1 Ɔ kɨnnɔɔ pɛ a nogbete Ɗalapa ɔriuyɛ! U ɔrinɛ jitɔ pɛ̃niba a shɔ ɓaunɛ Ɗalapa jaayi, u jo ɗɔkɔ. Jo ruumkɔ kotipim ji zɛu niɓa: aruukɔ ji zɛ Ɗalapa niɓa. 2 N shɔ ɔrinɛyi, u dɔdɔrim pɛ Ɗalapa jaayi, ama dɔdɔrim pɛɓa nogbete shɔ zɛ vigbete au yɛ ɔ̃ yɛɓa. Ama u zɛtɛttɔ Kirisi kanɛ uyɛ ɔ̃ naa ukɔɔ, aruviya uyɛ zɛu jo nagbete ujiyɛ. 3 Shɔ au kɛ pɔ̃ sisɨnnɛ a Kirisi bi yɛ ɔ̃ wasak, ji nagbete Kirisi ujo wasakiyɛ.

4 Shɔgbete kɛ pɛli ruuvininɛ sijo gɨn nya ãsinɛ ɓa, ruuvini pɛlinɛ ukɔɔ ɔ̃rɛ a shɔ gɨn Ɗalapa nya ãsinɛ ɓayɛ. 5 Ɔ zɛtɛttɔ nɛ Kirisi anɛ u tuu ruuvini kati, ruuvini ɓau biini ɓa. 6 Ji nankɔ shɔgbete kɛ kasi ɔ̃nɛ nɛ yɛ ɗekɨn ɓa ruuvini pɛlinɛ niɓa; ama shɔukɛ yɛ ɗeknnɛ a ruuvini pɛlinɛni siji zɛu ɓa ko ji zɛu niɓa.

7 Majaayi, n shɔ ɔrinɛ, shɔwɔkɔ ɗakɔnɛ! Shɔukɛ pɛli vi tɛpɛtɛpɛnɛ siu shɔ tɔ̃vɨn, ji naa Kirisi uji shɔ tɔ̃vɨnyɛ. 8 Shɔgbete kɛ pɛli ruuvininɛ a lele upɛ japɛ̃ɛ̃pɛ̃ɛ̃ ɓɛɛyɛ, aruviya japɛ̃ɛ̃pɛ̃ɛ̃ upɛ shɔ ruuvini au ganɛ. Ɗalapa jaa shɛjo arumkɔ, u lɛsi vigbete japɛ̃ɛ̃pɛ̃ɛ̃ pɛliyɛ.

9 Shɔgbete upɛ Ɗalapa jaayɛ iyɛ ɗekɨn ɓa a ruuvini pɛlinɛni ɓa, aruviya Ɗalapa Suru ai biini; Ɗalapa pɛi Ɓeye, yɛ yɛɗekn ɓa a ruuvini pɛlinɛni ɓa. 10 Nkɔ vigbete yɛ vɔsi Ɗalapa jaayi a japɛ̃ɛ̃pɛ̃ɛ̃ ɓɛni yɛm: Shɔgbeteyi ijo pɛlivi tɔ̃vɨn ɓa ko ijo ɔrizɔɓa iɓa Ɗalapa jaa ɓa.

11 Shɔmpɛ nya ruuba awɔ nta a ɗekɨn yɛ, ɔ̃riutɛ kaka jazɨn a kɔrɔɔ ɔ ɔri zɔtɔ. 12 Ukɔɔ ɔ ɔ̃nɛ naa Kainu ɓa; usipɛ japɛ̃ɛ̃pɛ̃ɛ̃ ɓɛɛ a nyo ɓeɛzɔ̃ Habila rɛ. Kainu nyo ɓɛzɔ̃? Aru gbete u vipɛlinɛ si kɔ̃linɛ, ɓɛzɔ̃ vipɛlinɛ siɓɛ tɔ̃vɨn.

13 Masayi, shɔ kotipi i kɛ bɛ̃wɔɔnɛ, ukɔ ɔ̃rɔɔnɛ vibiizaanɛ. 14 U zɛtɛttɔ u yaa vɔrɔtɛ u atɛ a suruni; u zɛtɛttɔ aruviya u ɔri zɔtɔ. Shɔ ai jo ɔri zɔɓayɛ i doo a vɔrɔ naa. 15 Shɔgbete ikɛ bɛ̃ɛ̃ zɔnɛ, ipɛ shɔ yuvɔɔyi, ɔ zɛtɛttɔ nɛ shɔ yuvɔɔyi i Suru gbete sɔ̃ nyaɓayɛ ɓa ai biini ɓa. 16 Shɔmpɛ nogbete au zɛ ɔrinɛyɛ: Kirisi ãu Suru au yuu. Aruumkɔ ntɔtɛ ukɔma u ãu surutɔ au ɓɛzɔ̃yi yuuniǃ 17 Shɔu vinaa kɛ ɔ̃nɛ ɗɔn, kɛ zɛ ɓɛzɔ̃nɛ a raani jo pɔ̃siu naa ɓa, u yɛu shakɛpi kovi nɛi ɔri Ɗalapa tɔ viya? 18 N jaayi, u zɔ ɔrinɛ kɔ ɔ̃nɛ shanɛkɔshɛli a ganya; ɔ̃riutɛ kaka jazɨn a kɔrɔɔ u tasiu ɔrinɛ a tete vishonɛ a nizɛ.

19 Ama shɔmpɛ nogbete auyɛ tasi nɛ upɛ tɔ̃vɨn ɓɛɛ; n pɛ nogbete uyɛ kpa bi manɛ a Ɗalapa ɗekɨn yɛ. 20 A ɗagbete u sisɨn kɛ tasiunɛ nɛ u ruuvini ɗɔn, u zɛtɛttɔ Ɗalapa tɛu kaka sisɨn tɛttɔ, zɛ vi tɛttɔ piti kpai. 21 N shɔ ɔrinɛyi, u sisɨn ji tasiu ɓanɛ u pɛli ruuvinitɛ ɓa, u kaka ɗɔn au yɛ shi a Ɗalapa ɗekɨn yɛni. 22 U tɛ vigbete au yɛ gaki au naa, aruviya u gɨu nya ãsinɛtɔ a pɛliu vigbete kasiyɛ. 23 Shɔmpɛ nya ãsinɛ au ãsiuyɛ nɛ, u ã sisɨn au ɓɛjaa Yesɔ Kirisi bi nɛu ɔri zɔtɔ, ji nagbete Kirisi tasiuyɛ. 24 Shɔgbete aikɛ gɨn Ɗalapa nya ãsinɛnɛ, Ɗalapa yɛ ɔ̃ ai yɛti ikɔma iyɛ ɔ̃ au yɛti. U zɛtɛttɔ aru Suru wɔsɔ-wɔsɔ gbete ãuyɛ.