1 N kɔ Bulus n bee Sẽkoom yɛnɛ ɔ ɗɔbii. Sila a Timotini i a nyazɔ a nkɔni.

U dɔ̃ sẽkoom yɛnɛ shɔ sisɨn ãnɛyi a koomo Tasalonika i ɗɔbii, shɔ gbeteyi pɛ Ɗalapa Uɓeye a Uɓeyelapa Yesɔ Kirisi ɓɛɛyɛ:

2 Mɛnɛ Ɗalapa Uɓeye a Uɓeyelapa Yesɔ Kirisini i ãwɔ tɔ̃vɨn shonɛ a ɔ̃nɛbiinyatɔ̃nɛni

3 U shɔbiiyi ɔ̃tɛ kaka jazɨng akɔrɔ u dɔ̃ri Ɗalapa tɔ kopiɗaviya awɔ yuu. Pɛ vitɔ̃vɨng u pɛlitɔ nankɔ aruviya ɔ sisɨn ãnɛ a ɗɔ banɛ fɛ̃ɛm, a ɔrinɛ gbete kopiya awuni a zɔ yuu aɗɔ ɗekɨn fɛ̃ɛm. 4 Aruukɔ u au yuu u baasitɛ awɔ yuuni u geli shɔ sisɨn ãnɛyi a Ɗalapa bi kopiɗɔpiya. U baasi aru ɔ ɗekɨn yɛnɛ a sisɨnmɛɛnɛ a sisɨn ãnɛ a raatasinɛ a raaɓoonɛ gbete kpaayɛni kpai.

5 Vim kpai tasitɛ nɛ Ɗalapa yeeruu pɛ tɔ̃vɨn, aruumkɔ shɔ yɛ gaa wɔ atette shɔ gbete i kpaa tonɛtɔ a Ɗa ɗɔ kpati roonɛni, gbete ɔ ɓooraa au yuunimi. 6 Ɗalapa yɛ pɛli vigbete tɔ̃vɨn yɛtɔ: yɛ pɔ̃ shɔ gbeteyi pɔ̃wɔ raaɓoonɛ i ɓooraatɔ, 7 ama yɛ ãwɔ susunɛtɔ shɔ gbeteyi ɓooraayɛ a ukɔni. Yɛ pɛli vim aɗagbete Uɓeyelapa Yesɔ kɛ shɛnɛ a kolapa au Ɗajashonɛlapa pɛ̃nibayini, 8 Yɛ pɛlivishonɛ a yaa gbete a ɗɔɔ shaanɛ, u tasi gbeteyi bɛ̃ɛ̃ Ɗalapa nyagɨnnɛ raarɛ, a shɔ gbete i ji gɨn ruu tɔ̃vɨn ɓa ayuu Uɓeyelapa Yesɔni ɓa. 9 I yɛ ɓooraa lɛsinɛ gbete yisinya ɓayɛ dangdang, shɔ yɛ sẽyitɔ a Uɓeyelapa ɗekɨn au bassinɛ kakani, 10 A leegbete kaanɛ aru u shɔbiiyi bassiutɔ a bassinɛ gbete shɛ a shɔ sisɨn ãnɛyi naa kpai, a yɛ ɔ̃ ji ai tetteni, aruviya ɔ ãsisɨntɛ a ruu gbete u gelɔɔyɛni.

11 Aruukɔ u gaki wɔ Ɗalapa tɔ kopiɗaviya, u gaki wɔ Ɗalapa u pɔ̃wɔrɛ ɔ kpaa suru gbete ɓawɔnya au yuuniyɛtɔ. Mɛnɛ Ɗalapa u kaka u sɔ̃rinya vigbete ɔ kasiyɛ tɔ̃vɨntɔ kpai, wɔsɔ̃n ɔ yisinya ɔ vishonɛ sisɨn ãnɛtɔ kpai. 12 A nyabangkɔ Uɓeyelapa Yesɔ nii yɛ kpaa basinɛtɔ awɔ yuuni, ɔkɔɔma ɔ kpaa sɔ̃njo au ɗɔbii, nɔgbete Ɗalapa tɔ̃vɨn shonɛ ɔ̃yɛ a Uɓeyelapa Yesɔ Kirisi ɓɛɛni.