1 Ji nyabankɔ ɔ suyuwɛrɛyi, ɔ̃rɔɔtɛ kaka jazɨn a kɔrɔ ɔ ãwɔ yuutɔ awɔ shɔwɛrɛyi biini, nɗa shɔgbete ji ã sisɨn ɓa a Ɗalapa nya ruubiini ɓa, ɔ vishonɛ yɛ gɔ̃itɔ i ã sisɨn rɛ. Ɓanɛ setɛ ɔ sharuuwɔtɛ ɓa, 2 naa ikɛ zɛwɔ vi pɛlinɛ wɔsɔ-wɔsɔ nɛ ai zɛwɔ ɔ̃nɛ bassi Ɗalapa tɔ i yɛ kɔsitɔ. 3 Ɔ kɔrinɛ kɔ ɔ̃nɛ e biɓilinkɔ sheeli ɓa, nagbete ɔ ntori sɔ̃yuuyɛ, ko visho tarimɛɛ ɔ tosiyɛ, ko fãrã gbete ɔ tosiyɛ. 4 Kɛ ɔ̃nɛ nankɔ, ɔ kɔrinɛ u ɔ̃ jo e sisɨn ɓuzɨn, ɓa e gbete yɛ ntɛyɛ ɓa, ɔ kɔrinɛ u pɔ̃wɔrɛ ɔ ɔ̃ ɓa shɔ yukɔnɛ ɓa, ɔ ɔ̃ shɔ yuroorinɛ, ukɔ pɛ vi pɛ̃niba a Ɗalapa ɗekɨn ni. 5 Aru si tɛ̃ɛ̃tɛɛ̃ sugbete i pɔ̃ sisɨn a Ɗalapa bi i pɛliyi yuu aka ɓɛvɔyi bi. 6 Saratu usi jo nankɔ a kuti ɓɛvɔ Ibirayi a ɓaunɛ n shɔwɛrɛ. Dɔdɔrim ɔpɛ u jasoroyi naa ɔkɛ pɛli vi tɔ̃vɨn nɛ ɔji nta seti viwɔ ɓayɛ.

7 Shɔwɛrɛyi ɔkɔɔma ɔ ɔ̃ sɔ̃n jo nankɔ a mɛsoyini a tete sisɨn tɔ̃vɨn ni. Ɔ sãyi a kutinɛni aru gbete i kaka ɓa naa ɔ ɓɛɛ ɓa. Ɔ a mɛsoyini ɔ tɛ Suru a Ɗalapa ãwɔyɛ ayini nyazɔ. Ɔ pɛli vimtɔ aru gbete viwɔyɛ pɛshoɓa awɔ Ɗa gakinɛni ɓa.

8 Au yisinɛ, ɔ sisɨn vi pɛlinɛ ntanɛni u ɔ̃ gbete; ɔ ɔri zɔtɔ, ɔ nta zɔ raatɔ, ɔ ɔ̃ shɔ yuu roorinɛ, ɔ ɔri mɛshozɛyitɔ. 9 Ɔkɔɔ kɔsi vi kɔ̃linɛ a vikɔ̃linɛni ko zɔ dãnɛ a dãnɛ ni; kɛ ɔ̃nɛ ɗɔkɔ ɔ shoriyi a vɔɔ susãri tasinɛ. Si jo vigbete Ɗalapa marɛ nɛn ãwɔyɛ a ɗagbete ɓawɔ nyayɛ. 10 Nagbete Ɗa nyaruubii shayɛ,

shɔgbete kɛ tɔnɛn ntau tɔ̃vɨn ɔ̃nɛyɛ

au kasi nɛn zɛ ɗavi tɔ̃vɨn,

ɔ̃riutɛ kaka jazɨ a kɔrɔɔ u yaa vi kɔ̃linɛ shalinɛtɔ

u yaa nyzɔ̃tɔ.

