Salmos 8

Daw Ano Kahalangdon ang Dios sa Bug-os nga Kalibutan

Ang kanta nga ginsulat ni David. Sa direktor sang mga manugkanta: Gamita ang "gittith."*8:0 gittith: Posible isa ini ka instrumento o tuno.

1 Ginoo nga amon Agalon,

daw ano ka kahalangdon sa bilog nga kalibutan!

Ang pagdayaw sa imo sang mga tawo mabatian mo dira sa langit.*8:1 Ang pagdayaw…langit: Indi klaro ang buot silingon sini sa Hebreo.

2 Bisan gani ang magagmay nga mga bata

gintudluan mo nga magdayaw sa imo,

para mahuy-an ang imo mga kaaway,

ang mga kontra nga buot magbalos.

3 Kon magtan-aw ako sa langit nga imo ginhimo,

kag makita ko ang bulan kag ang mga bituon

nga imo ginbutang sa ila nahamtangan,

4 nagapamangkot ako kon ano gid bala ang tawo nga ginadumdom mo gid.

Ahaw tawo man lang siya, ngaa ginakabalak-an mo gid?

5 Ginhimo mo siya nga mas manubo sang sa mga anghel,*8:5 mga anghel: ukon, Dios

pero ginpadunggan mo siya pareho sa hari.

6 Ginhimo mo siya nga manugdumala sang imo mga tinuga;

ginpasakop mo sa iya ini tanan nga butang,

7 lakip na diri ang tanan nga sapat:

ang nagalakat, 8 ang nagalupad, kag ang nagalangoy.

9 Ginoo nga amon Agalon,

daw ano ka kahalangdon sa bilog nga kalibutan!