1 Vim tasi naa u baasi sɔ̃nkɛ au yuu ya? u kãkɛ sẽkoo u yutasinɛ yɛnɛ ɔ ɗɔbiininya ko awɔ na ya? nagbete shɔwɔyi shayɛ ya? 2 Ɔkɔɔ ɔ̃rɛ sẽkooyi gbete u a wuniyɛ, gbete shɔ bee au sisɨn aru kopiya u zɛrɛ u ɓalitɔ. 3 Vim a ɓili weze nɛ Kirisi bee sẽkoomrɛ a shorɛ au kaabii. Shɔ bee tɛtɔ shɔ ji bee ɓa a laavi beenɛ ɓa ama a Ɗalapa Suru, shɔ ji bee ɓa a yutari ɓa ama a shɔzɛ sisɨn.

4 U sha vim aru u sisɨn ãnɛ a Ɗalapa biini a Kirisi kabii. 5 Viwɔ ɓau bini ɓa au yɛ tasi nɛ, u kaka vishonɛm pɛlinɛtɔ ɗɔnɓa. U kaka vishonɛm shɛpɛ a Ɗalapa ɗɔbii; 6 Pɛjo ukɔ pɔ̃urɛ u gɨn ruumanɛ sɔɔmrɛ, ɓa Musa nya-ãsinɛ gbete shɔ beeyɛ ɓa ama Ɗa suru. Nya-ãsinɛ gbete shɔ beeyɛ ukɔ n-tiu vɔnɛrɛ, ama Ɗa suru n-tiu Suru kpaanɛ.

7 Nya-ãsinɛ shɔ bee a tari vibeenɛ, ama Ɗalapa bassinɛ shɛtɔ a ɗagbete shɔ ãyɛni. Ko Musa nɔkɨn gbete kɔliyɛ yɛ ɗɔɔtɔ, u kolinɛu kaka siɗɔn fɛ̃ɛm nɔgbete shɔ Israilayi i yɛ kɨnnɔɔ dɔɔɓa au nɔkɨn ni ɓa. Naa nya-ãsinɛ gbete n ti vɔnɛ kaanɛ a kakani, a abassinɛni, 8 kɛɗɔn bassinɛ gbete Ɗa suru n-tiyɛ u banɛ, yɛ ɔ̃ kepikoviya? 9 Naa vishonɛ gbete n ti vɔrɔ, kpaa basinɛtɛ, kɛɗɔn vishonɛ gbeteyi n ti shɔraanɛ u banɛ yɛ ɔ̃ kɛpikoviya! 10 Nizɛ kɔ vigbete u bassi aɗɔn a kɨntiyɛ u bassinɛ dɔdɔrim ɓa. shɔ ɓasi ɓa a bassinɛ pɛ̃niba vishonɛ ruumanɛ sɔɔni ɓa. 11 Naa vi gbete yɛ sɔ̃nyatɔ u bassinɛ aɗɔn dɔdɔrim, yɛ ɔ̃ kɛpikovi a bassinɛ gbete yɛ ɔ̃ dangdang ni viya!

12 Aru gbete u sisɨn pɔ̃nɛn a ɗɔnni, u kaka bimanɛ aɗɔn fɛ̃ɛm. 13 U ɓa naa Musa ɓa, au kuki nɔkɨn a jafãrã nɛ aru Shɔ Israila i yɛ zɛ ɗɔɔnɛ bassinɛ gbete sɔ̃nyam-rɛ. 14 Ama i sisɨn lakitɛttɔ, anɛ dɔdɔrim i sisɨn kuki tɛttɔ a jãfãrãu ni naa shɔkɛ ɓali laabeenɛ ruumanɛ gbaalinɛ yɛ. Jafãrãm shɔ zɔ̃u dɔɔ ɓa seetɛ shɔ ɓasi shɔutɛ a Kirisini. 15 Anɛ nɛm shɔkɛ ɓali laabeenɛ Musanɛ jafãrãu kukiyi sisɨntɔ. 16 Ama shɔ zɛnɔɔ zɔ̃nɛtɔ, nagbete Ɗanyaruubii sha a Musa yuu nɛ: <<U jafãrãu shɔyɛ zɛnɔɔ zɔ̃nɛtɔ naa u sisɨn kɛ sɔɔnɛ a Uɓeyelapa biini.>> 17 Dɔdɔrim a ruumkɔ <<Uɓeyelapa>> ukɔ ɔ̃rɛ Ɗa suru. A ɗɔgbete Uɓeyelapa suru kɛ ɔ̃nɛ aɗɔn, ɔ̃nɛ yuu ji ɗɔwakɔ. 18 U piti kpai u pɛ shɔgbeteyi ã sisɨntɛ a Ɗabiiyɛ, u tasi pɛ Uɓeyelapa bassinɛ au nɔkɨn nyesiyini, sɔ̃nji basinɛmkɔ au shɛ a Uɓeyelapa ɗɔbii, shɔgbete ukɔ ɔ̃rɛ Ɗa suru, ukɔ kɔsiurɛ u naa Kirisi.