11 Ɔ̃raatɛ kaka jazɨ a kɔrɔɔ ɔ yaa nyaba vi kɔ̃linɛ pɛlinɛtɔ ɔ pɛli vi tɔ̃vɨn;

ɔ̃riutɛ kaka jazɨ a kɔrɔɔ u kã sisɨn puru sisɨn gbete. 12 Aru Uɓeyelapa kn nɔɔ jo a shɔ tɔ̃vɨn bikɔ

u wesho ai vigbete i gakiyɛ;

ama bẽẽ shɔgbete i pɛli vikɔ̃linɛyɛ.'' 13 Shɔu yɛ lɛsɔɔ piya naa ɔkɛ pɔ̃ sisɨnnɛ a vi tɔ̃vɨn pɛlinɛyɛ? 14 Ama ko naa ɔkɛ ɓoo raanɛ aru vi tɔ̃vɨn pɛlinɛyɛ, ɔ nta tɔ̃vɨntɔ. Ɔkɔɔ nta shɔwɔ setinɛ, ɔkɔɔ yɔri yuunɛ. 15 Ama ɔ ɔ̃ a Kirisi bassinɛni a sisɨn, ɔ basiu naa Uɓeyelapa. Ɔ mabiitɔ ko-pi ɗaviya a nogbete ɔ kasi shɔgbete ikɛ hɨwɔ ruunɛ nya awɔ ruu sisɨn pɔ̃nɛniyɛ, ama ɔ kasiyi nya a yuu roorinɛ ɔ tasiyi ɗɔɔ sisɨn pɔ̃nɛtɔ. 16 Ama ɔ ɔ̃ a lɛrinɛni tɔ̃vɨn ko shɔkɛ dãwɔnɛ, ɔkɔɔ pɛli vi kɔ̃linɛnɛ u lɛsɔɔrɛ ɓa, aru shɔgbete i nwa nya kɔ̃linɛ awɔ yuu aru vi tɔ̃vɨn yɛ ɔ pɛli naa shɔgbete i gɨn Kirisiyɛ, i nta yusẽtɔ aru vigbete i shayɛni. 17 Aru viya kɔritɔ shɔu ɓooraa aru vi tɔ̃vɨn pɛlinɛni, naa kɛ ɔ̃nɛ Ɗalapa vi pɛlinɛyɛ, a nogbete shɔ pɛli vikɔ̃linɛyɛ. 18 Aru Kirisi vɔjo au ruuvinikɔ ɓa gbete dangdang, shɔ tɔ̃vɨn aru shɔ ruuviniyi, aru gbete u n-tɔ Ɗalapa ɗɔɔ bi. Shɔ nyɔu vɔrɔ a shɔ nɔɔ, ama shɔ yusiu lapa a Suru, 19 a ɗagbete usi a Suruyɛ yɛrɛ a nwari shɔ a shɔ mayi a surutɔyɛ nya. 20 Shɔm sipɛ shɔgbete i gɨn Ɗalapa nyaɓayɛyi suru, a Ɗalapa sisɨn mɛnɛni piti kpai a ɗɔgbete au gai yɛ si Nuhu u ɗɔɔ latosi kɔrinɛyɛ. Shɔgbete ai si yeti latosiu isi piti kpai manta a shɔ raiyi a mii naa, 21 miiu ukɔɔ ɔ̃rɛ mii batizima gbete au rawɔ dɔdɔrim yɛ.Ɓa shɔgbete shɔ sɔki bi a wuniyɛ ɓa, ama pɛ ruu shɔ ma a Ɗalapa ɗekɨn a sisɨn tɔ̃vɨn yɛ. Ukɔɔ rawɔrɛ a kaa Yesɔ Kirisi lapa yuunɛ, 22 shɔgbete yɛkolapa u a Ɗalapa nakɨn, u ɗɔɔ kpati roonɛ a Ɗalapa jashonɛ lapayi yuu piti kpai a kaka gbete a kolapani.