आमोस 7

विनाश को तीन दर्शन

फाफा

1 परमेश्वर यहोवा न मोख यो दिखायो अऊर मय का देखू हय कि ओन पिछलो घास को उगन को सुरूवात म फाफा पैदा करयो; अऊर ऊ राजा की फसल कटनी को बाद की घास होती। 2 जब हि जमीन को पूरो घास खाय चुक्यो, तब मय न कह्यो, "हे परमेश्वर यहोवा, माफ कर! नहीं त याकूब कसो स्थिर रह सकेंन? ऊ कितनो कमजोर हय!" 3 येको बारे म यहोवा न अपनो मन बदल्यो, अऊर ओन कह्यो, "असी बात अब नहीं होयेंन।"

आगी को दर्शन

4 परमेश्वर यहोवा न मोख यो दिखायो अऊर का देखू हय कि परमेश्वर यहोवा न आगी को द्वारा न्याय करन लायी पुकारयो, अऊर वा आगी सी महासागर सूख गयो, अऊर जमीन भी भस्म होन लगी होती। 5 तब मय न कह्यो, हे परमेश्वर यहोवा, सजा देनो रोक दे! नहीं त याकूब कसो स्थिर रह सकेंन? ऊ कसो कमजोर हय। 6 येको बारे म भी यहोवा न अपनो मन बदल्यो; अऊर परमेश्वर यहोवा न कह्यो, "असी बात फिर नहीं होयेंन।"

गोला

7 ओन मोख यो भी दिखायो मय न देख्यो कि प्रभु गोला लगाय क बनायी हुयी कोयी दीवाल पर खड़ो हय, अऊर ओको हाथ म गोला आय। 8 यहोवा न मोरो सी कह्यो, "हे आमोस, तोख का दिख पड़य हय?" मय न कह्यो, "एक गोला।" तब परमेश्वर न कह्यो, "देख, मय अपनी प्रजा इस्राएल को बीच म गोला लगाऊं, अब मय उन्ख नहीं छोड़ूं। 9 इसहाक को ऊंची जागा उजाड़ देऊं, अऊर इस्राएल को पवित्र जागा खण्डर होय जायेंन, अऊर मय यारोबाम को घराना पर तलवार लियो हुयो चढ़ायी करूं।"

आमोस अऊर अमस्याह

10 तब बेतेल को याजक अमस्याह न इस्राएल को राजा यारोबाम को जवर बुलावा भेज्यो, "आमोस न इस्राएल को घराना को बीच म तोरो सी षड़यन्त्र की योजना बनायी हय; ओको पूरो वचनों ख देश नहीं सह सकय। 11 कहालीकि आमोस यो कह्य हय, ‘यारोबाम तलवार सी मारयो जायेंन, अऊर इस्राएल को लोगों ख गुलामी बनाय क अपनो देश सी निकाल्यो जायेंन।’" 12 तब अमस्याह न आमोस सी कह्यो, हे दर्शन देखन वालो, यहां सी निकल क यहूदा देश म भग जा, अऊर वहांच रोटी खायो कर, अऊर वहांच भविष्यवानी कर; 13 पर बेतेल म फिर कभी भविष्यवानी मत कर, कहालीकि यो राजा को पवित्र जागा अऊर राज-गढ़ आय। 14 आमोस न उत्तर दे क अमस्याह सी कह्यो, मय नहीं त भविष्यवक्ता होतो, अऊर नहीं भविष्यवक्ता को टुरा; मय त जनावर चरावन वालो, अऊर उम्बर को झाड़ों को छांटन वालो होतो, 15 अऊर यहोवा न मोख मेंढी-शेरीयों को पीछू पीछु फिरन सी बुलाय क कह्यो, जा, मोरी प्रजा इस्राएल सी भविष्यवानी कर। 16 येकोलायी अब तय यहोवा को वचन सुन, तय कह्य हय, इस्राएल को खिलाफ भविष्यवानी मत कर; अऊर इसहाक को घराना को खिलाफ बार बार वचन मत सुनाव। 17 यो वजह यहोवा यो कह्य हय: "तोरी पत्नि नगर म वेश्या होय जायेंन, अऊर तोरो बेटा-बेटियां तलवार सी मारी जायेंन। अऊर तोरी जमीन दोरी सी माप क बांट लियो जायेंन, अऊर तय खुद अशुद्ध देश म मरजो। अऊर इस्राएल अपनो देश सी गुलाम बनाय क निकाल्यो जायेंन।"