निर्गमन 30

धूप जलान की वेदी

1 "फिर धूप जलान लायी बबूल की लकड़ी की वेदी बनाजो। 2 ओकी लम्बायी एक हाथ अऊर चौड़ायी एक हाथ की हय, ऊ चौकोन हो, अऊर ओकी ऊंचायी दोय हाथ की हो, अऊर ओको सींग ओको तुकड़ा सी बनायो जाये। 3 अऊर वेदी को ऊपर वालो पल्ला अऊर चारयी तरफ को बाजुवों ख अऊर सींग ख शुद्ध सोनो सी मढ़वाजो, अऊर इन्को चारयी तरफ सोनो की एक किनार बनाजो। 4 अऊर येको किनार को नीचो येको आमने-सामने को दोयी पल्ला पर सोनो को दोय दोय कड़ा बनाय क येको दोयी तरफ लगाजो, हि कड़ा डन्डो को सहारा उठान को काम देयेंन। 5 डन्डो ख बबूल की लकड़ी को बनाय क उन्ख सोनो सी मढ़वाजो। 6 अऊर तय ओको उच परदा को आगु रखजो जो गवाही चिट्ठी को सन्दूक को आगु हय, मतलब पश्चाताप वालो ढकन को आगु जो गवाही चिट्ठी को ऊपर हय, वहांच मय तोरो सी मिल्यो करूं। 7 अऊर ओको वेदी पर हारून सुगन्धित धूप जलायो करेंन; हर दिन सुबेरे ख जब ऊ दीया ख ठीक करेंन तब ऊ धूप जलाये, 8 अऊर शाम को समय जब हारून दीयां ख जलाये तब धूप जलायो करेंन, या धूप परमेश्वर को आगु तुम्हरो पीढ़ी पीढ़ी म हमेशा जलायो जाये। 9 वा वेदी पर तुम कोयी दूसरो तरह को धूप नहीं जलाजो, अऊर नहीं ओको पर होमबलि अऊर नहीं अन्नबलि चढ़ाजो; अऊर नहीं उच पर अर्घ देजो। 10 हारून साल म एक बार येको सींगो पर प्रायश्चित करेंन; अऊर तुम्हरी पीढ़ी पीढ़ी म साल म एक बार प्रायश्चित को पापबलि को खून सी येको पर प्रायश्चित करयो जाये; यो परमेश्वर लायी परम पवित्र हय।"

प्रानों को प्रायश्चित को शुल्क

11 तब परमेश्वर न मूसा सी कह्यो, 12 "जब तय इस्राएलियों लोगों की गिनती लेन लग्यो, तब गिनती को समय जेकी गिनती हुयी हो हि अपनो अपनो जीव लायी परमेश्वर ख प्रायश्चित को शुल्क दे, जेकोसी जब तय उन्की गिनती कर रह्यो हय उच समय कोयी भयानक विपत्ति उन पर नहीं आय पड़ेंन। 13 ✝30:13 निर्गमन ३८:२५,26; मत्ती १७:२४जितनो लोग गिन्यो जाये हि पवित्र जागा को शेकेल को अनुसार चांदी अरधो शेकेल*30:13 अरधो शेकेल लगभग ६ ग्राम दे यो शेकेल बीस गेरा*30:13 बीस गेरा लगभग १२ ग्राम को होवय हय, परमेश्वर की भेंट अरधो शेकेल हो। 14 बीस साल को यां ओको सी अधिक अवस्था को जितनो गिन्यो जाये उन्म सी हर एक जन परमेश्वर ख भेंट दे। 15 जब तुम्हरो जीव को पश्चाताप को निमित्त परमेश्वर कि भेंट अर्पित की जाये, तब धनी लोग अरधो शेकेल सी अधिक नहीं देयेंन; अऊर नहीं गरीब लोग ओख सी कम देयेंन। 16 अऊर तय इस्राएलियों सी प्रायश्चित को हिस्सा ले क मिलाप वालो तम्बू को काम म लगाजो; जेकोसी ऊ परमेश्वर को आगु इस्राएलियों को याद गार चिन्ह ठहरे, अऊर उन्को जीव को प्रायश्चित भी हो।"

