1 Mata ə̂në Kristə nə wû əyo tə̂ tshekotə̂ ye gâ ye kɔ, rəkɔ, e-e ndje, e zä kʉtə̂ əpʉ sə̂ bale gâ lə kumu e tə ə̈bə̈ ərə koshe. Mbrə ə̂në, əzü ə̂në tshə wû əyo lə akwa ye gâ ye kɔ, tshə tshî äwä nyaka tʉ gâ ye, 2 kanika ə sə sə kwatə̂ye də sorô ndə kə mbrə aərə Lïndə̂ aəgo lɔsu əzü ne, bale tshə sə də sorô nə mbrə ərə ə̂në tshelə Ndjapä yində nə lə ə̂dû alɔ ə̂në tshə daka pə tə sorô lə əzü tə̂ ye kɔ. 3 Mbrə ə̂në, leme-e, e mbrə̂ aərə ə̂në tshelə azü ə̂në əndje wusə̂ Ndjapä wu nə kɔ yində nə kɔ ngbatshe gâ ye, ə̂në e yî tə̂ e gâ lə ə̂trû, gâ lə aəmbrʉ aəgo, gâ lə kə ndju ə̂pî ə mbrə e alɔnɔ̂, gâ lə kə zɨ rəgo fro fro də kə ndju ərə rô pâ nə, gâ ndə kə vrɔ aamba andjapä ə̂në ə sə tə ərə gana kɔ. 4 Kpəsəye, kumu azü nə kpe pâ əndu əndje mbrə ə̂në e gbɔgbɔ tə̂ e gbɔgbɔ kwatə̂-e də aəndje gu nə ndə kʉtə̂ aərə kene ro pâ nə kɔ ne, â əndje sə kə pa tə̂ e. 5 Bale, əndje ka gâ ətshi ətshə ə̂në tshə sə trö ndə kə wa ngbanga asorô də akuzu kɔ ə yisə̂ âdâ əpʉ je. 6 Mbrə əpʉ səkɔ də̂ əndje mʉ̂ Ə̂rɔ̂ Əpʉ ndje kə akuzu, ndə kə pa, mandâ kə wa ngbanga gâ pâ əndje mbrə aərə ə̂në əndje mbrə̂ gâ ye kɔ, mata ə̂dû azü nɔ̂, əndje sə də sorô ə lï də Ndjapä tə̂ äwä Yîrə̂.

7 Alɔ kə nglɔ aərə nɔ̂ ndô trö gâ ye. Rəkɔ, e sə̈ tə aawowusə̂ ərə ə sə̈ də ə̈kü ala e ka e lï ndə kə pa e yu Ndjapä. 8 Angbʉlînə lə aərə nɔ̂, e yï tə̂ e lə takpa tə̂ e də lɔsu e nɔ̂, mbrə ə̂në «kə yi tə̂ sə kə tshu tshepa ə̂kpû anyaka.»* 9 E kö angâ e gâ tə̂ e lə aanda nə̂ e lə takpa tə̂ e ə dɨ̈ tshelə ama e dɨ̈ bale ne. 10 Əzü bale bale sɔ̂tə̂ âkrâ ə̂në Ndjapä krâ tə̂ ye də nə kɔ gâ ye, tshə zä ə mbrə̈ də ərə mbrə angâ nə, tə ə̂rɔ̂ awobata ərə ə̂në Ndjapä nə zâ kə ətshə lə ə̂rɔ̂tə̂ ye ə̂në tshelə nə ngba ə ngba kɔ. 11 Kədə ə̈bə̈ əzü kə sə kə pa əpʉ kə azü, tshə pä kʉtə̂ aəpʉ nə̂ Ndjapä. Kədə ə̈bə̈ əzü kə sə kə mbrə kosəra mbrə angâ nə, tshə mbrə̈ də awlra ə̂në Ndjapä ə za kə ətshə kɔ, kanika azü mbe Ndjapä lə aərə nɔ̂ tə̂ äwä Jezu Kristə nə, Ndjapä nə ə̂në kə mbe ətshe gâ ndə awlra sə tə ənə̂ ye də ə̂ngû də ə̂ngû piii kɔ. Asərəmə!

12 Alaye əmə ə̂në mə yində e wââ kɔ, kumu e kpë kpë pâ əndu e mbrə əwo ə̂në ə ju lə takpa tə̂ e ndə kə tra lɔsu e kɔ, a pa də ə̈bə̈ tafa ərə kə wutu gâ tə̂ e kɔ ne. 13 Bale, e sə̈ də ə̂rû tə̂ lɔsu e mbrə ə̂në e sə kə wu marä tə̂ aərə əyo ə̂në Kristə nə wû gâ ye kɔ, kanika e sə ndje də ə̂rû tə̂ lɔsu e də amɔ tshelə e alɔ ə̂në azü nɔ̂ sə kə wu ə̂yî ye nə. 14 Kədə azü kə gu e mbrə əɨrɨ Kristə nə, ənə̂ e tə ə̂rɔ̂nə, mbrə ə̂në Yîrə̂ ə̂yî, Yîrə̂ Ndjapä sə gâ pâ e! 15 Rəkɔ, əzü bale lə takpa tə̂ e wü wü əyo tə awowo əzü ne, wala tə əyïangba, wala mbrə ə̂në tshə mbrə əmbrʉ ərə, wala mbrə ə̂në tshə yi ama ye gâ lə aəpʉ nə̂ azü kɔ ne. 16 Bale kədə tshə wu əyo mbrə ə̂në tshə sə tə əzü nə̂ Kristə kɔ, gana ngɔ̈ ətshə ngɔ̈ ne, bale tshə mbe Ndjapä mbrə əɨrɨ nə pâ ye kɔ.

17 Mbrə ə̂në alɔ ndə kə pa ngbanga vