1 Kubva kunaPhawuli, mpositoli waKhirisitu Yesu ngentha yekuda kweNdzimu, nange kuyendidzana netjigadzabgwe tjebutjilo gumuna Khirisitu Yesu.

2 Kuna Thimothi nkololo wangu wandinoda kwazo.

Ngoni, nemawhilangoni, nekunyalala kunobva kuNdzimu ibo Tate naKhirisitu Yesu He wedu ngakube kukuli.

3 Ndoboka Ndzimu wandinohingila nehana mbuyanana, sekwakakuthama bobatategulu bangu, ndikukumbula lubaka gose mumitembezelo yangu. 4 Hapa ndikumbula mihodzi iyo, ndoyemula siku nesikati kuti kadzene ndandakubona, kuyetila kuti ndihhale kuhanha. 5 Ndokumbula bugalimoyo gugo gwemalebeswa, bugalimoyo gwakatanga ba munakuku babo Loyisi nameyabo Yunisi koga kwangwenu ndinamalebeswa kuti gwatjibabo mukuli. 6 Nentha yayikoku ndokukumbudza kuti umusidzile tjipo tjeNdzimu tjimukuli tjakahha ngekukubiga maboko angu, 7 ngobe Ndzimu azotipa meya yehla, koga wakatipa meya yemasimba, neludo, nezwidziba.

8 Usibe nehoni nepa busupi nekwaHe wedu, kene nekwangu imi nsungwa uwe, koga bhatana nami mukudziyilila ndebo mbuya ngemasimba eNdzimu, 9 iye wakatitjidza kakale akatidana nedana kwakayengemala, kusi ngentha yemihingo yedu, koga kuli ngentha yetjinangwa tjitje nange ngoni dzaakatipa munaKhirisitu Yesu ntolo ntolo, 10 kwatjizumbunugwa ngwenuwali ngentha yebonekwa kweNtjidzi wedu Khirisitu Yesu, iye wakadusa lufu akahhisa bupenyu nesafa kutjedza ngendebo mbuya.

11 Kungentha yendebo mbuya iyeyi ndakagadziwa kuti ndibe nsumikili nempositoli nendhiyi, 12 ndizo ndidziyila nayeyi zila, koga andinahoni, ngobe ndoziba wandakagalamoyo muwunli, kakale ndinalebeswa kuti unotubula londolodza tjandakapiwa kudzina kunoswika ilelo Hhuba. 13 Bhatilila mumatama akwako awakawha kubva kundili, anakugalamoyo neludo muna Khirisitu Yesu, 14 londolodza lebeswa lawakapiwa neMeya Yakayengemala inogala mutili.

15 Nokuziba kuti bose bamuAsiya kose naPhegelasi naHemogenesi bakandifupatila. 16 Kadzene He bangaba nemawhilangoni kun'ha waOnesiforasi, ngobe wakandisimisa kanjinji, azotongoba nehoni nekweketane dzangu, 17 wakati aswika muRoma akandihaka nemoyo uwe wose akadzina akandiwana, 18 kadzene He bangakuthama kuti awamutjile mawhilangoni anobva kuna He muHhuba ilelo! Iwe noziba kuti wakandibhata zwakanaka kungapani kuEfesu.