Êxodo 2

मूसा को जनम

1 लेवी को घरानो को एक आदमी न एक लेवी वंश की बाई सी बिहाव कर लियो। 2 ✝2:2 प्रेरितों ७:२०; इब्रानियों ११:२३ वा बाई गर्भवती भयी अऊर ओको एक बेटा पैदा भयो; अऊर यो देख क कि यो बच्चा सुन्दर हय, ओन ओख तीन महीना तक लूकाय क रख्यो। 3 जब वा ओख अऊर लूकाय नहीं सकी तब ओको लायी सरकंडों की एक टोकनी ले क ओको पर डामर को लेप लगायी, अऊर ओको म बच्चा ख रख क नील नदी को किनार पर लम्बी घास को बीच म रख दी। 4 ऊ बच्चा की बहिन यो देखन लायी कुछ दूर खड़ी होती कि ओको संग का होवय हय।

5 तब फिरौन की बेटी आंग धोवन लायी नदी को किनार पर आयी। ओकी दासियां नील नदी को किनार पर घुमत होती। अचानक फिरौन की बेटी न ऊचो घास म टोकनी ख देख क अपनी सेविका ख ओख लावन लायी भेज्यो। 6 जब ओन ओख खोल्यो त देख्यो कि एक बच्चा हय, जो रोय रह्य हय, तब ओको पर दया आयी अऊर ओन कह्यो, "यो त कोयी इब्रियों को बच्चा आय।" 7 तब बच्चा की बहिन न फिरौन की बेटी सी कह्यो, "का मय जा क इब्री बाईयों म सी कोयी बाई ख बुलाय क ले आऊं, जो तोरो लायी बच्चा ख दूध पिलायो करेंन?" 8 फिरौन की बेटी न कह्यो, "जावो।" तब टुरी जाय क बच्चा की माय ख बुलाय क आयी। 9 फिरौन की बेटी न ओको सी कह्यो, "तय यो बच्चा ख लिजाय क मोरो लायी दूध पिलायो कर, अऊर मय तोख मजूरी देऊं।" तब वा बाई बच्चा ख लिजाय क दूध पिलान लगी। 10 ✝2:10 प्रेरितों ७:२१जब बच्चा थोड़ो बड़ो भयो तब कुछ समय को बाद ओख फिरौन राजा की बेटी को जवर ले गयी, अऊर ओन बच्चा ख अपनो टुरा मान लियो; अऊर ओन यो कह्य क ओको नाम मूसा रख्यो, "मय न येख पानी सी निकाल्यो होतो।"

मूसा मिद्यान देश ख भग जानो

11 ✝ 2:11 इब्रानियों ११:२४; प्रेरितों ७:२३-२८ जब मूसा बड़ो भयो, तब उन दिनों म ऊ बाहेर अपनो भाऊ-बन्धुवों को जवर जाय क उन्को दु:खों पर नजर रखन लग्यो; तब ओन देख्यो कि एक मिस्री आदमी ओको एक इब्री भाऊ ख मार रह्यो हय। 12 ओन इत उत देख्यो कि कोयी नहाय, त ऊ मिस्री आदमी ख मार डाल्यो अऊर रेतु म लूकाय दियो।

13 दूसरो दिन बाहेर दोय इब्री आदमी आपस म लड़ाई कर रह्यो हंय। मूसा न देख्यो कि ओको म एक गलत हय, त मूसा न ओख बोल्यो "तय अपनो संगी ख कहाली मारय हय?" 14 ओन कह्यो, "कौन न तोख हम लोगों पर शासक अऊर न्याय करन वालो ठहरायो? का तुम मोख मारन आयो हंय, जसो तुम न मिस्री आदमी ख मार डाल्यो होतो?" तब मूसा यो सोच क डर गयो, कि "निश्चय ऊ बात खुल गयी हय जो मय न करयो होतो।" 15 ✝2:15 प्रेरितों ७:२९; इब्रानियों ११:२७जब फिरौन न यो बात सुन्यो कि मूसा न यो का करयो तब ओख मारन लायी देखन लग्यो। पर मूसा फिरौन सी दूर भग गयो, अऊर मिद्यान देश म जाय क रहन लग्यो; अऊर ऊ उत एक कुंवा को जवर बैठ गयो। 16 मिद्यान देश को याजक की सात बेटियां होती; अऊर हि कुंवा पर अपनो बाप की शेरी-मेंढी लायी डोगी म पानी भरन आयी होती। 17 तब कुछ चरवाहे आय क उन्ख हटान लग्यो; तब मूसा उठ्यो उन्न याजक की टुरियों की मदत करी अऊर शेरी-मेंढी ख पानी पिलायो। 18 जब वा अपनो बाप रूएल को जवर वापस गयी, तब ओको बाप न उन्ख पुच्छ्यो, "का वजह हय कि अज तुम इतनो जल्दी वापस आय गयी।" 19 उन्न कह्यो, "एक मिस्री आदमी न हम ख चरवाहों सी बचायो, अऊर हमरो लायी बहुत पानी भर क् शेरी-मेंढी ख पानी पिलायो।" 20 तब ओन अपनी बेटियों सी कह्यो, "ऊ आदमी कित हय? तुम ओख कहाली छोड़ आयी हय? ओख बुलाय क लावो कि ऊ हमरो संग जेवन करेंन।" 21 अऊर मूसा उन्को संग रहन लायी तैयार भय गयो। ओन अपनी बेटी सिप्पोरा को बिहाव मूसा को संग कर दियो। 22 ओन एक टुरा ख जनम दियो, तब मूसा न यो कह्यो, "मय यो देश म परदेशी हय," येकोलायी ओको नाम गेर्शोम रख्यो।

23 बहुत साल को बाद मिस्र देश को राजा मर गयो। इस्राएली लोगों ख गुलामी म कठिन काम करनो पड़त होतो। अऊर हि मदत लायी चिल्लावत होतो, अऊर उन्की दोहायी जो कठिन काम को वजह हुयी ऊ परमेश्वर तक पहुंची। 24 ✝2:24 उत्पत्ति १५:१३,१४परमेश्वर न उन्को दु:ख ख सुन्यो अऊर अपनो वाचा ख, जो ओन अब्राहम, इसहाक, अऊर याकूब को संग बान्धी होती, याद करयो। 25 अऊर परमेश्वर न इस्राएलियों की दुर्दशा पर नजर कर क् उन पर मन लगायो।