1 Ama aru lee aɗagbete vim yɛ pɛliyɛ n shɔbiiyi ji kɔri ɓa n beerɔɔ rɛ n gelɔɔtɔ ɓa. 2 Aruviya ɔ awɔ yuu ɔ zɛtɛttɔ fɛ̃ɛm nɛ Uɓeyelapa lee anɛ yɛ ɔ̃ naa ɓɔɔ a yɛ a zɨmba. 3 Aɗagbete shɔ kɛ shanɛ nɛ<<U ɔ̃nɛbiinyatɔ̃nɛ aɗɔn a ɔ̃nɛbiitɔ̃vɨngni,>>Kɛɗɔn a ɗaukɔ i yɛ zɛ vilɛsinɛ pɛ̃niba gbete yɛ kpaayiyɛrɛǃ Yɛ a naa jaakɔnɛ gbete kɔ su gbete yee jaayɛ ɓayi zɛnɛni ɓa, shɔwɔ yɛ ranaa ɓa. 4 Ama n shɔbiiyi ɔ ,ɓa ɗɔkɨnri ɓa, leeu ukɔ wisɔɔnɛbii naa ɓɔɔyi a yɛ. 5 Ɔ piti kpai ɔ pɛ shɔgbeteyi ɗɔsẽsẽ, shɔgbeteyi ɗɔ niti yɛ, u ɓa shɔgbeteyi ɗɔ zɨmba ko shɔgbeteyi ɗɔkɨnri ɓa. 6 Aru nankɔ Ukɔu roonɔroonɛ naa shɔwɔyini; ama u ɔ̃ a nɔkãkãri atette bimanɛ. 7 Aruviya shɔgbeteyi roonoroo i roo a zɨmba, shɔgbete visiiyɛ siyi a zɨmba. 8 Ama u pɛ shɔ ɗɔ niti, u pɛli ji vigbete tɔ̃vɨn, u hã sisɨn ãnɛ a ɔrinɛ ni au nɔsisɨn naa fãrã saka, u hã waayu sɨntanɛ au yuu u ɔ̃ u sisɨn pɔ̃nɛ aru raanɛ. 9 Ɗalapa ji lɔu ɓa nɛu ɓooraa aru u sisɨn lɛsinɛ ɓa ama u kpaa raanɛ aka Uɓeyelapa Yesɔ Kirisi, 10 Shɔgbete vɔ au yuu nɔgbete u ɔ̃ a nyazɔ awuni, ko u a suru ni ko u vɔtɛ u ɔ̃ nyazɔ awuni nɗa kaanɛyɛ. 11 Aru nankɔ ɔ masi zɔ bitɔ ɔ pɔ̃si zɔ naatɔ, ji nagbete ɔ ɗɔ pɛlinɛ dɔdɔrim yɛ.

12 U shɔbiiyi u gakɔɔtɔ ɔ bassi shɔgbeteyi pɛli vishonɛ awɔ teteniyɛtɔ, shɔgbeteyi teesɔɔ ɗekɨn i kɔsɔɔnya awɔ ɔ̃nɛ sisɨn ãnɛyɛ. 13 Ɔ basiyitɔ fɛ̃ɛm ɔ ɔriyitɔ aru vishonɛ gbeteyi pɛliyɛ. Ɔ ɔ̃ ɔ̃nɛbiinyatɔ̃nɛ a zɔni.

14 U shɔbii u ɗɔu masɔɔbii, ɔ gɔ̃ shɔ yɔkiyi yushotɔ, ɔ masi shɔgbeteyi sisɨn vɔtɛ bitɔ, ɔ pɔ̃si shɔgbeteyi kaka ɓa naatɔ, ɔ mɛɛsisɨntɔ a kopiyani. 15 Ɔ kɔyuutɔ shɔwɔ ukɔ kɔsinɔɔ vikɔ̃linɛ a vikɔ̃linɛni, ama kopiɗaviya ɔ pɛlɔɔ yuu vitɔ̃vɨng a kopiyani.

16 Kopiɗaviya ɔ ɔ̃ a sisɨn puru. 17 Ɔ gaki Ɗatɔ kopiɗaviya, 18 Ɔ ɔ̃ shɔ Ɗa dɔ̃rinɛ a vigbete ɔ kpawɔ yuu a ɗɔnyɛni kpai, shom pɛ vigbete Ɗalapa kasi awɔ ɔ̃nɛ awɔ yuɓasinɛ a Kirisi Yesɔni.

19 Ɔkɔɔ zãri Ɗa suru vishonɛ pɛlinɛ nɛ. 20 Ɔkɔɔ bɛ̃ɛ̃ janyagadiyi nyanwanɛ nɛ, 21 ɔ nta ko-iviyapɛtɔ kpai: ɔ sã vigbete tɔ̃vɨntɔ. 22 Ɔ yaa vikɔ̃linɛ ko-pi shɔpiya pɛlinɛtɔ.

23 Mɛnɛ Ɗalapa shɔgbeteu ãu ɔ̃nɛbiinyatɔ̃nɛ u pɔ̃ ɔrɛ ɔ ɔ̃ wɔsɔ-wɔsɔ ko-pi nyaba shɔpiya, mɛnɛu sãwɔ surubiitɔ, awɔ suruni, ruuvini ukɔ ɗii ɔ binɛ ãnɛ lee gbete Uɓeyelapa Yesɔ Kirisi yɛ a yɛ. 24 Shɔgbeteu ɓawɔnyayɛ yɛ pɛlitɔ aruviya u shɔ sisɨn ãnɛ.

25 N shɔbiiyi ɔ gakiu Ɗa jo.

26 Ɔ gee shɔ sisɨn ãnɛ nyatɔ kpai a nyageenɛ zɔ naa kɔ̃tinɛbii shɔ ɔ̃nɛbiinyatɔ̃nɛ.

27 N gakɔɔtɔ a Uɓeyelapa nii ɔ ɓali shɔ sisɨn ãnɛyi sẽkoomtɔ piti kpai.

28 Uɓeyelapa Yesɔ Kirisi tɔ̃vɨn shonɛ u ɔ̃ a ɔkɔɔni piti.