1 N shɔbiiyi a Kirisi u kasirɛ ɔ zɛ vigbete Ɗalapa tɔ̃vɨn pɛlinɛ pɛliyɛ atette shɔ gbeteyi ãsisɨn Ɗabii a Makidoninya. 2 I ɓooraa tɛtɔ fɛ̃ɛm a raaɓoonɛ gbete ai kpai yuu a ɓuzɨnniyɛ; ama aru gbete i sisɨn puru bang pɔ̃yirɛ i pɛli shɔ wɔyi tɔ̃vɨn fɛ̃ɛm, ko piti nɔgbete i sepɛ shɔraa kpishikni. 3 N zɛ tɛttɔ nizɛ i ãtɔ nɔgbete i vinaa sãyɛni, i ãrɛ tɛyi vinaatɔ, ɓa shɔwɔ pɔ̃yirɛ nɛi ãrɛ ɓa. 4 I gakiu rɛ nɛu pɔ̃siyinaa aru nɛyi kasirɛ i kpaiyuu jo atette shɔ gbeteyi pɔ̃si shɔ Ɗa gɨnnɛyi naa a Yuhudiyani. 5 I ãrɛ tɛɛ nɔgbete u pɔ̃ ãsisɨntɔ, i garɛ i ã yuu pɛ a Uɓeyelapa bi; kɛɗɔn a Ɗalapa naapɔ̃nɛni ai ãi yuu kɛkɨn au biini. 6 Arumkɔ u gaki Titurɛ, shɔgbete gaa vishonɛmyɛ, u yɛ ɗekɨn a vishonɛ vinaa ãnɛmni, aruviya u pɔ̃sɔɔnaa ɔ yisinya vishonɛ tɔ̃vɨntɔ. 7 Ama ji na gbete ɔ pɛlitɛ tɔ̃vɨn a vi piti kpainkɔ, ko sisɨn-anɛ, ko nyanwanɛ, a ruu zɛnɛni awɔ nyaba naapɔ̃nɛ, wɔsɔ̃n ɔrinɛ gbete ɔ tasiuyɛ. Arumkɔ u kasirɛ ɔ yɛ ɗekɨn a vishonɛ tɔ̃vɨn pɛlinɛni.

8 Vi gbete n sham n ji ãsɔɔ ɓa nyaɓa, ama n kasirɛ n tasi nɔgbete shɔwɔyi tasi bimanɛyɛ, ang kasirɛ n zɛ nɔgbete ɔ ɔrinɛ tɔ̃vɨn ɔ̃yɛ, 9 Ɔ zɛ Uɓeyelapa Yesɔ Kirisi u tɔ̃vɨn shonɛtɛ; a nɔgbete u si a vinaa ni kpai, a pɔ̃uyuurɛ u ɔ̃ shɔraa awɔ yuu, a nyaba u shɔraa ɔ̃nɛnkɔ u pɔ̃rɛ ɔ kpaa ko-iviya kpai a Ɗalapa ɗɔbii.

10 N kɔng nyashanɛ yɛm ayuu vigbete yɛ ɔrɔɔ tɔ̃vɨn dɔdɔrim ɔ yisinya vigbete ɔ gaa si saa wɔɔyɛ, ɔkɔɔ gaa rɛ, ɓa ãnɛkɔ sheeli ɓa ama ɔ sisɨn kasinɛ aru ãnɛ u ɔ̃ aɗɔn. 11 Dɔdɔrim ɔ yɛ ɗeknnɛ awuni, ɔ yisinya vishonɛtɔ a sisɨn gbete ɔ gaa yɛ, ɔ pɛli ji vi gbete ɔ kaka sãyɛ. 12 Ɔ sisɨn vi ãnɛ kɛ ɔ̃nɛ ɗɔn, Ɗalapa nta tɔ̃vɨn ji aru ɔ ã vigbete awɔ wuniyɛ, ama ɓa aru vigbete ɔ ãyɛ gbete ɔ ɓa a wuniyɛ ɓa.

13,14 Ɓanɛ n kasirɛn ã shɔwɔyi vi pɛlaa ang ãwɔ vi kpete-kpete a yuu ɓa, ama aru ɔ vi aɗɔn fɛ̃ɛm, pɛ vitɔ̃vɨng ɔ pɔ̃si shɔ gbeteyi ɓɛɛ ɓa naatɔ, kɛɗɔn a ɗagbete ɔ ɓɛɛ ɓayɛ i ɓɛɛ kɛ ɔ̃nɛ ɗɔn fɛ̃ɛm, i yɛ pɔ̃sɔɔnaatɔ. Kɛ nyabamkɔ ko-iviya yɛ ɔ̃kɛ zaali. 15 Ji nagbete shɔ bee a Ɗanyaruubii nɛ, <<Shɔgbete toli vinaa waanɛ, ji ɔ̃riu ɓa ɓamɓa, a shɔgbete toli vinaa fɛ̃ɛ ji ɔriu ɓa fɛ̃ɛ ɓa.>>

16 U dɔ̃ri Ɗalapatɛ nɔgbete pɔ̃ Titus kasirɛ u pɔ̃sɔɔnaa, nagbete n kasiyɛ! 17 Ji pɛli ɓa vigbete u kasiu pɛliyɛkɔ sheeli ɓa, ama ji au kasinɛ yɛ ɔ ɗɔbii nɔgbete pɔ̃ au sisɨnyɛ. 18 U ɗɔu dɔ̃ u shɔbii shɔgbete shɔ sisɨnãnɛ i ɓassiutɔ fɛ̃ɛm, aru u vishonɛ tɔ̃vɨn au nwa ruu tɔ̃vɨn yɛ. 19 Ɓa shɔnkɔ sheeli ɓa, shɔ sisɨn ãnɛ Ɗabii i lɔu tɛttɔ u ra a ukɔni ayuu vishonɛ ɔrinɛ gbete u pɛliyɛ, aru u bassi Uɓeyelapa nii, sɔ̃n aru u tasinɛ u sisɨn naapɔ̃sinɛ aɗɔn.

20 U ntasetɔ aru nɔgbete u yɛ gɨn a vinaa gbete shɔ ãu a shɔ kasinɛni. 21 Au sisɨn u kasi vitɔ̃vɨng pɛlinɛ, ɓa Uɓeyelapa ɗekɨnkɔ sheeli ɓa, ama a shɔzɛ ɗekɨn piti kpai.

22 U ɗɔu dɔ̃ u shɔbiiyi ayikɔni a nyazɔɔ; shɔ gbete u ntau sisɨn tɛttɔ, u zɛu tɛttɔ ayuu vitɔttɔt u kpaarɛ u sisɨn shɔ naapɔ̃sinɛ aɗɔn fɛ̃ɛm. Dɔdɔrim u sisɨn pɔ̃nɛ aa yuu yɛ ɗekntɛ fɛ̃ɛm, kasitɛ waanɛ u pɔ̃si shɔ naarɛ. 23 Ɔ zɛtɛ Titus ɓɛɛ shɔgbete n pɛli vishonɛ a wuniyɛ aru u pɔ̃sɔɔnaayɛ, u shɔbii gãsiyi gbeteyi yɛ awuni nyazɔɔ, i ɓɛɛ shɔgbeteyi ãsisɨn Ɗabii i jashonɛyi ai n ti Kirisi basinɛyɛ. 24 Ɔ tasiyi ɔ ɔrinɛtɔ, nɔgbete shɔ sisɨn ãnɛ Ɗabii i zɛkɨn nɛu nɔsisɨn waanɛ awɔ yuu pɛ nizɛ.