1 Sẽkooum shɛ ang ɗɔbii Bulus, nkɔ ɔ̃rɛ Yesɔ Kirisi jashonɛ au lɔyɛ, a Ɗalapa kasinɛ, wɔsɔ̃n u ɓɛzɔ̃ Timoti gee ɔ nyatɛjo a Kɔrantini

Ɔ shɔsisɨn-ãnɛ Ɗabii, a Ɗalapa shɔbiiyi a tipi Akaya ni kpai:

2 Mɛnɛ Ɗalapa U Ɓeye a Uɓeyelapa Yesɔ kirisi u ãwɔ ɔ̃nɛ Ɗa tɔ̃vɨn pɛlinɛ a ɔ̃nɛbiinyatɔ̃nɛni.

3 U dɔ̃ri Ɗalapanɛ gbete ukɔ ɔ̃rɛ Uɓeyelapa Yesɔ Kirisi Ɓeye, u pɛ Uɓeye au ntashɔratɔyɛ, Ɗalapa gbete pɔ̃si shɔ naa a vi kpaiyɛ! 4 Yɛ pɔ̃siunaatɔ au ɓuzɨn raɓooni kpai, aru u kpaa kaka nɔgbete u yɛ pɔ̃si shɔwɔyi naa jo ai ɓuzɨn raɓoonɛ tottot, u pɛli vishonɛ jo a naapɔ̃sinɛ gbete u kpaa a Ɗalapa ɗɔbiiyɛ. 5 Ji nagbete u ɗɔ raɓoonɛ nagbete Kirisi au yuu ɓooyɛ, sɔ̃nji nanko a Kirisi kabiikɔ u kpaa Ɗalapa naapɔ̃sinɛ pẽnibarɛ. 6 Ukɛ ɓooranɛ, pɛ jo aru ɔ naapɔ̃sinɛ a naraanɛni a ruuvinikɔ; shɔkɛ pɔ̃siunaa nɛ, ɔkɔɔma ɔ kpaa naapɔ̃sinɛtɛ nɔgbete ɔ kpaa kaka ɔ masisɨn ɔ ɔ̃ a sisɨnmɛɛnɛ nagbete u masisɨn u ɓoorayɛ. 7 Ji nankɔ u sisɨn-pɔ̃nɛ awɔ bi u kaka aɗɔn fɛ̃ɛm, u zɛ tɛttɔ nɔgbete ɔ kpaa raɓoonɛ aru raa gbete u ɓooyɛ, ɔkɔɔma ɔ kpaa naapɔ̃nɛtɔ gbete u kpaayɛ.

8 N shɔbiiyi a nyaba Kirisi n kasi n kparɔɔ sisɨntɔ, aru raɓoonɛ gbete u ɓooyɛ a tipi Asiya. Raɓoonɛ gbete si au yuu tɛɛkakatɔ waanɛ, si pɛ̃niba u ji pɔ̃ sisɨn ɓa nɛu yɛ ɔ̃ a suruni ɓa. 9 U nta au bi naa shɔ yeeruutɛ nɛ shɔu nyoutɔ. Ama vim pɛlinankɔ aru nɛ ukɔ pɔ̃ sisɨn nɛ au bi, u pɔ̃ sisɨn a Ɗalapa bi, shɔu yusi shɔ gbeteyi vɔtɛttɔ lapayɛ. 10 Ɗalapa shɛshiutɛ a vɔrɔ kɔ̃linɛ pɛ̃nibam naani, rautɛ, yɛ rau sɔ̃ntɔ; u pɔ̃sisɨntɛ au biini nɛ yɛ rau sɔ̃ntɔ tɔkɨn, 11 Ɔ pɔ̃siunaatɔ a Ɗa gakinɛni, aru nankɔ shɔkɛ gaki Ɗa nɛ waanɛ au yuu Ɗalapa yɛ tɛttɔ, Ɗalapa yɛ tasiu vɔɔ susãritɔ a biini; kɛɗɔn shɔzɛ waanɛ i yɛ ɗee yeenya i dɔ̃ri Ɗalapa au yuu.

