1 Ama dɔdɔrim n yɛ ɗekɨn a vigbete n sha siyɛ, jaa gbete yɛ shaa ɓɛyɛ vivɔyɛ, shɔ tasiu raa naa foo aɗagbete u doo jakasayɛ, a nɔgbete u ɓeye vipɛu ɓɛɛkɔ piti kpai. 2 Aɗagbete u si jakasayɛ, shɔwɔɔyi sidɔn gbete i kɔuyɛ ai kɔsiu vinaayɛ, yɛnɛ ɗagbete u ɓeye pɔ̃yɛ. 3 Ji nyabankɔ, u si jo nankɔ aɗagbete usi foo a suru gbete au shovi a kotipim, siu ji kpẽ ɓa a nyaba Ɗa gɨnnɛni ɓa. 4 Ama naa ɗagbete Ɗalapa pɔ̃rɛ pɛlitɛ, se Ɗalapa yɛ sho kɛ ɓɛɛ jaa. Ɓɛɛ jaa a naa javɔshɔ gbete soro yeeyɛ a ɔ̃ atette Musa nya-ãsinɛ, 5 aruviya u raa shɔgbeteyi a nya-ãsinɛ naa, nɔgbete u yɛ ɔ̃ kɛ Ɗalapa ɓɛjaayiyɛ.

6 U tasinɛ ɔ pɛ ɓɛɛ jaayi, Ɗalapa sho ɓɛɛ jaa suru au sisɨn, Ɗa suru gbete ɓaanya au sisɨn nɛ, <<Abba, Da!>> 7 Kɛɗɔn ɔ tokɨn foo ɓa ama ɔ pɛ Ɗa jaa. Nagbete ɔ pɛ ɓɛɛ jaa, Ɗalapa yɛ ãwɔ vigbete pɔ̃si ɓɛɛ jaayitɔ.

8 Akɨnti si ɔ ji zɛ Ɗalapa ɓa, aruukɔ ɔ si fooyi a vigbeteyi suru ɓa i ɗɔbii gbeteyi ɓa viwɔyi ɓa. 9 Ama dɔdɔrim gbete ɔ zɛ Ɗalapa tɛm, ko n shanɛ, dɔdɔrim gbete Ɗalapa zɛɔtɛm- ɔ yɛ sɔɔ kɨnti kɛpikovi nɛi gɨn vigbete ai suru ɓa ɗɔnɓa viya? Aru ivi ɔ kasi ɔ̃nɛ jafoo toti viya? 10 Ɔ pɔ̃ sisɨn ayuu leeyi, shɛlɛyi, ɗaayi a saayi. 11 N yɔriyuutɔ awɔ yuuni! Ɔ̃kɛtɛ n vishonɛ gbete n pɛli awɔ yuuyɛ weze ya?

12 N gakɔɔtɔ n shɔbiiyi ɔ ɔ̃ ji naa nkɔ. Aruviya n ji naa ɔkɔɔ, ɔ ji pɛlin vikɔ̃linɛ wɔɔ ɓa. 13 Ɔ kpaa sisɨntɔ a Ɗanyaruubii gbete n gaa wɔ nwarinɛ yɛ; si aru gbete n si vɔrɔyɛ. 14 Ama n ruu vɔrɔu si yukɔnɛ awɔ ɗɔbi ni, a shomni kpai ɔ ji bɛ̃ɛ̃m ɓa nɔɔni ɓa, ama ɔ tɛn naa kaziti naa Ɗajashonɛ wɔɔ gbete shɛ a kolapa yɛ; ɔ tɛn naa kaziti nagbete ɔ yɛ tɛ Kirisi Yesɔ yɛ. 15 Ɔ nta sisɨn purutɔ waanɛǃ Ivi ɗɔyɛnɛ viya? N ang yuu nsi shatɔ nɛ ɔ kuki nɔɔtɔ, naa ɔ si pɛlitɔyɛ, ɔ ãyirɛ a naa. 16 Dɔdɔrim n ɔ̃tɛ ɔ shɔnɔpɔ̃ a ruu tɔ̃vɨn gbete n gelɔɔyɛni ya?

