1 Imwi wakamuthama bapenyu, pamakamakafa nentha yezwibi nematjinyo 2 kwamakatongoba mutjila mukuli, mutebela zila dzehango ino, mutebela ntungamili wesimba lemhepo, iyo meya inohinga ngwenu mubanhu basingatobele nlayo. 3 Toseni takatongotjila munjemulo dzenyama yedu, titebela njemulo dzembili nenkumbulo, ndizo ngembumbiko takabe takafanila delukigwa nebuhongola, senhu wose.

4 Koga Ndzimu, uhhele mawhilangoni, neludo gukulu gwaakatida ndigo, 5 nekene takabe takafa nentha yematjinyo edu, wakathama kuti titjile toseni naKhirisitu (nengoni makatjidziwa), 6 wakatimusa kubafi naye, akatigadza naye mubugalo gwekudzimu muna Khirisitu Yesu, 7 kuti mulubaka gunohha angalakidza bunji gwengoni dzidze gusina tjilizanyo mukutiwhilangoni kukwe muna Khirisitu Yesu. 8 ✝Nentha yengoni makatjidziwa nekugalamoyo; koga ikoku akuta nentha yethama kwenyu, itjipo tjeNdzimu- 9 kusi nentha yemihingo, kuyetila kuti kusitongobe nenhu unozwikudza. 10 Nentha yekuti takabumbiwa na iye, takabumbiwa muna Khirisitu Yesu tibumbigwa mihingo mibuya, Ndzimu yabakabaakanya kale, kuti titjile muyili.

11 Ndizo kumbulani kuti kuna lubaka pamakatongobe Bataya ngezwagwa, ibabo banozwiti "bakathumbigwa" bemudana "basakathumbigwa," kunothamiwa mumbili ngemaboko- 12 ✝ kumbulani kuti mulubaka igogo makabe makathubukanyiwa naKhirisitu, musibetjaba tjaIsirayeli, kakale muli basingazibgwe muzwibvumilano zwetjigadzabgwe, musina kugalabgwe kakale musina Ndzimu muhango. 13 Koga ngwenu, muna Khirisitu Yesu, imwi makatongobe muli kulekule, matjisedzedzewa pedlo ngelopa laKhirisitu. 14 Ngobe iye ndiye kunyalala kwedu, iye wakatithama bubili gwedu tikaba banhu ban'ompela, kakale nembili uwe wakakolomola lukuta gwelubengo gunotipalalanya, 15 ngekolomola nlayo wemilayo pafa kukwe, kuyetila kuti muwunli angabumba nhu ntshwa un'ompela mubugalo gwebabili, kuti kube nekunyalala, 16 kakale angatibgwilulanye bubili gwedu kuNdzimu, mumbili un'ompela ngetjileyanyo, kuyetila pedza lubengo. 17 ✝Kakale wakahha akasumikila ndebo mbuya yekunyalala kuna imwi makabe muli kule, kakale akasumikila ndebo mbuya yekunyalala nekuna ibabo bakabe balipedlo. 18 Ngobe nentha iye tose bubili gwedu totubula hha kuna Tate ngeMeya in'ompela.

19 Ndizo ke, amutjibataya kene bahhi, koga matjiba bazwagwa behango in'ompela nebayengemali neben'ha weNdzimu, 20 makabakigwa pehhugwi kwembviwa yebapositoli nebalebesambeli, Khirisitu Yesu tjekukwe ali bgwe lendzibo linotambunudza mbako; 21 muwunli, mbako wose wakabhatana, unokula ukabe thempeli lakayengemala muna He; 22 muwunli, namwi bo makabumbiwa kuti mube bugalo Ndzimu gwaanogala muguli ngeMeya.