1 Akɨnti gbete Yesɔ yisinya vim shanɛtɛ, a ɗenɔɔ a kolapa a shanɛ, <<Maye, ɗaa pɛlitɛ ã mɛjaau bassinɛ nɛ, nɔgbete mɛjaau yɛ ãa basinɛ sɔ̃njoyɛ. 2 Aru a ãu kaka tɛttɔ a shɔzɛ yuu kpai a koo, nɛu ã shɔgbete a ãuyɛ suru gbete sɔ̃nya ɓa piti kpai. 3 Suru gbete yisi ɓa ukɔ ɔ̃rɛ shɔu zɛattɔ, makaa Ɗalapa nizɛ gbete sheeli, a shɔu zɛ Yesɔ kirisi gbete a shouyɛ. 4 N tasaa shɔ a bassinɛ tɛttɔ a kootipini; N yisinya vishonɛ gbete a ãng nɛn pɛliyɛ tɛttɔ. 5 Mayeǃ Ãng bassinɛ pɛ aa ɗekɨn dɔdɔrim, bassinɛ gbete n a wuniyɛ aa ɗekɨn gbete si a ji pɛli koo pɛ̃nɛ̃ba.

6 <<N pɔ̃tɛ shɔgbete a ãng yɛ a koo i zɛa niitɛ. i pɛ a ɓɛɛkɔ, ama a ãng itɛ, i gɨn a nya-ãsinɛtɛ, 7 ama dɔdɔrim i zɛ tɛttɔ ko-iviya gbete a ãng yɛ shɛjo aa ɗɔbii kɔ. 8 Ruu gbete a ãng yɛ nɛn geliyitɔ, n geliyitɛ i tɛ tɛ̀; i zɛ dɔdɔrim tɛ nizɛ nɛ n shɛpɛ aa ɗɔbii, i ã-sisɨn tɛttɔ nɛ pɛ mokɔ shonrɛ.

9 <<N gaki Ɗa ai yuu, n ji gaki Ɗa ɓa aru shɔ kootipiyi i yuu ɓa ama aru shɔgbete a ãng yɛ, aru gbete i pɛ a ɓɛɛ yɛ. 10 Vigbete n a wuniyɛ kpai pɛ a ɓɛɛ, a vigbete a wuniyɛ kpai pɛ n ɓɛɛ; aru n bassinɛ yɛ tasijo ai kabiikɔ. 11 Dɔdɔrim n kaanɛ a ɗɔbi; n toti a kootipini ɓa, ama i ɓɛɛ a kootipi. Maye wɔsɔ-wɔsɔǃ kɔitɔ a kaka gbete aa nii yɛ, nii gbete a ãng yɛ, a nɔgbete i yɛ ɔ̃ gbete naa nkɔ a mokɔni yɛ. 12 Aɗagbete n si a yini yɛ, n kɔitɔ a kaka gbete shɛ aa nii yɛ, nii gbete a ãng yɛ, n kɔitɔ ko shɔzɛ gbete ai tete ji nii ɓa see shɔgbete shɔ yeeurɛ jaa lɛsinɛkɔ nwaani aru u yisinya vigbete janyagadi I shayɛ u ɔ̃ nizɛ. 13 Dɔdɔrim n kaanɛ aa ɗɔbii, n sha vim a koo nɔgbete i yɛ nta yɛti puru a nkɔni a vigbete i pɛliyɛ ni kpai. 14 N geliyi a nyaruubii tɛ, shɔ kootipiyi i bɛ̃ɛ̃yi ruubii tɔ, aru gbete i ɓa shɔ kotipiyi ɓa, ji naa nɔgbete n ɓa shɔ kootipi ɓa. 15 N ji gakaa ɓanɛ a tuuyitɔ a kotipi ni ɓa, ama n gaki rɛ a kɔyitɔ aru shɔnɔpɔ̃ i yɛ lɛsiyirɛ. 16 Ji nɔgbete n ɓa shɔ kootipi ɓa, ikɔma i ɓa shɔ kootipi ɓa. 17 Tɔ̃riyitɔ i ɔ̃ a ɓɛɛ aru gbete a ruu pɛ nizɛ; 18 N shoyi a koo, ji nɔgbete a shon a koo yɛ. 19 Jo ai yuukɔ n ãng yuurɛ, nɔgbete ikɔma i yɛ ã yuu sɔ̃njo aa ɗɔbiini.

20 <<N ji gaki ɓa ai yuukɔ sheeli ɓa, ama sɔ̃njo a shɔgbete i ãsisɨn ang biiyɛ aru gbete i shayɛ. 21 N gaki rɛ i piti kpai i ɔ̃ gbete. Mayeǃ Mɛnɛ i ɔ̃ au sisɨn naa gbete u a mokɔniyɛ, ji nagbete a ang yɛti, n kɔma n sɔ̃njo aa yɛti. I ɔ̃jo nankɔ nɔgbete shɔ kootipi iyɛ ã sisɨn nɛ, mɔkɔ shonrɛ. 22 N ãi jo bassinɛ gbete a ãyɛ kɔ, nɔgbete i yɛ ɔ̃ gbete, naa nkɔ a mokɔni u gbete yɛː 23 N ai sisɨn, mokɔma a sɔ̃njo ang sisɨn, nɔgbete i yɛ ɔ̃ gbete piti kpai, aru gbete shɔ kootipi i yɛ zɛnɛ mɔkɔ shonrɛ nɛn ɔriyitɔ nagbete a ɔrinyɛ.

24 <<Mayeǃ A ãng i tɛttɔ a naa, ama n kasirɛ i ɔ̃ a ɗɔgbete n a ɗɔnniyɛ, nɔgbete i zɛn basinɛ yɛ, basinɛ gbete a ãyɛ; Aru a tasin ɔrinɛ tɛttɔ si a ji pɛli koo pɛ ɓa. 25 Mayeǃ Shɔ tɔ̃vɨn, shɔ kootipi i ji zɛa nii ɓa, ama n zɛa ɓɛɛtɛ, aru a jaɗɔɔyi i zɛ tɛttɔ nɛ pɛ mɔkɔ shongrɛ. 26 N pɔ̃yirɛ i zɛa niitɛ, n yɛn yɛ ɗekɨn a pɛlinɛni nankɔ, aru ɔrinɛ gbete a tasin yɛ u ɔ̃ sɔ̃njo ai sisɨnni, a nɔgbete n yɛn ɔ̃ sɔ̃njo ai sisɨnni.>>