1 Nkɔng Bituru sẽkoom shɛ ang nakɔ, Yesɔ Kirisi jashonɛ,

Yɛnɛ shɔgbete Ɗalapa lɔyiyɛ bi, shɔgbeteyi ɔ̃ ɔ̃nɛ shɔzati, ai sãti gbete gbete a tipi Pontu yɛ, a tipi Galantiya, a tipi Kafadokiya, a tipi Asiya, a tipi Bitiniya ni. 2 Aru Ɗalapa Da zɛwɔ tɛttɔ a lɔwɔrɛ a risɔɔ shɔ wɔsɔ-wɔsɔ au kaa Ɗa Suru, ɔ gɨn Yesɔ Kirisi nya, u kpaa u sɔwɔɔtɔ.

Mɛnɛ Tɔ̃vɨn shonɛ a ɔ̃nɛbiinyatɔ̃nɛni u ɔ̃ ɔ ɓɛɛkɔ piti.

3 U dɔ̃ri Ɗalapa Da a Uɓeyelapa Yesɔ Kirisi tɔ! aru u raantanɛ pɛ̃niba ãu suru sɔɔtɛ a nyaba au yusi Yesɔ Kirisi a saa yɛ. Vim pɔ̃ntɛ u ɔ̃nɛ sisɨn pɔ̃nɛ pɛ̃niba ɗɔn, 4 U ɗɔ nokɨn nɛ Ɗalapa tasiu shɔbiiyi susãritɛ, pɔ̃sɔɔ tɛttɔ a kolapa, aɗɔgbete yɛ pũ ɓayɛ, ko lɛsi ɓa, yɛ nteɓa. 5 Ɗa susãrim pɛ ɔ ɓɛɛkɔ, a nyaba sisɨn ãnɛ Ɗalapa kaka kɔwɔɔtɛ, ɔ naranɛ yɛ ɔ̃ dangdang, shɔyɛ tasɔɔ a leeu koo yisinyayɛ. 6 Ɔ nta tɔ̃vɨntɔ ayuu vimni, dɔdɔrim tɔ̃tɔ ɔ sisɨn u lɛsitɔ sekaa aru zɔng sisɨn ntanɛ gbete ɔ ɓooraa au yuuniyɛ waanɛm. 7 Sisɨn ntanɛm a raaɓoonɛni u tasinɛ ɔ sisɨn ãnɛ pɛ nizɛ. Ko tarimɛɛ, a shɔ lɛsi dɔɔtɔ yɛ shɔ nta pɛ a yaa; ji ɗɔkɔ awɔ sisɨn ãnɛni, au kɔrirɛ tɛɛ tarimɛɛtɔ, ɔ̃tɛ kaka jazɨng akɔrɔ shɔu ntautɔ nɔgbete ɔ mɛɛsisɨnyɛ. kɛɗɔn ɔ yɛ kpaa bɛlinɛtɔ a bassinɛ a shɔbassinɛni a ɗagbete Yesɔ Kirisi yɛ shɛshiyuyɛni. 8 Ɔ ɔri Yesɔ Kirisitɛ ama ɔ ji zɛu ɓa shãani ɓa, ɔ ɓa ɗɔgbete ɔ zɛuyɛ dɔddɔrimni ɓa, ama ɔ ãsisɨntɛ au biini, ɔ nta sisɨn purutɛ pɛ̃niba tɛɛ kakatɛ, au nya sha ɗɔɓayɛ, 9 aru ɔ tɛɛ pɛ ɔ suruyi raanɛ, ukɔ sɨnrɛ ɔ sisɨn ãnɛ au bi.

10 Jo ayuu raanɛnkɔ, janyagadiyi kãtɔ tɔ̃vɨn, i mɛɛsẽsẽ, i shatɔ aru tɔ̃vɨn shonɛ a Ɗalapa yɛ ãwɔyɛni. 11 I kã nyaba nɛi zɛ ɗagbete ɗau yɛ pɛliyɛ, a nogbete yɛ ayɛni. N si jo ɗagbete Kirisi Suru tasi ai sisɨn yɛ, sha nogbete Kirisi yɛ ɓooraayɛ au bassinɛ au yɛ gɨu kɨntiyɛni. 12 Ɗalapa tasi janyagadiyitɔ nɛ vishonɛ shomi ɓanɛi aru i kpaari i yuu viwɔ ɓa, ama ɓɛɛjo awɔ yuukɔ, nagbete i nwanya aru vigbete ɔ ntaɓa dɔdɔrim a jashonɛyi nyayɛ, shɔgbete i gelɔɔ ruu tɔ̃vɨn aka Ɗa Suru kaka gbete shɛ a kolapayɛ. Vimiyi pɛ vigbete ko Ɗajashonɛlapa ma i yɛ kasi zɛnɛtɔ.

