1 Bawaanɛ a nya marinɛni awɔ tete shɛ piya? I shɛ a vigbete ɔ kasiyɛ nɛi nta tɔ̃vɨn a wuniyɛ gbete i waaba awɔ sisɨnyɛ. 2 Ɔ kasi vitɔ waanɛ ama ɔyɛ kpaa ɓa, aru ɔ kasi vɔrɔ nyonɛ; ɔ kã vitɔ a kakani waanɛ, ama ɔyɛ kpaa ɓa, aruukɔ ɔ marinyakɨn ɔ waabarɛ. Ɔ ji kpaa vigbete ɔ kãyɛ ɓa a ruugbete ɔji kã ɓa a Ɗalapa naa ɓa. 3 A ɗagbete ɔkɛ gakinɛ ɔ kpaa ɓa aru gbete ɔ gaki ɓa a sisɨn ntɔɓa; ɔ kãvi aru gbete ɔ kasi tɔ̃vɨn ntanɛ a wuniyɛ. 4 Ɔ shɔgbete ɔ ã sisɨn ɓamiyi! Ɔkɛ sã wesanɛ a kotipini ɔji zɛɓanɛ ɔpɛ Ɗalapa shɔnɔpɔ̃ ɓaya? 5 Ɔkɔɔ tuunɛ mɛnɛ Ɗalapa nyaruubii tɔ̃vɨn pɛ weze gbete au shanɛ nɛ, <<Ɗalapa kagɨntɔ waanɛ aru sisɨn gbete au pɔ̃siu a yɛtiyɛ.>> 6 Ama tɔ̃vɨn gbete Ɗalapa ã yɛ tɛɛ kaka tɛttɔ. Aruukɔ Ɗanyaruubii shanɛ nɛ, Ɗalapa bẽẽ yutunɛtɔ, ama ã tɔ̃vɨn pɛlinɛ ɓɛɛ shɔgbete au rooriyuyɛ.>> 7 Aruukɔ ɔ ã yuu a Ɗalapa bi. Ɔ bẽẽ japɛ̃pɛ̃ɛ̃tɔ, yɛ yuukɛkati awɔ ɗɔbiini. 8 Ɔ aa Ɗalapani maani, ukɔma yɛ a maani a ɔkɔɔni. Ɔ shɔruuvini ɔ yaa ruuvini pɛlinɛtɔ! Ɔ shɔ yɛti ziti ɔ kɔsitɔ! 9 Ɔ lɛsi sisɨntɔ, ɔ sĩrɛ, ɔ nte muru; ɔ kɔsi laatinɛ a sĩnɛ, ɔ binyatɔ̃nɛ u ɔ̃ yɛti lɛsinɛ! 10 Ɔ ɓaki yuu a dii a Uɓeyelapa ɗekɨn, yɛ yuusɔɔ lapatɔ.

11 Mazɔ̃yi, ɔkɔɔ nwanya foo nɛ a zɔ yuuni. Ɔkɛ nwanya foo nɛ a zɔ yuuni ko ɔ yeeri zɔ Kirisa ruu, si ɔ yee ruutɛ a Ɗalapa nya ãsinɛ yuu. Ɔkɛ yee ruunɛ a Ɗalapa nya ãsinɛ yuuni, kɛɗɔn si a toɓa shɔgbete au gɨn nya ãsinɛ ɓa, ama si akɛ shɔgbete au yeeriu ruuyɛ. 12 Ɗalapakɔ shɔ nya ãsinɛ ãnɛ a shɔgbete u yee ruu awuni. Ukɔ raashɔrɛ u lɛsi shɔrɛ sheli. Ɔ sĩ awɔ sisɨn nɛ ɔ piya, ɔ yeeri shɔ ruu ya?

13 Ɔ wesho pɛ dɔdɔrim, ɔ shɔgbete ɔ shanɛ, << Nɛm ko ɓuru u yɛ yɛ komoo wɔɔ, u yɛ ɔ̃ aɗɔn saa gbete u mɛli vi u kpaa saa ɗɔrɔrɔ.>> 14 Ɔ ji zɛ nɔgbete ɔ suru yɛ ɔ̃ yɛ ɓa! Ɔ naa miisɨi au shɛ a gadi ɗaa kɛ tanaa nɛ nirɛ. 15 Vigbete ɔsi shayɛnɛ: << Naa Uɓeyelapa kɛ kasinɛ, uyɛ ɔ̃rɛ a pɛli vim a viwaa.>> 16 Ama dɔdɔrim ɔ ɗɔɔ pɛrɛ pɛlinɛ a baasinɛni; baasinɛm ɓa tɔ̃ ɓa. 17 Aru gbetenkɔ, ukɛ zɛnɛ u ji pɛli ɓa vitɔ̃vɨng ɓa u pɛlitɔ, aru gbete yɛ ɔ̃riurɛ ruuvini.