1 Akɨnti gbete naa Yesɔ gaki Ɗa tɛ nam, kɛɗɔn Yesɔ au jaɗɔyini i yaa ɗɔu i yɛkɛ ɗɔɔ wɔ gbete shɔ ɓaanɛ Kidoro Boroki. Si jaa wɔɔ ɗɔuni, Yesɔ au jaɗɔɔyini i to ɓuzɨn jaaurɛ i ɔ̃ ɗɔuni. 2 Yahuza gbete mɛli Yesɔ yɛ ukɔma zɛ ɗɔu tɛttɔ, aru kopiɗaviya Yesɔ au jaɗɔɔyini i kpɛsi zɔɔ a ɗɔukɔ. 3 Kɛɗɔn Yahuza yɛ dɔjau, tuu kɨǹ soja Romayi a gãsi shɔ wɛrɛ Ɗa ganɛyini, yupɛ̃ni shɔlansiyi a Farasiyayi shorɛ; i sãli layaa a pitila wɔsɔ̃n toshiyi a naa. 4 Yesɔ shɔu, zɛ vigbete yɛ kpauyɛ tɛttɔ, kɛɗɔn shɛ a ɗekɨn a hɨyinɛ, <<Ɔ kã pi ɗɔ piya? >>

5 Shɔwiyi kasi Yesɔ nyanɛ, <<Yesɔ shɔ nazara.>>

Yesɔ shanɛ,<< n pɛ ukɔ.>>

Yahuza gbete mɛli Yesɔ yɛ u si jo a ɗɔɔ shinɛ a ɗɔukɔ. 6 Naa Yesɔ geliyitɛ, <<pɛ nkɔ,>> kɛɗɔn i sɔɔ akɨnti ai wẽsirɛ tipi. 7 Toti Yɛsɔ hɨyinɛ, <<Ɔ kã pi ɗɔ piya?>>

I shanɛ,<< Yɛsɔ shɔ Nazara.>>

8 Yɛsɔ kasinyanɛ,<<N gelɔɔ tɛttɔ n-tɛ n pɛ ukɔ. Naa ɔkɛ kãnɛ nkɔ, ɔ yaa shɔmi yinɛ i yɛrɛ.>> 9 Yesɔ sha vim nankɔ aru vigbete shayɛ u ɔ̃ nizɛː << Maye, atette shɔ gbeteyi a ãng yɛ n jo lɔkiyi ɓa gbete ni ɓa.>> 10 Siman Bituru, u si zaali naa zɔ̃rɛ a ko yupɛ̃ni shɔlansi wɛrɛ Ɗa u foo yusho shɔ nakɨn. Foou nii nɛ Makus. 11 Yesɔ geli Bituru nɛ, <<Sɔraa zaali nɛ au ɗɔ ɔ̃nɛǃ A ji zɛ ɓa nɛ ɔrintɛ kaka jazɨng akɔrɔ n ɓoraatɔ a kɔpi gbete maye ãyɛ ɓa ya?>>

12 Kɛɗɔn soja Roma ai yupɛ̃niyi ni wɔsɔ̃n yupɛ̃ni Yahudawayi i sã Yesɔ rɛ, 13 i gau n tinɛ pɛ Anasi ɗekɨn. Ukɔ pɛ Kayafa ɓɛso ɓeye, Kayafa ukɔ ɔ̃rɛ yupɛ̃ni shɔlansi wɛrɛ Ɗa a saa uni. 14 Si ji kayafa kɔ geli yupɛ̃ni Yahudawayi nɛ, kɔritɔ shɔzɛ gbete u vɔrɛ aru u raa shɔzɛ gãsi kpai.

15 Siman Bituru a Yesɔ jaɗɔɔ wɔ i gɨn Yesɔrɛ. Si yupɛ̃ni shɔlansi wɛrɛ Ɗa zɛ Yesɔ jaɗɔɔu tɛttɔ, kɛɗɔn Bituru a Yesɔ jaɗɔɔuni i gɨn Yesɔ yɛnɛ yupɛ̃ni shɔlansi a wɛrɛ Ɗa yɛti wɛrɛ. 16 Ama Bituru shi a nyaba wɛrɛ a kaɓili. Kɛɗɔn Yesɔ jaɗɔɔ wɔɔu shɛrɛ a nwanya a nyaba wɛrɛ a jasu wɔɔni i tosi Bituru ɓuzɨnrɛ. 17 Jasuu gbete a nyaba wɛrɛ hɨ Bituru nɛ, <<Naa a ji ɓuzɨn jaam u jadɔɔyi kɔ viya?>> Bituru kasi nyanɛ<<Ɓa, ɓang nkɔ ɓa,>>

18 Si a ɗaa sɔrɔɔ, kɛɗɔn jawɛrɛyi a shɔ ɗɔganɛyi i wu yaa i ɗɔgbete i shili ɗɔuniyɛ, i ɗɔɔ sɔrɔɔ bàànɛ. A Bituru yɛ sɔ̃njo shi ayini a nyazɔ aɗɔ sɔrɔɔ bàànɛ ni.