13 Ɔ mabiitɔ a sisɨn aru vishonɛ, ɔ ɔ̃ nɔkãkãri ɔ pɔ̃ sisɨn kpai ayuu Ɗa susãri gbete shɔyɛ ãwɔyɛ a leegbete Yesɔ Kirisi yɛ tasiu yuu yɛ. 14 Ɔ gɨn Ɗalapa nyatɔ, ɔkɔɔ yawɔ yuunɛ ɔ vikasinɛ ɔ pɛlisiyɛ, u ɗakɔɔrɛ ɔ pɛlirɛ toti nagbete siwɔ nɔɔ ji ɓeli ɓayɛ. 15 Ama ɔ ɔ̃ jo Wɔsɔ-wɔsɔ a vigbete ɔ pɛliyɛni piti, Ji nagbete Ɗalapau ɓaunyayɛ u wɔsɔ-wɔsɔ. 16 Labeenɛ Ɗanyaruubii shanɛ, <<Ɔ ɔ̃ wɔsɔ-wɔsɔ aru n pɛ Wɔsɔ-wɔsɔ.>> 17 Ɔ ɓaunɛ Da, a ɗagbete ɔkɛ gaki Ɗalapa nɛyɛ, shɔgbete au yeeri shɔ ruu zali kpai, ji nogbete kopiya pɛli viyɛ; ɔkɛ ɔ̃nɛ a kotipim ɔ ɔ̃ au seti ntanɛni. 18 Aruviya ɔ zɛ viu shɔ shoyɛtɛ a shɔ rawɔ a ɔ̃nɛ gbete ɔ ɓɛuruyi i ɔ̃ ɔ̃nɛ vilansi kɔ̃linɛ gbete i yasɔɔ a kɨntiyɛ. Siɓa vigbete lɛsiyɛ ɓa, naa tarimɛɛ ko tari gbete au saa yuu pararayɛ ɓa; 19 Ama sipɛ Kirisi kpaa gbete au nteyɛ, naa jamerẽẽ tɛpɛ-tɛpɛ u vɔrɔ siɓa biini. 20 Ɗalapa lɔurɛ si ji pɛli kotipi ɓa, a tasiu a leegbete koo yisinya ɓam, jo awɔ yuukɔ. 21 Au kabiikɔ ɔ ã sisɨnrɛ a Ɗalapa biini, shɔgbete yusiu a saa a bassinɛ rɛ, aru nankɔ ɔ sisɨn ãnɛ a sisɨn pɔ̃nɛ ɔ̃ a Ɗa biini.

22 Dɔdɔrim nogbete ɔ sɔɔkɔɔ yuutɛm ɔ gɨn ruu tɔ̃vɨntɛ, ɔ ɗɔ zɔ ɔrinɛ a sisɨn gbete, ɔ ɔri zɔtɔ a sisɨn gbete. 23 aka suru Ɗanyaruubii shɔ yeewɔ sɔ̃ntɛtɔ. U nyaruubii ɔ̃ dangdang, shɔ ji yeewɔ ɓa naa zɔvi au vɔtɔ ɓa sɔ̃n ɓa zɔvi gbete yɛ vɔyɛ ɓa. 24 Nogbete laabeenɛ Ɗanyaruubii shayɛ nɛ,

<<Jashɔzɛyi piti kpai naa wisi,

i bassinɛ kpai pɛ naa kowa a jaalaa.

Wisi waatitɔ, kowa ma ɗɔɔtɔ,

25 ama Uɓeyelapa nyaruubii ɔ̃ dangdang.>>

Ruum pɛ ruu tɔ̃vɨn gbete shɔ nwarɔɔyɛ.