पीतल की गंगार

17 परमेश्वर न मूसा सी कह्यो, 18 ✝30:18 निर्गमन ३८:८"धोन लायी पीतल को एक गंगार बनाजो, अऊर ओको पाया भी पीतल को बनाजो। ओको मिलाप वालो तम्बू अऊर वेदी को बीच म रख क उन्म म पानी भर देजो; 19 अऊर ओको म हारून अऊर ओको टुरा अपनो अपनो हाथ पाय धोयो करेंन। 20 जब जब हि मिलाप वालो तम्बू म सिरेंन तब तब हि हाथ पाय पानी सी धोये, नहीं त मर जायेंन; अऊर जब जब हि वेदी को जवर सेवा करन वेदी को जवर आये, मतलब परमेश्वर लायी हवन जलावन ख आये तब तब हि हाथ पाय धोये, असो नहीं होय कि मर जाये। 21 यो हारून अऊर ओको पीढ़ी पीढ़ी को वंश लायी हमेशा की विधि ठहरे।"

अभिषेक को तेल

22 तब परमेश्वर न मूसा सी कह्यो, 23 "तय उत्तम सी उत्तम सुगन्धित मसाला लावो, मतलब पवित्र जागा को शेकेल को अनुसार पाच सौ शेकेल*30:23 पाच सौ शेकेल लगभग ६ किलोग्राम अपनो आप निकल्यो हुयो गन्धरस, अऊर ओको अरधो, मतलब ढायी सौ शेकेल*30:23 ढायी सौ शेकेल लगभग तीन किलोग्राम सुगन्धित कलमी, अऊर ढायी सौ शेकेल सुगन्धित लुभान, 24 पवित्र जागा को अनुसार छय किलो तेजपान, अऊर चार लिटर*30:24 एक हीन लगभग चार लिटर जैतून को तेल लेजो 25 उन्को सी अभिषेक को पवित्र तेल, मतलब सुगन्ध की रीति सी तैयार करयो हुयो सुगन्धित तेल बनायजो; यो अभिषेक को पवित्र तेल ठहरे। 26 अऊर ओको सी मिलाप वालो तम्बू को, अऊर गवाही चिट्ठी को सन्दूक पर यो तेल ख डालेंन, 27 अऊर पूरो सामान सहित मेज को, अऊर सामान सहित दीया को, अऊर धूप वेदी को 28 अऊर पूरो सामान सहित होमबलि वेदी को, अऊर पाये सहित गंगार को सजायजो, 29 अऊर उन्ख पवित्र करजो, जेकोसी हि परम पवित्र ठहरेंन; अऊर जो कुछ उन्को सी छुय जायेंन ऊ पवित्र होय जायेंन। 30 तय हारून को ओको टुरावों को संग नियुक्त करजो, अऊर यो तरह उन्ख मोरो लायी याजक को काम करन लायी पवित्र करजो। 31 अऊर इस्राएलियों लोगों ख मोरी यो आज्ञा सुनाजो, ‘यो तेल तुम्हरो पीढ़ी पीढ़ी म मोरो लायी पवित्र करयो हुयो तेल होयेंन। 32 यो कोयी आदमी को शरीर पर नहीं डालो जाये, अऊर मिलावट म ओको समान अऊर कुछ नहीं बनाजो; यो पवित्र हय, यो तुम्हरो लायी भी पवित्र होयेंन। 33 जो कोयी येको समान कुछ बनाये, यां जो कोयी येको म सी कुछ पराये कुल वालो पर लगाये, ऊ अपनो लोगों म नहीं गिन्यो जाये’।"

पवित्र सुगन्धित सामग्री

34 फिर परमेश्वर न मूसा सी कह्यो, "बोल, नखी अऊर कुन्दरू, यो सुगन्ध द्रव्य शुद्ध लुभान सहित ले लेजो, हि सब बराबर तौल की मात्रा हो, 35 अऊर इन्को धूप मतलब नमक मिलाय क सुगन्ध की रीति को अनुसार शुद्ध अऊर पवित्र सुगन्धित मसाला सी बनायजो। 36 फिर ओको म सी कुछ पीस क बारीक क डालजो, तब ओको म सी कुछ मिलाप वालो तम्बू म साक्षी पत्र को आगु, जित पर मय तोरो सी मिल्यो करूं, रखजो; ऊ तुम्हरो लायी परम पवित्र होयेंन। 37 जो धूप तय बनायजो, मिलावट म ओको समान तुम लोग अपनो लायी अऊर कुछ नहीं बनायजो; ऊ तुम्हरो आगु परमेश्वर लायी पवित्र होयेंन। 38 ✝30:38 निर्गमन ३७:२९जो कोयी सूंघन लायी ओको समान कुछ बनाये ऊ अपनो लोगों म न गिन्यो जाये।"