12 Vi gbete au pɔ̃rɛ u waanaa a nɔsisɨnyɛ ukɔ ɔ̃rɛ shɔm, u vigbete u lɛri a sisɨn tasitɛ nɛ u ɔ̃ ɔ̃nɛ sisɨn wɔsɔ-wɔsɔ a kotipimni, nɔgbete u ɔ̃nɛ a ɔkɔɔniyɛ, Ɗalapa pɔ̃rɛ nɛu pɛli vitɔ̃vɨng a shɔ nɔɔ a sisɨn gbete, a kaka gbete shɛ a ka Ɗalapa tɔ̃vɨn pɛlinɛ ama ɓa a shɔzɛ sẽrẽ ɓa. 13,14 U beerɔɔ pɛ vi gbete ɔ ɓaliyɛ ɔ zɛyɛkɔ sheeli, ama dɔdɔrim ɔ zɛ pɛ ɓa fɛ̃ɛ, n pɔ̃sisɨntɛ ɔ yɛ zɛ vigbete u shayɛtɔ piti kpaini, nɗa lee gbete Uɓeyelapa Yesɔ kaanɛyɛ ɔ yɛ waanɔsisɨntɔ au yuuni nagbete u waanɔsisɨn awɔ yuuyɛ.

15 N zɛ vim tɛttɔ piti kpai, n marɛ n-tɔ n gaapɛ ɔ ɗɔbii yɛnɛ, a nɔgbete ɔ kpaa Ɗa vɔɔ susãri tasinɛ ɓa ziti, 16 Aru n marɛ n-tɛ n awɔ ɗɔbii ang yaɓa yɛnɛ Makidoniya, a nɔgbete n yɛn kpaa naapɔ̃sinɛ awɔ ɗɔbii aru n yɛnɛ tipi Yahudiya. 17 A ɗɔng n mavimyɛ ɔ zɛnaa n kɔsin sisɨntɔ ya? Naa nkɛ mang vinɛ, ɔ zɛnaa n ma vi naa shɔkotipiyi ya? Aru i kasinyanɛ, nn, ama ai sisɨn ɓa ukɔ ɓa. 18 Nyamasinɛ ɓa, ji nagbete Ɗalapa sha vitɔ̃vɨng-yɛ, ruu gbete n ma awɔ yuuyɛ ɓa shɔ gbete shɔ ɓaanɛ <<Nn>> ko shɔ ɓaanɛ <<Ɓa>> ɓa. 19 Aru Ɗa jaa Yesɔ Kirisi yuu, shɔgbete Sila a Timoti ang yuu u nwari shɔ Ɗanyarubii awɔ tete, u ɓa shɔ gbete kasinya nɛ <<Nn>> a <<Ɓa>> ɓa, ama kopiɗaviya u ɓɛɛ ɓɛɛjo <<Nn>> 20 A ruukɔ ukɔ ɔ̃rɛ <<nn>> a vigbete Ɗalapa mayɛ piti kpai. Aruumkɔ a Yesɔ Kirisi kabii u <<Nankɔ>>U sha aru Ɗalapa bassinɛ. 21 Ji Ɗalapa au yuu ukɔ shɛshiurɛ a ɔkɔɔni, zɛ tɛttɔ Suru kpaanɛ aɗɔn ukɛ ɓasiyuunɛ a kirisiniyɛ; ji Ɗalapa au yuu ukɔ lɔurɛ, 22 pɔ̃ vitasinɛtɛ ayuu, shɔgbete ãu Ɗa surutɛ au sisɨn, aru u tasiu vigbete yɛ pɛliu a ɗekɨn yɛ.

23 Ɗalapa kɔ ɔ̃rɛ n shɔ shinɛkɨnti, zɛn sisɨn tɛttɔ! N ji sɔɔ tipi koranti ɓa aru gbete n yɛn pɔ̃ ɔ raɓoonɛrɛ tɔkɨn. 24 U ji tɔɓanɛ u tasɔɔ kaka nɛ ɔ̃tɛ kaka jazɨng akɔrɔ a vigbete ɔ ãsisɨn a ɗɔnniyɛ ɓa, u zɛ tɛttɔ ɔ shitɛ a dɔkaziti a sisɨn ãnɛni, ama u pɛlivishonɛ a ɔkɔɔni aru ɔ nta sisɨn puru.