1 Ɔ shɔ vinaamiyi, ɔ wesho ang nya! Ɔ sĩinɛ ɔ kaa nya aru vigbete au kaanɛ awɔ yuumi! 2 Ɔ vinaa i pntɛ pũti kpai, vimalaa mawɔ fãrã tɛ piti kpai. 3 Ɔ tarimɛ a silivani sasa kuitɛ piti kpai, sasami ukɔɔ yɛ ɔ̃rɛ vi shinɛ awɔ yuuni u sha ɔ yɔpɔ bi naa yaa. Ɔ toli vi kotipimtɛ awɔ dii gbete kɛ sɔ̃nyanɛm. 4 Ɔ ji shori shɔgbeteyi shoshɔɔ vi a jaayɛ ɓa. Ɔ weshotɔ ai ruuni! Shɔgbeteyi shoshɔɔ vi a jaayɛ i nyavɔ to Ɗalapa shotɛ, Uɓeyelapa kiriri. 5 Ɔ ɔ̃nɛ a kotipi ɔ nta tɔ̃vɨn tɛ ɔ ɗɔɔ shanɛ, ɔ ɗɔɔ ɓoonɛ. Ɔ sharɔɔ yuutɛ ɔ nɔlitɛ ɔ ɗɔgbete ɔ ga dii yeenɛyɛ. 6 Ɔ yeeri shɔgbeteyi ruuɓa a yuuni ɓa ruutɛ yuu, ɔ nyɔi vɔrɔ sɔ̃ntɛ ama i ji kaagɨn ɓa a ɔkɔɔni ɓa.

7 Masayi ɔ ma sisɨntɔ ɔ ga ɗagbete Uɓeyelapa yɛ a yɛ. Ɔ kn nɔɔpɛ a shɔ jalanɛyi bi, nɔgbete i ma sisɨn i ga visha ai ɓaa a tipiyɛ a ɗagbete iyɛ kpaa gaanɛ mii a mii gbete yɛ kunaa nɛ nɗai visha u zɔ̃ a wuniyɛ. 8 Ɔ̃rɔɔtɛ kaka jazɨ a kɔrɔ ɔ ga sɔ̃njo. Ɔ pɔ̃ sisɨntɔ a lapa feefee, aru Uɓeyelapa anɛ atɛ maani. 9 Ɔkɔɔ nwalinyanɛ a zɔ yuuni, masayi, aru gbete Ɗalapa yɛ yeerɔ ruu ɓa yuuni ɓa. Shɔ ruu yeenɛ atɛ maani, atɛtɔ a nyejaa. 10 Ɔ kpaa sisɨntɔ masayi, a Ɗalapa jashonɛyi nya gbete i nwanya a Uɓeyelapa nii. Ɔ tuuyi naa shɔgbete i tasi yuu a tete sisɨn mɛɛnɛ a sisɨn manɛ a ɗaraa ɓoonɛ. 11 U ɓainɛ shɔbiinyatɔ̃nɛ aru gbete i ma sisɨnyɛ. Ɔ nta nɔgbete Ayuba mɛsisɨnyɛtɛ, ɔ zɛ vigbete Ɗalapa ãu au yisinɛni. Aru Uɓeyelapa u shɔraa ntanɛ a shɔ-shɔruuvini yasinɛni a mɛɛnɛ. 12 A vigbete tɛɛ shɔmni piti kpai, ɔkɔɔ shovinɛ a teenɛni a ruuvigbete ɔ maayɛni. Ɔkɔɔ teenɛ a kolapani ko a kotipini ko a viwɔni kɔgbete. Ɔ shajinɛ <<Nn>>kɔshɛɛli nɗa kɛ ɔ̃nɛ nizɛyɛ, ko <<Ɓa>>nɗa ji ɔ̃ ɓa nizɛ ɓayɛ, aru ɔyɛ to Ɗalapa ruu yeenɛrɛ. 13 Shɔwɔ kati awɔ teteni u yuyɔrinɛ a ɗɔnya? Shɔwɔ kati awɔ tete u binyatɔ̃nɛ a ɗɔniya? I tɔ̃ɔ̃ soo bɛlinɛtɔ. 14 Shɔwɔ kati awɔ tete u vɔrɔya? See u ɓa yupɛ̃ni jaaɗayi nyatɔ, shɔgbete yɛ gaki Ɗa ai yuu ɗau sɔ̃riyinɔɔ ai bi au Uɓeyelapa nii. 15 Ɗa gbete shɔ gaki shɔ vɔrɔm a tete sisɨn ãnɛ yɛ gatiutɔ; Uɓeyelapa yɛ gatiyitɔ, i ruuvini gbete i pɛliyɛ Ɗalapa yɛ yasiyitɔ. 16 Aruukɔ ɔ geli zɔ ruuvini ɔ yasi zɔ tɔ, ɔ gaki zɔ Ɗa tɔ, a nɔgbete shɔyɛ gati ɔyɛ. Shɔ tɔ̃vɨn Ɗa gakinɛ u kaka ɗɔn. 17 Iliya u sijo shɔzɛ naa ukɔɔ. Ã sisɨntɔ a Ɗa gakinɛni waanɛ nɛ mii kɔ anɛ, mii ji a ɓa a tipiuni ɓa saa taati au ɗiiti. 18 Au kɨnti ni gaki Ɗa sɔ̃n tot, koyãsi ã miirɛ vishatarɛ a tipiuni. 19 Masayi naa shɔwɔkɛ yaa nyaba nizɛ nɛ, shɔwɔkɛ sɔriu sɔ̃nɛ, 20 ɔ kpaa sisɨntɔ a vimni: shɔgbetekɛ sɔri shɔruuvininɛ au nyaba kɔ̃linɛuni yɛ raa shɔruuviniu surutɔ a vɔnɛni, shɔmkɔ yɛ ɔ̃ nyaba ruuvini waanɛ yasinɛ.