Salmos 127

Pagdayaw sa Kaayo sang Dios

Ang kanta samtang nagapasaka. Ginsulat ni Solomon.

1 Kon wala ang bulig sang Ginoo,

wala sing pulos ang pagpatindog sang balay ukon ang pagbantay sang siyudad,

2 kag wala man sing pulos ang pagbugtaw sing aga pa

kag ang pagtulog sing gab-i na sa pagtrabaho para may makaon.

Kay ang Ginoo amo ang nagahatag sang mga kinahanglanon sang iya mga ginahigugma,

bisan pa nga nagakatulog sila.

3 Ang mga anak grasya kag regalo halin sa Ginoo.

4 Ang mga anak nga natawo sang bataon pa ang ila amay

pareho sang mga pana sa kamot sang isa ka soldado.*127:4 Ang buot silingon, bintaha para sa amay nga may mga kabataan siya sang bataon pa siya sang sa tigulang na siya.

5 Bulahan ang tawo nga may madamo nga anak,*127:5 anak: sa literal, pana

kay mabuligan siya kon mag-atubangay sila sang iya mga kaaway sa hukmanan.