निर्गमन 31

तम्बू को लायी कारीगर

1 तब परमेश्वर न मूसा सी कह्यो, 2 "सुन, मय ऊरी को टुरा बसलेल को, जो हूर को पोता अऊर यहूदा को वंश को हय, नाम ले कर बुलावय हय। 3 अऊर मय ओको परमेश्वर की आत्मा सी जो बुद्धि, हुनर, ज्ञान, अऊर सब तरह को काम की समझ देनो वालो आत्मा हय, परिपूर्ण करय हय, 4 जेकोसी ऊ कारीगरी को काम बुद्धि सी निकाल क जिन्ख ऊ सोनो, चांदी, अऊर पीतल को बर्तन पर बनाय सकेंन, 5 अऊर जड़न लायी मनि काट सके, अऊर लकड़ी पर नकाशी काम भी कर सकेंन। 6 अऊर सुन, मय दान को वंश वालो अहीसामाक को टुरा ओहोलीआब ख ओको संग कर देवय हय; बल्की जितनो बुद्धि मान हय उन सब को दिल म मय बुद्धि देवय हय, जेकोसी जितनो चीजो की आज्ञा मय न तोख दियो हय उन सब ख हि बनाये; 7 मतलब मिलाप वालो तम्बू, अऊर साक्षी पत्र को सन्दूक अऊर उच पर को प्रायश्चित वालो ढकन अऊर तम्बू को पूरो सामान, 8 अऊर सामान सहित मेज, अऊर पूरो सामान सहित शुद्ध सोनो को दीया, अऊर धूप जलान की वेदी, 9 अऊर पूरो सामान सहित होमबलि वेदी, अऊर पाये सहित गंगार, 10 अऊर बुन्यो हुयो धागा को कपड़ा, अऊर याजक हारून को याजक वालो काम को पवित्र कपड़ा, अऊर ओको टुरावों को कपड़ा, जिन्ख हि याजक को कार्य करतो समय पहिनेंन, 11 अऊर अभिषेक को तेल, अऊर पवित्र जागा लायी सुगन्धित धूप, इन सब ख हि उन सब आज्ञावों को अनुसार बनाये जो मय न तोरो दियो हंय।"

सब्त मतलब आराम दिन

12 फिर परमेश्वर न मूसा सी कह्यो, 13 "तय इस्राएलियों लोग सी यो भी कहजो, ‘निश्चय तुम मोरो आराम दिनों ख मनाजो, कहालीकि तुम्हरो पीढ़ी पीढ़ी म मोरो अऊर तुम लोगों को बीच यो एक चिन्ह ठहरो हय, जेकोसी तय यो बात जान रख्यो कि परमेश्वर हमरो पवित्र कर्ता हय। 14 यो तरह तय आराम दिन ख मनाजो, कहालीकि ऊ तुम्हरो लायी पवित्र ठहरो हय; जो ओको अपवित्र करेंन ऊ निश्चय मार डाल्यो जाये : जो कोयी उच दिन म कुछ काम काज करेंन ऊ अपनो लोगों को बीच सी निकाल दियो जायेंन। 15 ✝31:15 निर्गमन २०:८-११; २३:१२; ३४:२१; लैव्यव्यवस्था २३:३; व्यवस्थाविवरन ५:१२-१४छय दिन त काम-काज करयो जाये, पर सातवों दिन परम पवित्र को दिन अऊर परमेश्वर लायी पवित्र हय; येकोलायी जो कोयी आराम को दिन म कुछ काम-काज करेंन ऊ निश्चय मार डाल्यो जाये। 16 येकोलायी इस्राएली आराम दिन ख मानो करेंन, बल्की पीढ़ी पीढ़ी म ओको हमेशा की वाचा को बारे जान क मानो करेंन। 17 ✝31:17 निर्गमन २०:११ऊ मोरो अऊर इस्राएलियों को बीच हमेशा एक चिन्ह रहेंन, कहालीकि छय दिन म परमेश्वर न आसमान अऊर धरती ख बनायो, अऊर सातवों दिन आराम कर क् अपनो जीव ख शान्त करयो’।" 18 जब परमेश्वर मूसा सी सीनै पहाड़ी पर असी बात कर चुक्यो, तब ओन ओको अपनी बोट सी लिखी हुयो गवाही चिट्ठी देन वालो गोटा की दोयी पट्टियां दियो।