1 Nentha yayikoku, imi, Phawuli, nsungwa nentha yesumikila nekwaKhirisitu Yesu ndiyetila imwi Bataya 2 ✝ ndokutola kuti makatjiwha nekwen'hingo wengoni dzeNdzimu wakapiwa imi kuyetigwa imwi, 3 ndibva kuti, tjakasumbikala ndakatjizibisiwa ngezumbunulo, sekwandakwala ngebufupi. 4 Hapa mubala ipapa mungawhisisa luzibo gwangu gwetjakasumbikika nekwaKhirisitu, 5 tjisakatongozibgwa nezwimwe zwizekugwana zwakapinda sekwatjazumbunugwa ngwenu kubapositoli babe bakayengemala nebalebesambeli ngeMeya, 6 ✝ ndizo, Bataya batjibe bagali nhaka kan'ompela nabo, nhango dzembili un'ompela, kakale banagobe mutjigadzabgwe muna Khirisitu Yesu ngendebo mbuya.

7 Nentha yendebo mbuya iyeyi ndakayetiwa nlanda ngetjipo tjengoni dzeNdzimu tjandakapiwa ngehinga kwemasimba awe. 8 Kundili, kene ndili ntukunu pakati kwebatukunu bose bebayengemali, ngoni idzedzi ndakadzipiwa, kuti ndisumikile kuBataya ndebo mbuya yefumwa isingapele yaKhirisitu, 9 ✝nethama kuti banhu bose babone nlondesedzo yemasazibgwa yakasumbikala kubvila ntolo muNdzimu iye wakabumba zwinhu zose; 10 kuyetila kuti ngegubungano lebagalimoyo butjenjebvu gunjinji gwakasiyana siyana gweNdzimu, ngwenuwali, guzibisiwe batongi nebutungamili mubugalo gwekudzimu. 11 Ikoku kwaka kuyendidzana netjinangwa tjisingapele tjaakapeleledza muna Khirisitu Yesu He wedu, 12 muwunli nange kugalamoyo muwunli tohha kuNdzimu tizwiloba fuba kakale tizwigalabgwe. 13 Ndizo ndomukumbila kuti musinyale moyo nentha yayikoku dziyila kwangu ndidziyilila imwi, kuligudzo lenyu.

14 Nentha yayikoku ndopfigama mbeli kwaTate, 15 ibo kunobva kubali zina lewumwe newumwe n'ha ukudzimu newumwe newumwe n'ha umuhango, 16 kuti kuyendidzana nebunji gwegudzo labo bangamusimisa mukati kwenyu nemasimba ngeMeya yabo, 17 nekuti Khirisitu agale mumimoyo yenyu ngekugalamoyo; kuti imwi, saku makadzikigwa mukatshitshinhigwa muludo, 18 kudze imwi kan'ompela nebayengemali bose, mube nemasimba ewhisisa bupabi nebulefu nebukulu nedzika kweludo gwaKhirisitu, 19 neziba ludo gwaKhirisitu igo gunopinda luzibo, kudze muhhadziwe nebuhhalo gose gweNdzimu.

20 Iye unotubula thama kunjisa kunopinda kose kwatinokumbila kene kwatinokumbula ngemasimba awe anohinga mutili, 21 ngaakudziwe nezwizekugwana zose lini nalini, mugubungano nemuna Khirisitu Yesu, nekusingapele kose! Akujalo.