1 A saa kopi atu nɛ̃ɛ̃ti au tɛyɛ n sɔɔ Urushalima a Barnaba ni, n tuu Titus a naani. 2 N yɛrɛ aru si Ɗa tasin tɛttɔ nɛn yɛnɛ, aɗɔ ɔ̃nɛ gbete u ɔ̃ a yupɛ̃niyini yɛ a ɗɔgoti, n tasiyidɔɔ ruu tɔ̃vɨn gbete n nwari shɔgbete i ɓa yahudawa ɓa yɛtɔ, n ji kasiɓa n vishonɛ gbete n pɛli akɨnti ko dɔdɔrim u lɛsirɛ ɓa. 3 N shɔ dɔranɛ Titus, ko u pɛ shɔ Helena shɔ ji yeeriu shaa ɓa a kakabi ɓa. 4 Shɔ gãsiyi i kasinɛ si ɔ̃ nankɔ, i tasi yuu naa shɔ sisɨn ãnɛyi Ɗabii, shɔmiyi i to u kɨn rɛ kali, aru i zɛ nyaba naranɛ gbete u awuni a ka Yesɔ Kirisi. I kasiu jafoo risinɛ, 5 Ama aru u kasirɛ u pɔ̃ ruu tɔ̃vɨn tɛpɛ- tɛpɛ awɔ yuu, u ji yasiyi nyaba ɓa ko jaafẽ.

6 Ama shɔgbete shɔ tuyi nɛi pɛ yupɛ̃niyi yɛ, n sha vim aru ang ɗɔbii i ɓa viwɔ ɓa; aruviya Ɗalapa yeeruu ɓa ayuu vigbete shɔzɛ nɔɔ zɛyɛ ɓa, yupɛ̃ni miyi i ji n ti visɔɔ ɓa ang ruuni ɓa. 7 A nyaba wɔɔ i zɛrɛ nɛ Ɗalapa ãng naa tɛttɔ n nwari shɔgbeteyi ɓa Yahudawa ɓa ruu tɔ̃vɨn, ji nagbete Ɗalapa ã Bituru naa u nwari Yahudawayi ruu tɔ̃vɨnyɛ. 8 A Ɗalapa kakakɔ n ɔ̃ shɔgbeteyi ɓa Yahudawa ɓa jashonɛ, ji naa gbete pɔ̃ Bituru ɔ̃ Yahudawayi jashonɛyɛ. 9 Yakub, Bituru a Yɔhanani shɔgbete shɔ zɛnaa ikɔyi yupɛ̃ni, i zɛrɛ nɛpɛ Ɗalapa ãng vishonɛ pɛ̃niɓamrɛ; Kɛɗɔn i tɛn naa kaziti a Barnaba ni gbete tasinɛ u pɛ gbete ayini, u matɛttɔ Barnaba a nkɔni u yɛ pɛli vishonɛ atette shɔgbeteyi ɓa Yahudawa ɓa, i pɛli sɔ̃njo a Yahudawayi tete. 10 Vigbete i piti kpai i kasiyɛ ukɔ ɔ̃rɛ ai kn u kpaasisɨntɔ a shɔraayi biini, shomji vigbete sin pɔ̃ a sisɨn a lee-lee n-tɛ n pɛliyɛ.

11 Ama naa Bituru a Antakiya tɛ, n lasiutɔ a shɔ nɔɔ aru vigbete pɛliyɛ ɓa tɔ̃vɨn ɓa. 12 Shɔgbete Yakub shoyiyɛ i ɓɛɛ anɛ a ɗɔuni, si Bituru shaalivitɛttɔ a shɔgbeteyi ãsisɨn Ɗabii ai ɓa Yahudawa ɓa ni. Ama akɨnti gbete shɔwiyi toyɛ, Bituru gɔ̃biirɛ nɛn shaavi tokɨn ɓa a shɔgbeteyi ɓa Yahudawa ni, aru ntaseti Yahudawa gbeteyi ãsisɨntɛ ayuu shaa yeenɛ yɛ. 13 Gãsi Yahudawa gbeteyi ã sisɨn a Ɗabii i ɗaki shɔ sɔ̃njo naa Bituru, a Barnaba ma gɨn sɔ̃njɔ nankɔ ai vikɔ̃linɛ shɔ ɗakinɛuni. 14 Naa n zɛtɛ i ji pɛli vishonɛ ɓa a nyaba tɔ̃vɨn gbete ruu tɔ̃vɨn shayɛni ɓa, n geli Bituru ai ɗekɨn piti kpai nɛ, <<Apɛ shɔ Yahudawa, ama a pɛli vi naa a ɓa Yahudawa ɓa, ɓa naa shɔ Yahudawayi ɓa. Kɛɗɔn aru ivi a kasinɛn pɔ̃ shɔgbeteyi ɓa Yahudawa ɓa i ɔ̃ naa Yahudawa viya?>>

15 U ɓɛɛ Yahudawayi a yeenɛ, u ɓa<<Shɔgbeteyi ɓa Yahudawa ɓa shɔruuviniyi,>> nagbete i ɓaayɛ. 16 U zɛ tɛttɔ shɔ ranaa ɓa a Ɗa ɗɔbiini ɓa see a nyaba sisɨn ãnɛkɔ sheeli a Yesɔ Kirisi bi, ɓa nyaba vigbete Musa nya-ãsinɛ shayɛ ɓa, ukoma u ã sisɨntɛ a Yesɔ Kirisi bi aru u kpaa naraanɛ a Ɗalapa ɗɔbii, a nya u sisɨn ãnɛ a Kirisi Yesɔ bi, ama ɓa vishonɛ gbete nya-ãsinɛ shayɛ ɓa, shɔwɔɔ yɛ kpaa naraanɛ ɓa a Ɗalapa ɗɔbii a nyaba vishonɛ gbete nya-ãsinɛ shayɛni ɓa. 17 Kɛɗɔn kɛ ɔ̃nɛ u kasirɛ u kpaa naraanɛ u ɔ̃ gbete a kirisini, shɔ kpaurɛ u pɛ shɔruuvini, naa shɔgbeteyi ɓa Yahudawa ɓa ɔ̃yɛ, shɔ tɔkɛnɛ Kirisi pɛli kɛ vishonɛ ruuvini ya? Ɓa nankɔ ɓa. 18 Ama nkɛ gaa nya-ãsinɛ gbete n sãti siyɛ sɔɔrinɛ nɛ, kɛɗɔn n tasin yuutɛ naa shɔgbeteu ka nya-ãsinɛyɛ. 19 Nagbete nya-ãsinɛ ɔ̃yɛ, n pɛ shɔ gbete vɔtɛttɔyɛ, nya-ãsinɛ nyonrɛ au yuu, aru n ɔ̃ a suruni a Ɗalapa ɗɔbii. Shɔ nyon tɛttɔ a Kirisini a gbete shɔ ɓaunalaayɛ. 20 Dɔdɔrim ɓa nkɔng shɔgbete u a suruni ɓa, ama pɛ Kirisi shɔgbete ang biiyɛ. N ɔ̃nɛ gbete n ɔ̃ dɔdɔrim yɛ, n ɔ̃ atette sisɨn ãnɛ a Ɗa jaabii, shɔgbete ɔrinyɛ a ãu suru ang yuu. 21 N ji bẽẽ Ɗa tɔ̃vɨn pɛlinɛ ɓa. Ama shɔkɛ pɔ̃ shɔnɛ u ɔ̃ a Ɗalapa kabii a nyaba nya-ãsinɛ, vim tasikɛtɛ nɛ Kirisi vɔnɛ ɓa viwɔɔ ɓaǃ