulo mibuyanana, 2 kudze mukumbule matama akalebgwa ntolo nebalebesambeli bakayengemala nenlayo waHe neNtjidzi wamakalayiwa ngebapositoli benyu. 3 Tjekutanga makafanila kuwhisisa ikoku, kuti mumahhuba ebupelo kowhoba nebanhu banoba belawugwa nenjemulo dzabo banowhomuseka 4 beti, "Wakatigadzabgwe kuti unohha ngono uponi? Kubvisila lubaka gwakatjinyika bobatategulu bedu, zwinhu zose zoyendilambeli sezwakazwiyendila mbeli kubvisila pakabumbiwa hango." 5 Banokukangan'wa kamwaza ikoku, kuti ngedama leNdzimu kudzimu kwakabeyapo ntolo, nekuti hango yakabumbiwa kubva muvula ibumbiwa nevula, 6 nekuti hango yayigogo lubaka yakakubiwa ikapaladziwa nevula. 7 Koga ngedama ilo zwalo kudzimu nehango kuyapo ngwenu kwakatjengetegwa moto, kutjengetegwa kuti kudze kunoswika hhuba letongewa nepaladziwa kwebanhu basingahle Ndzimu.

8 Koga musikangan'we tjinhu tjin'ompela, badikani, kunaHe hhuba lin'ompela lofanana nemakole alitjiwulu, nemakole alitjiwulu anofanana nehhuba lin'ompela. 9 He aatononoka thama tjaakagadzabgwe sebamwe bekutola sekuti unononoka, koga una moyonlefu kumuli, esingayemule kuti kube newunopaladziwa, koga kuti wose nhu ahanduke mumatjinyo.

10 Koga hhuba laHe lowhohha sembava, nekudzimu kowhopinda ngehhoba whulu, nembumbiko yose inowhonyawuka nentha yemoto, nehango nemihingo yose yakayetiwa muyili kowhoba makungutshwa. 11 Sayikoku zwinhu zose izwezwi zowhopaladziwa, ngono imwi makafanila ba banhu bakatini? Makafanila tjila nezila yakayengemala muhla Ndzimu, 12 se makamilila hha kwehhuba leNdzimu mugwisa nemasimba ose kuti lilibilidze. Ngobe muna ilelo hhuba kudzimu kowhotshwa kukapalala, mbumbiko inowhonyawuka nentha yemoto! 13 Koga seleba kwetjigadzabgwe tjitje tolinda kudzimu kutshwa nehango ndzwa kunandulamo ko.

14 Ndizo ke, badikani, sayikoku makalindila zwinhu izwezwi, gwisani nemasimba ose kuti muwanike makatjena musina nlandu kakale muli mukunyalala naye. 15 Muzibe kuti ba nemoyonlefu kwaHe izila yetjidziwa. Ndizo bo naPhawuli gamu ledu linodikala wakamukwalila ehingisa butjenjebvu gwaakapiwa neNdzimu, 16 eleba ngekwa ikoku sekwaakakwala muwhalo dzidze dzose. Kuna zwimwe zwinhu mudzili zwinolema whisisika, kunoyeta kuti basina luzibo nebasakadzikama mukugalamoyo bazwileyanye, sekwabanothama mudzimwe whalo, bezwikokela paladziwa.

17 Ndizo ke imwi, badikani, saku mokuziba kale ikoku, mutjenjele musitungamiligwe ntome nematjinyo ebanhu basina nlayo mukobva mulahikigwa nedzikama kwenyu. 18 Koga kulani mungoni nemuziba He Ntjidzi wedu Yesu Khirisitu. Ngaakudziwe ngwenu kudza kunoti nekusingapele! Akujalo.