17 Shɔwɔyi i tasɔɔ ɔrinɛtɔ pɛ̃niba awɔ yuuni, ama vigbete i kasɔɔ pɛlinɛyɛ ɓa tɔ̃vɨn ɓa. Vigbeteyi kasi pɛlinɛyɛ kpai nɛi vɔsɔtɔ a nkɔni, nɔgbete ɔ yɛ pɔ̃ sisɨn ai bi naa i pɔ̃sisɨn awɔ ɓɛɛyɛ. 18 Dɔdɔrim yɛ kɔritɔ ɔ vipɛlinɛ u ɔritɔ fɛ̃ɛm, kɛ ɔ̃nɛ a nyaba tɔ̃vɨnyɛ --shompɛ tɔ̃vɨn kopiɗaviya, ɓanɛ aɗagbete n a ɔkɔɔni sheeli ɓa. 19 Majaa ɔrinɛyiǃ ji naa gbete jaa ɓini nta kɔnɛ a ɗa jaa yeenɛ, n nta kɔnɛ jo nankɔ awɔ yuuni, yɛnɛ leegbete Kirisi ruubii ɔ̃ awɔ sisɨnyɛ. 20 Si tɔnɛn ɔ̃ n kasinɛ dɔdɔrim n si a nyazɔ a ɔkɔɔni, aruviya n si kɔsin sisɨntɔ awɔ yuuni. N yɔriyuu tɛttɔ awɔ yuuni waanɛ!

21 N hɨ ɔ pɛ pi kasinɛn gɨn Musa nya-ãsinɛ piyaː ɔ ji nta vigbete nya-ãsinɛ shayɛ ɓaya? 22 Nya-ãsinɛ shanɛ, Ibirayi u javɔshɔ aɗɔn ziti, gbete suu foo yeerɛ, awɔ kɛ su laajaa gbete u ɓa su foo ɓa. 23 Javɔshɔ gbete yee a su foo, shɔ yeeu jo nɔgbete shɔ yeejaayɛ, ama shɔgbete yee a su gbete u ɓa foo ɓau, shɔ yeeu ɓɛɛ nɔgbete Ɗalapa mayɛ. 24 Vim kpai shɔ pɛli ayuu vi ziti: su zitimiyi ukɔ ɔ̃rɛ ruumanɛ ziti. jaa gbete shɔ yeeyi jaa fooyɛ ukɔ ɔ̃rɛ Haga ɓɛɛ jaa. ikɔyi ɔ̃rɛ ruu gbete shɔ ma a kɔpɔ Sinayiyɛ. 25 Haga ukɔ ɔ̃rɛ a nɔɔ kɔpɔ sinayi a tipi Larabawa, ukɔ ɔ̃rɛ nɔɔ zɛnɛ a komoo Urashalima, i foo kɔ piti a ɓɛɛshɔzɛni kpai. 26 Ama Urushalima gbete u a lapa u ɓa foo ɓa, u pɛ u ɓini. 27 Aru Ɗanyaruubii shatɛttɔ nɛ,

<<Nta binyatɔ̃nɛtɔ su gbete a yeejaa ɓam!

Kanya lapa a sisɨn puru ntanɛni, shɔ gbete a ji ta yugboti ɓa shããɓam!

Aru su gbete shɔ ji wayuɓa au biini ɓa yɛ kpaa jaa waanɛ,

u tɛɛ su gbete ji vɔsi ɓa a ɓɛvɔni shããɓatɔ.>>

28 Dɔdɔrim n shɔbiiyi, ɔ pɛ Ɗalapa jaayi a ruumanɛ gbete mayɛ, naa gbete Ishayaku ɔ̃ siyɛ. 29 A ɗauni jaa gbete shɔ yee nɔgbete shɔ yeejaayɛ tasi shɔgbete shɔ yeeu a Ɗa suru raatɔ; dɔdɔrim ma ji nankɔ. 30 Ama Ɗanyaruubii shanɛ iviya? shanɛ, <<Yiki su foou kati a ɓɛɛ jaani; Aruviya su foou jaa yɛ vɔsi vivɔ ɓa a su laajaa jaani atette ɓeye vini ɓa.>> 31 Aru nankɔ n shɔbiiyi, u ɓa su foo jaayi ɓa, ama u ɓɛɛ su laajaa ɓɛɛ.