1 हे इस्राएलियों, यो वचन सुनो जो यहोवा न तुम्हरो बारे म मतलब ऊ पूरो कुल को बारे म कह्यो हय जेख मय न मिस्र देश सी लायो हय: 2 "धरती को पूरो कुलों म सी मय न केवल तुम पर मन लगायो हय, यो वजह मय तुम्हरो पूरो अपराधों की सजा देऊं।

3 "यदि दोय आदमी पहले सी सहमत नहीं होयेंन; त का हि एक संग चल सकेंन? 4 का सिंह बिना शिकार पाये जंगल म गरजेंन? का जवान सिंह बिना कुछ पकड़े अपनो गुफा म सी गुर्रायेंन? 5 का चिड़िया बिना फन्दा लगायो फसेंन? का बिना कुछ फंसे फन्दा जमीन पर सी उचकेंन? 6 का कोयी नगर म नरसिंगा फूंकन पर लोग नहीं थरथरायेंन? का यहोवा को बिना भेज्यो कोयी नगर म कोयी विपत्ति पड़ेंन? 7 योच तरह सी प्रभु यहोवा अपनो दास भविष्यक्ताओं पर अपनो भेद बिना प्रगट करयो कुछ भी नहीं करेंन। 8 सिंह गरज्यो; कौन नहीं डरेंन? परमेश्वर यहोवा बोल्यो; कौन हय जो भविष्यवानी हय जो नहीं करेंन?"

9 अशदोद को किल्ला अऊर मिस्र देश को राजकिल्ला पर प्रचार कर क् कहो: "सामरिया को पहाड़ियों पर जमा होय क देखो कि ओको म का बड़ो हल्ला अऊर ओको बीच का अत्याचार को काम होय रह्यो हय!"

10 यहोवा यो कह्य हय, "जो लोग अपनो किल्लावों म उपद्रव अऊर लुट को धन जमा रखय हय, हि सीधो काम करनो जानयच नहाय।" 11 यो वजह परमेश्वर यहोवा यो कह्य हय: "देश ख घेरन वालो एक दुश्मन होयेंन, अऊर ऊ तोरी ताकत तोड़ेंन, अऊर तोरो किल्ला लूट्यो जायेंन।"

12 यहोवा यो कह्य हय : "जो तरह चरवाहा सिंह को मुंह सी दोय टांग यां कान को एक टुकड़ा छुड़ावय हय, वसोच इस्राएली लोग, जो सामरिया म बिस्तर को एक कोना यां रेशमी गद्दी पर बैठ्यो करय हय, हि भी छुड़ायो जायेंन।" 13 सेनावों को परमेश्वर, प्रभु यहोवा की या वानी आय, "देखो, अऊर याकूब को घराना को खिलाफ गवाही देवो: 14 ✝जो समय मय इस्राएल ख ओको अपराधों की सजा देऊं, उच समय मय बेतेल की वेदियों ख भी सजा देऊं, अऊर वेदी को सींग टूट क जमीन पर गिर जायेंन। 15 मय जाड़ो को घर ख अऊर धूपकाल को घर, दोयी ख गिराऊं; अऊर हत्तीदांत को बन्यो घर भी नाश होयेंन, अऊर बड़ो बड़ो घर नाश होय जायेंन, यहोवा न यो कह्यो हय।