1 U ɔ̃nɛ u yuu aɗɔn, aruviya Kirisi rautɛttɔǃ Ɔ shi naa shɔ gbeteyi ɔ̃nɛ yuu aɗɔn, ɔkɔɔ yawɔ yuunɛ ɔ ɔ̃ sɔ̃n foo ɓa. 2 Weshopɛ! Nkɔ Bulus n gelɔɔtɛ ɔkɛ ãwɔ yuunɛ nɛ shɔu yeerɔɔ shaa, si ɔ̃kɛtɛ Kirisi ruubii ɓa viwɔ awɔ ɗɔbiini ɓa. 3 N gɔ̃wɔ yuusho sɔ̃n pɛ toti, shɔu kɛ yaanɛ nɛ shɔu yeerin shaatɔ, ɔ̃tɛ kaka jazɨng au kɔrɔ u gɨn Musa nya-ãsinɛtɔ piti kpai. 4 Ɔ shɔgbete ɔ kã naraanɛ a Ɗalapa ɗɔbii a nyaba Musa nya-ãsinɛ gɨnnɛ, ɔ vawɔ yuutɛ a Ɗalapa kabiini, ɔ ɓa tete shɔgbeteyi kpaa Ɗalapa tɔ̃vɨn shonɛni ɓa. 5 Ama au kabii, u sisɨnpɔ̃nɛ ukɔ ɔ̃rɛ u kpaa naraanɛ a Ɗalapa ɗɔbii; Ɗa Suru kaka gbete shovi au nyaba sisɨn ãnɛ ukɔ ɔ̃rɛ vigbete u gaa yɛkɔ. 6 Naa ukɛ ɓasiyunɛ a Kirisi Yesɔni, ko shaa yeenɛ ko ɓa shaa yeenɛ ɓa ji ɔ̃ɓa viwɔɔ ɓa; vitɔ̃vɨng gbete au yɔri shɔ yuuyɛ pɛ ukɔ ɔ̃rɛ sisɨn-ãnɛ Ɗabii au shovi atette ɔrinɛyɛ.

7 Si ɔ pɛli vitɔ̃vɨng! Pi zãrɔɔ vitɔ̃vɨng pɛlinɛ piya? Gɨn ɔ pi koviya? 8 Si ɓa Ɗalapa gbete au ɓawɔ nyayɛ vishonɛ ɓa. 9 Nagbete shɔ shayɛ nɛ,<<Ji vuru fɛ̃ɛ̃mkɔ pɔ̃ borodi rɛ u ɔ̃ pɛ̃niba.>> 10 Ama n bi dooɗɔ lakinɛ awɔ yuuni. U ɔ̃nɛ yuɓasinɛ au Uɓeyelapani ukɔ pɔ̃nrɛ n bilakirɛ aruviya ɔ yɛ kɔsi sisɨn ɓa, shɔgbete au kɛ tɔnɛn pɔ̃wɔ yukɔnɛ Ɗalapa yɛ gɔ̃u yushotɔ.

11 Ama n shɔbiiyi kɛ ɔ̃nɛ ang yuu, nkɛ ɔ̃nɛ aɗɔ ɗekɨn yɛnɛ a nyawaanɛ aru shaa yeenɛni, shɔ tasin raa sɔ̃n kɛpi aru iviya? Kɛ ɔ̃nɛ nizɛ, kɛɗɔn n Ɗanyaruubii waanɛ aru laa gbete shɔ ɓaa Kirisi naa ɗɔnyɛ yɛ n ti yukɔnɛ ɓa. 12 Ang kasinɛ shɔgbeteyi i tasɔɔ raayɛ i ɔ̃ ji nankɔ kpai; i yɛɗekn ai yuu boodorinɛǃ

13 Kɛ ɔ̃nɛ ɔkɔɔ n shɔbiiyi, Ɗalapa ɓawɔ nyatɛ ɔ ɔ̃ awɔ yuu. Ama ɔkɔɔ yawɔ ɔ̃nɛ yuunɛ u pɔ̃wɔrɛ ɔ pɛli vigbete ɔ kasi pɛlinɛyɛ. Ama ɔrinɛ u pɔ̃rɛ ɔ pɛli zɔ vitɔ. 14 Aruviya nya-ãsinɛu piti kpai nwanya ayuu vigbete nɛː <<A ɔraa shɔnyakãsiri nagbete a ɔraa yuuyɛ>> 15 Ama ɔkɛ pɛli vinɛ naa viɓiliyi, ɔ ɗɔ ɔ zɔ nɔrɔ ntarinɛ, ɔ ɗɔ zɔ lɛsinɛ, ɔ kɔyuutɔ, ɔ yɛ lɛsi zɔtɔ kpai.

16 Vigbete n shayɛ ukɔ shomː ɔ yaa Ɗa suru u tasɔɔ nyaba ɔ̃nɛ, Ɔ yɛ pɔ̃ ɗɔɔɓa vi kotipim u tesi shɔrɛ ɓa. 17 Aruviya vigbete shɔzɛ kasiyɛ, Ɗa suru kasi ɓa ukɔ ɓa, a vigbete Ɗa suru kasiyɛ shɔzɛ kasi ɓa ukɔ ɓa. Vi zitimiyi i ɔ̃kɛ shɔnɔpɔ̃ a zɔni, vim tasitɛ nɛ a yɛ zɛnɔɔ vigbete a kasi pɛlinɛyɛ ɗɔɔɓa. 18 Kɛ ɔ̃nɛ Ɗa surukɔ tesɔɔ ɗekɨn rɛ, kɛɗɔn Musa nya-ãsinɛ u kaka ɓa awɔ yuuni ɓa.

19 Shɔzɛ vipɛlinɛ ɓɛɛ ji a ɓili weze, tasiu yuutɔ a kpangtang pɛlinɛni, vikɔ̃linɛni, a fãrã kɔ̃linɛ hãnɛ; 20 a jaɗa bassinɛ a shɔgãyini. Shɔzɛyi i ɔ̃kɛ shɔnɔpɔ̃ a zɔni i waabarɛ; i kaagɨn a zɔni, i lɛsi sisɨnrɛ, a yuu ɔrinɛni. I vɔsi yuu kɛ a dɔlaa-dɔlaa a kɨ̃nkɨ̃n; 21 i yɔri yuutɔ, visiutɔ, a nyamokinɛ, a gãsi viwɔyini. N gɔ̃wɔ yushotɛ dɔdɔrim nagbete n gɔ̃wɔ siyɛː Shɔgbeteyi pɛli vim piti kpai i yɛ kpaa Ɗalapa kpati roonɛ ɓa.

22 Ama Ɗa suru n ti ɓɛɛ ɔrinɛ, sisɨn puru ntanɛ, ɔ̃nɛbiinyatɔ̃nɛ, sisɨnmɛɛnɛ, tɔ̃vɨn pɛlinɛ, vitɔ̃vɨng, vipɛlinɛ a sisɨn gbete, 23 yuroorinɛ, a yuu sãnɛ. Nya-ãsinɛ wɔɔ ji zãri vimiyi ɓa. 24 Shɔ gbeteyi pɛ Kirisi Yesɔ ɓɛɛ yɛ, i nyo shɔzɛ vipɛlinɛ kotipitɛ gboti ai vikasinɛni. 25 Ɗa Suru ãu surutɛ; yɛ ɔ̃riu kaka jazɨng akɔrɔ u kɔu surutɔ. 26 Ɔ̃tɛ kaka jazɨng akɔrɔ u baasinɛ ɓa, ukɔu ɗasi zɔnɛ ko u kagɨnnɛ a zɔni.