1 Ndokulaya mbeli kweNdzimu nambeli kwaKhirisitu Yesu iye unowhotonga bapenyu nebafi, neboneka kukwe nangebumambo gugwe, 2 ululamile sumikila dama, mulubaka gwakafanila nemulubaka gusakafanila, utambunudze, utjemele, ukuludzile, udiye nemoyo nlefu. 3 Ngobe lubaka gowhohha banhu pabasingowhoda zwidiyo zwemalebeswa, koga nentha yekuti banoba benazebe dzinoda wha banowhozwikubunganyila badiyi banodiya kwabanohaka wha. 4 Banowhothewuka besiya whilila malebeswa bedzibayila bengina mungano dzisina malebeswa. 5 Koga iwe iba nenkumbulo wakabulungika lubaka gose, usimidzile mudziyila, uthame n'hingo wemvangeli, uhhadzise dan'wa kuko.

6 Ngobe imi bupenyu gwangu gwedululigwa sempilo unon'wiwa; lubaka gwangu gwekuti nditjibva muhango gobva gusedzela. 7 Ndagwa gwa kwakanaka, ndapedza ndima yangu, ndakatjengeta bugalimoyo. 8 Ngwenuwali ndatjitjengetegwa tjiyala tjekululama, tjandinowhopiwa naHe iye ntongi wakalulama muHhuba ilelo, kusi imi ndoga koga nabo bose bakalindila neludo bonekwa kukwe.

9 Gwisa kwazo kuti uhhe kundili nekulibilidza. 10 Ngobe Demasi ngentha yeda hango ino wakanditihha akayenda kuThesalonika. Khiresenzi wakayenda kuGalathiya, Thayithasi wakayenda kuDalamatiya. 11 Luka yega ndiye ugele nemi. Utole Mako ubuye naye, ngobe unondibhatsha kwazo mun'hingo. 12 Thikhikhasi ndakawuntuma kuEfesu. 13 Hapa wohha undibhatile tjiyambalo tjandakasiya kunaKhaphasi kuThirowasi, uhhe kose newhalo bukulu idzedziya dzakakwagwa mumakukuta.

14 Elekizanda mpfuli wedzitshipi wakandikubadza kwazo, He banowhowunthama sekwaakandithama. 15 Uwutjenjelele ngobe waka enyanyayidza kwazo zwidiyo zwedu.

16 Pandakandizwimila kwekutanga akuna wakama nemi, banhu bose, bakandifupatila. Kadzene bangasabonw'a nlandu. 17 Koga He bakama nemi bakandipa masimba ekuti ndisumikile ndebo nekuhhele, kuyetila kuti bataya bose bawhe. Nekwakajalo ke ndakabvubugwa kubva munlomo wehumba. 18 Ndowhowanguligwa naHe kubva muzwinhu zose zwakayipa bekanditjengeta beyetila bumambo gwabo gwekudzimu. Ngakudziwe He nekusingapele. Akujalo.

19 Ubuyise Phurisila naAkhwila, nebenzi waOnesiforasi. 20 Erasitasi wakasala kuKhorinte, Thirofimasi ndakawunsiya kuMilethasi ngobe waka egwala. 21 Uyedze nemasimba awo wose kuti uhhe kusanhu kukaba lubaka gwembaba.

Yubhulusi naPhudenesi, naLinasi, naKilawudiyasi nehama dzose banokulezwa.

22 He babe nemeya iyo.

Ngoni ngadzibe namwi.