19 Yupɛ̃ni Shɔlansi a wɛrɛ Ɗa hɨli Yesɔ ruu ayuu u jaɗɔɔyi wɔsɔ̃n u vimatinɛ. 20 Yesɔ kasinyanɛ, <<Ko-pi lee piya n nwanya a shɔ shoo piti kpai; n vimatinɛ piti n pɛli a Yahudawayi ɗɔ ɔ̃nɛ wɔsɔ̃n a wɛrɛ Ɗa, a ɗɔgbete kopiya kpai i toli a ɗɔzɔɔ, n ji mati shɔvi jo a ɗɔ ɓusinɛni shãã ɓa. 21 Ɔ hɨlin ruukɛ aru iviya? Ɔ hɨli ruujo shɔ gbete i wesho ang vi gbete n shayɛ. Ɔ hɨyi ruu gbete ang geliyɛ pɛ, i zɛ vigbete ang sha tɛttɔ.>> 22 Naa Yesɔ sha vimtɛ, shɔzɛ gbete atette shɔ ɗɔganɛ wa Yesɔ naa a nya a shanɛ,<< A kasi yupɛ̃ni nya nan ka!>> 23 Yesɔ kasiunya nɛ, <<N kɛ sha vikɔ̃linɛ wɔnɛ, geli shɔvi gbete ang shayɛnɛ aɗɔm kpai. Ama vi n shayɛ kɛ ɔ̃nɛ tɔ̃vɨn a wankɛ ruu iviya?>> 24 Kɛɗɔn Anasi sɔriu Kayafa yupɛ̃ni a wɛrɛ Ɗa ɗɔbiirɛ.

25 Si Bituru u doo ɗɔɔ yaa wɔɔnɛ. Kɛɗɔn shɔwɔyi i geliunɛ, <<Ɓa mokaa jaam jadɔɔ gbete wɔɔ ɓaya?>>

Ama Bituru masinyaɗɔn. A shanɛ,<<N ɓa ɓuzɨn ni ɓa,>> 26 Shɔzɛ gbete atette yupɛ̃ni shɔlansi a wɛrɛ Ɗa u foo, pɛ shɔgbete Bituru kɔu yusho u shɔbii, ukɔ nwanya, a hɨnɛ,<<N ji ɓa mɔkɔ awuni a jaa ɓaya?>>

27 Bituru kasinya sɔ̃nɛ, <<Ɓa>>Tɛ̃ɛ̃ti kpasi kɔ̃ ɓanyarɛ.

28 A gadi zɨɨnkɔ shɔ shɛshi Yesɔ rɛ a Kayafa wɛrɛ yɛnɛ gɔmna jaa ruunwanɛ. Ama yupɛ̃ni Yahudawayi i ji to ɓuzɨn jaa ruunwanɛu ɓa, aru nɛi yɛ ɔ̃rɛ ɓa wɔsɔ-wɔsɔ ɓa a Ɗa ɗekɨn, i kpaa nyaba vishaanɛ yumusinɛ tɛnɛda shaanɛ ɓa. 29 Kɛɗɔn Bilatu shɛ ɓili ai ɗɔbii a hɨyinɛ, <<Ɔ wili jaam pi ru-iviya?>>

30 I kasiuyanɛ, <<U si ɓa shɔ ruuvini ɓa u si ji n-tiu ɓa aa ɗekɨn niɓa.>>

31 Kɛɗɔn Bilatu geliyi nɛ, << Ɔ yɛnɛ ɔ yuu ɔ hɨliu ruurɛ nɔgbete ɔ nya-ãsinɛ shayɛ.>>

I kasinya nɛ, <<Shɔ ji yasiu nyaba ɓa nɛu nyo shɔwɔ vɔrɔ ɓa.>> 32 Vim pɛli nankɔ aru u yisinya vigbete Yesɔ shayɛ ama sha vim u tasi nɔgbete yɛ vɔyɛ.

33 Bilatu sɔɔ yɛti wɛrɛ a ɓa Yesɔ nya a hɨunɛ, <<Mokɔ ɔ̃rɛ kpati Yahudawa ya?>>

34 Yesɔ kasinyanɛ, <<Mɔkɔ sha vim ji ya? ko shɔ wɔɔyi i gelaarɛ ya?>> 35 Bilatu kasinyanɛ, <<A tuu a sisɨn nɛn shɔ Yahudawa ya? Pɛjo a shɔbiiyikɔ a yupɛ̃ni shɔlansi a wɛrɛ Ɗa ikɔi n taarɛ ang ɗɔbiini. A pɛliyi iviya?>>

36 Yesɔ geli Bilatu nɛ, << N kpati roonɛ ɓa shɔ kootipimkɔ ɓa; n kpati roonɛ si tɔnɛn ɔ̃ shɔ kootipimkɔ, n jadɔɔyi si yɛ waabatɔ nɛ shɔu n ting ɓa a yupɛ̃ni Yahudawa ɗekɨn ni ɓa. N kpati roonɛ ɓa shɔ kootipimkɔ ɓa!>>

37 Kɛɗɔn Bilatu hɨunɛ, <<Akɛ kpati ya?>>

Yesɔ kasinyanɛ, <<Mɔkɔ sharɛ nɛn kpati. Shɔ yeenrɛ n a kootipim ji a rumkɔ, aru nɛn nwanya ayuu vi tɔ̃vɨn. Shɔgbete kɛ ã tɔ̃vɨn nɛ weshotɔ ang nyani.>>

38 Bilatu hɨunɛ <<Shɔ ɓaa tɔ̃vɨn ɓɛɛ iviya?>>

Kɛɗɔn Bilatu sɔɔ shɔwiyi ɗɔbii a ɓili gelinɛ, <<N ji kpaa jam ɓa a ruukɔ̃linɛ wɔɔni ɓa, gbete yɛtɛ nɔgbete shɔ nyou vɔrɔ yɛ ɓa. 39 Ama ji nagbete ɔ nakoo sãyɛ, n yasɔɔ shɔzɛ gbete naa a ɗaa yumusinɛ tɛnɛɗa, ɔ kasinɛn yasɔɔ kpati Yahudawam naa ya?>>

40 I kasinya a gãgãni, i shanɛ,<<Ɓa ukɔ ɓaǃ U kasi a yasiu Barnaba naaǃ>> (Barnaba u si shɔnyaba zɛ̃nɛ.)