1 Dɔdɔrim aru naa pɔ̃sinɛ gbete ɔ shanɛ u pɔ̃si shɔ Ɗa gɨnnɛ gbete i a Galantiya yɛ, ɔ̃raɔtɛ kaka jazɨng a kɔrɔ ɔ pɛli vigbete n geli shɔ Ɗa gɨnnɛyi a Galantiya i pɛliyɛ. 2 Ko-pi leegbete piya a shɔ gɨnnɛ i toli nya yɛ, ɔ̃riutɛ kaka jazɨng akɔrɔ a ɓuzɨn vigbete kpaa yɛ ni, u pɔ̃ viwɔɔtɔ, ɓa nɛ setɛ ɗau atɛ nɗa ɔ toli saa kɛkn ɓa. 3 Aɗagbete naa atɛ, nɗa n sho shɔgbete ɔ lɔyi nɛi pɛ shɔ tɔ̃vɨn awɔ atette a sẽkoni, nɗai n ti ɔ vinaa pɔ̃sinɛuni yɛnɛ Urushalima. 4 Kɛ kɔrinɛtɔ n yɛ ayini, i yɛ zɛnɔɔ i gɨnrɛ u yɛrɛ.

5 N yɛ awɔ ɗɔbiitɔ akɨnti gbete naa yisi rakinɛtɛ a tipi Makidoniyani piti kpai, aru n yɛ za jo tipi Makidoniyakɔ. 6 Wɔɓa n yɛ ɔ̃tɔ a ɔkɔni lee ziti, ko n yɛ shaa goosi jo a ɔkɔni nɗa ɔ dɔ̃n dɔɔ a ɗɔgbete n yɛn yɛ, yɛ ni piti kpai. 7 N ji kasi ɓa n zɛɔrɛ n tɛrɛ weze ɓa, ama n pɔ̃ sisɨn ntɔ n kasirɛ n ɔ̃ a ɔkɔni lee ziti naa Uɓeyelapa kɛ kasinɛ yɛ.

8 Ama n yɛ ɔ̃jo tipi Afisa mkɔ yɛnɛ lee yumusinɛ pasika. 9 Aru shɔ ɓelin nyaba vishonɛ tɔ̃vɨn pɛlinɛtɛ pɛ̃niɓa a ɗɔmni, ama shɔnɔpɔ̃yi i sɔ̃njo ɗɔuni waanɛ gbete i kasin vishonɛ pɛlinɛ zãrinɛyɛ.

10 Naa Timoti kɛ awɔ ɗɔbiinɛ ɔ tɛu nakaziti awɔ tetteni, aru ukɔma pɛlijo Uɓeyelapakɔ vishɔnɛ naa gbete n pɛlimyɛ. 11 Shɔwɔkɔ pɛliu vikɔ̃linɛ nɛ, ama ɔ̃rɔɔtɛ kaka jazɨng a kɔrɔ ɔ dɔ̃u dɔɔtɔ a binyatɔ̃nɛ, u sɔn ɗɔbiirɛ, n a ɗɔgbete n pɔ̃nɔɔ a nyaba aru u ɗɔɔ anɛ a shɔ sisɨn ãnɛ wɔɔyini.

12 Aru u ɓezɔ̃ Apolosi, n gakiutɛtɔ waanɛ u awɔ ɗɔbiitɔ a shɔ gãsi shɔ sisɨn ãnɛyini, ama anɛ dɔdɔrim u sisɨn ji tɛ tɔ̃ɓa, yɛ atɔ aɗagbete zɛrɛ kɔritɔ u a yɛ ni.

13 Ɔ nɔkãkãri, ɔ shi dɔkaziti awɔ nyaba sisɨn ãnɛni, ɔ mabiitɔ a abi lakinɛni ɔkɔ nta setinɛ. 14 Vigbete ɔ kɛ pɛlinɛ yɛ ɔ pɛli a ɓuzɨn zɔ̃ ɔrinɛ.

15 Mazɔ̃yi ɔ zɛtɛttɔ Istifanu au shɔ wɛrɛyini kpai ikɔyi gaa Kirisita rinɛrɛ a tipi Akaya, i ãi yuu tɛttɔ aɗɔ shɔ Ɗa gɨnnɛyi vishonɛ pɛlinɛ. N gaki ɔtɔ masayi, 16 ɔ gɨn iri shɔmiyi nyatɔ naa shɔm, a shɔgbete u pɛli vishonɛ ɗɔgbete ayini piti kpai wɔsɔ̃n a shɔgbete i ɓoo raan ayini nyazɔ̃ yini yɛ ni.

17 N nta yɛti purutɔ a Istifanu, Fɔtunatu a Akaiku a nɛni, aru i n-tiɔ vigbete au si ɓa awuni ɓa yɛtɛ 18 I sintɛ n nta tɔ̃vɨntɛ a ɔkɔni, jo naa i sɨwɔ sɔ̃njo yɛ. Shɔ naa shɔmiyi ɔ weshootɔ ai a nyani.

19 Shɔ Ɗa gɨnnɛ gbeteyi a tipi Asiya i gewɔ nyatɛ kpai; Akila a Piskila a shɔ Ɗa gɨnnɛ gbete a toli nya ai wɛrɛ yɛ i gewɔ nyatɛ tɛpɛ-tɛpɛ au ruu Uɓeyelapa. 20 Shɔ sisɨn ãnɛ gbete i a ɗɔmyɛ i gee wɔ nyatɛ piti kpai.

Ɔ gee zɔ nyajo a binyatɔ̃nɛ wɔsɔ̃n a zɔ naa kɔ̃tinɛ bi nagbete Kirisita i pɛliyɛ.

21 Nkɔ Bulus ang naa n beerɔɔ nya geenɛmrɛ.

22 Shɔgbete ji ɔriu Uɓeyelapa ɓa shɔu wiriutɔǃ (Marana tha)

Uɓeyelapa anɛǃ

23 Uɓeyelapa Yesɔ shɔ vitɔ̃vɨng pɛlinɛ u ɔ̃ a ɔkɔni.

24 N gee wɔ nyatɛ, nya geenɛ zɔ ɔrinɛ piti kpai au Uɓeyelapa Yesɔ Kirisi nii.