1 Sẽkoom shɛ a Yɔhana naa shɔpɛ̃ni sisɨn ãnɛ yɛnɛ suwɛrɛ gbete Ɗalapa lɔyɛ au jaayini, ang ɔrɔɔtɔ nizɛ, ɓa nkɔng ɔrɔɔrɛ sheeli ɓa, ama shɔgbete i zɛ ruu tɔ̃vɨn tɛ piti i ɔrɔɔtɔ. 2 N ɔrɔɔ aru tɔ̃vɨn gbete ang sisɨn ukɔ pɔ̃urɛ u ɔrɔɔrɛ, yɛ ɔ̃ sɔ̃ntɔ a ukɔni dangdang.

3 Mɛnɛ tɔ̃vɨn shonɛ, raantanɛ, a ɔ̃nɛbiinyatɔ̃nɛni au shɛ a Ɗalapa u Ɗa naa, a Yesɔ Kirisi Da ɓɛɛ jaa, u ɔ̃ u ɓɛɛkɔ a ɓuzɨn tɔ̃vɨn a ɔrinɛ.

4 N nta sisɨn purutɔ fɛ̃ɛm ang zɛrɛ gãsi mɛɛ jaayi ɔ̃ ɔ̃nɛ tɔ̃vɨn, nogbete Da ãsiunyayɛ. 5 Dɔdɔrim n gakaatɔ, n shɔ ɔrinɛ suwɛrɛː u piti u ɔri zɔtɔ. N ji ɓee ɓa nyaãsinɛ sɔɔ ɓa; ji nyaãsinɛ gbete au gaa ntanɛ a ɗekɨn yɛ. 6 Ɔrinɛ ukɔ ɔ̃rɛ pɛlinɛ vigbete Ɗalapa ãsinya nɛu pɛliyɛ. Nya-ãsinɛ gbete ɔ gaa ntanɛ a ɗekɨn, ukɔ ɔ̃rɛ ɔ ɔ̃ ɔ̃nɛ zɔ ɔrinɛ.

7 N sha vim aru shɔshɔɗakinɛyi waanɛ i sãtitɛ a kopiɗɔpiya a kotipi, shɔ gbeteyi kasi ɓa nɛ Yesɔ Kirisi a kotipi a bishɔzɛ ɓa. Zɔng shɔ ɗɔmiyi pɛ shɔshɔɗakinɛ a Kirisi shɔnɔpɔ̃. 8 Ɔ kɔyuutɔ, aru vishonɛ gbete ɔ pɛli Ɗalapa yɛ ɔ̃rɛ waatɛ, ama ɔ yɛ kpaa ɔ nazã tɔ kpai.

9 Shɔ gbete ji shi ɓa ayuu Kirisi vimatinɛ ɓa, ama kɛ pɔ̃ viwɔnɛ au yuuni, u Ɗalapa ɓa sisɨn ni ɓa. Shɔ gbete kɛ shinɛ jo ayuu Kirisi vimatinɛ sheeli, i yɛ ɓassiyuutɔ a Ɗalapa a ɓɛɛ jaani. 10 Naa shɔwɔɔ kaanɛ kɛ matinɛ viwɔɔ totti aa ɗɔbii, mɔkaa tɛunaanɛ aa wɛrɛni; mokaa geeunya nɛ, naa shɔ Ɗalapa gɨnnɛ. 11 Aruviya shɔ gbeteu kɛ geeyi nyanɛ, ɓassiyutɛ a vikɔ̃linɛ ayi pɛliyɛni.

12 N vi gbete n kasɔɔ gelinɛ aɗɔn fɛ̃ɛm, ama n ji kasɔɔ beerinɛ ɓa a sẽkoo ɓa; nɔgbete n si pɛli nam, n pɔ̃ a sisɨn n yɛn yɛwɔ ɗɔbiitɔ u nwanya u ɗɔgbete u zɛ zɔyɛ, aruviya u nta sisɨn puru kɛkn fɛ̃ɛm.

13 Mɛnau ɓɛɛ jaayi a Ɗalapa lɔyɛ i gee a nyatɛ.