1 Kirisi ɓooraa si ji tɛ̃ɛ̃tɛ̃ɛ̃ awɔ nɔɔ, ɔ̃rɔɔtɛ kaka jazɨng akɔrɔ ɔkɔɔ ma ɔ lɛritɔ raaɓoonɛm yɛ a sɔ̃njo awɔ yuuni; aruviya shɔu kɛ ɓooraanɛ a shɔ nɔɔ u naa ɓa a ruuvini ɓa. 2 Yuunɛ dɔdɔrim yɛnɛ ɗekɨn ɔ̃rɔɔtɛ kaka jazɨng a kɔrɔ, ɔ yaa Ɗalapa u gɨn a ɔkɔɔni, ɔ gɨn ɓa vigbete jashɔzɛ i kasiyɛ ɓa. 3 Ɔ wari yuu sitɛ knti bang ayuu vigbete shɔgbete i bassi Ɗalapa ɓa i kasi pɛlinɛyɛ. Ɔ ɔ̃nɛ pɛ ɔ̃nɛ vikɔ̃linɛ pɛlinɛ, vi gbɔgbɔ, saa ɓoonɛ au yɛ sɨwɔɔ wirinɛyɛ, roorinɛ zɔni a ɗɔgbete shɔ ɓolimii ɗɔnyɛ, a bɛlinɛ vizara a shɔ pɛli vigbete i suru ɓayɛ. 4 Ama shɔgbete i bassi Ɗalapa ɓayɛ, dɔdɔrim ɔ̃riyikɛtɛ vibiizaanɛ aru ɔ ji ɓasiyuu ɓa ayini ayi nyaba vikɔ̃linɛ pɛlinɛ niɓa, i yɛ dãwɔ kɛtɔ. 5 Ama i yɛ sha vigbete i pɛliyɛtɔ piti a Ɗalapa ɗekɨn, shɔgbete au mabii tɛttɔ u ɗɔɔ ganɛ aru u yeeri shɔgbete i a suruni a shɔgbete vɔtɛttɔyɛ ruu. 6 Si jo a ruukɔ shɔ nwari shɔgbete i votɛtɔyɛ ruu tɔ̃vɨn sɔ̃n kɛkɨn jo, aru ko shɔ yeeruu ai yuu a jazɛbii na shɔ yeeri zɔ gãsiyiyɛ; shɔ nwari ruumkɔ aru i ɔ̃ nagbete Ɗalapa kasiyɛ a suru.

7 Vi piti kpai u nyayisinɛ atɛ Maani. Ɔ̃rɔɔtɛ kaka jazɨn akɔrɔ ɔ sãwɔ yuutɔ, ɔ ɔ̃ ɔ̃nɛ bimanɛ, nogbete ɔ yɛ zɛnɔɔ Ɗa gakinɛ yɛ. 8 Ayuu vi piti kpai, ɔ ɔri zɔtɔ sisɨn gbete, aruviya ɔrinɛkɔ sɔ̃ɔ̃ ruuvinirɛ piti kpai. 9 Ɔ tɛ zɔ naatɔ awɔ wɛrɛyini, ɔkɔɔ nwanya kɔ̃linɛ nɛ.

10 Ɗalapa ã Kopiya sẽrẽ tɔ̃vɨn shonɛ tɛttɔ totto, aru u pɔ̃si zɔ naa a wuni, u pɛlishonɛ jo awuni sisɨn gbete. 11 Shɔgbete kɛ nwari shɔ ruu tɔ̃vɨn nɛ, u nwa jo naa Ɗalapa shayɛ; shɔu kɛ ɔ̃nɛ shovishonɛ, u pɛli jo a sisɨn gbete a Ɗalapa ãuyɛ, a vi piti kpai Ɗalapa yɛ kpaa bɛlinɛtɔ aka Yesɔ Kirisi bi, bassinɛ a kaka pɛu ɓɛɛkɔ dangdang. Nankɔ.

12 N shɔ ɔrinɛ, masayi, ukɔ ɔ̃rɔɔnɛ vibiizanɛ aru bintanɛ ɔkɛ ntanɛm, bintanɛ ɔkɛ ntanɛm shɔ nta pɛ ɔ sisɨn, ɔkɔɔ tuunɛ naa visɔɔwɔɔ kpaawɔrɛ. 13 Ama ɔ nta yɛti purutɔ aru ɔ ɓooraa gbete Kirisi ɓooyɛkɔ, nogbete ɔ sisɨn puru yɛ ɔ̃ fɛ̃ɛm, naa shɔkɛ tasuu bassinɛ nɛyɛ. 14 Ɔ nta yɛti purutɔ shɔkɛ dãwɔnɛ, aru ɔ ã sisɨn a Kirisi bi, aru nankɔ vim tasitɛ nɛ Ɗa suru u ɔkɔɔni, u pɛ suru e bassinɛ. 15 Ɔkɛ ɓooraanɛ, ɓanɛ tasinɛ ɔ pɛ shɔ yuvɔ ɓa, ko ɓɔɔ ko ɔ shɔlanɛ ko shɔu tosiyuu a zɔwɔyi ruukɔ̃linɛyi ɓa. 16 Ama ɔkɛ ɓooraanɛ aru ɔ pɛ Kirisa, ɔkɔɔ ntayusẽnɛ, ama ɔ bɛli Ɗalapa tɔ aru shɔ zɛwɔ tɛ a kirisi nii. 17 Ɗaa pɛlitɛ a shɔ gaa ruuyeenɛ yɛ, shɔ gaa ruuyeenɛ pɛ a Ɗalapa shɔbii yuukɔ, naa kɛ gaanɛ a ukɔ, yɛ yisi kɛpikovi a shɔgbete i ji ã sisɨn ɓa a ruu tɔ̃vɨn ni ɓa viya? 18 Ji nɔgbete laabeenɛ Ɗanyaruubii shayɛ nɛ,

<<Shɔ tɔ̃vɨn i raanɛ raaɓoonɛtɔ fɛ̃ɛm,

yɛ ɔ̃ri shɔgbeteyi bassi Ɗalapa ɓayɛ shɔ ruuviniyi kɛpikoviya?>>

19 Aruumkɔ, shɔgbete i ɓooraa aru Ɗalapa pɔ̃rɛ nɛu ɔ̃ ɗɔkɔ, ai vipɛlinɛ tɔ̃vɨn i ãyuutɔ a Ɗalapa bi kpai, ukɔ shɛshirɛ, shɔu kɛ maruunɛ tɛɛ ɓa wezeni ɓa.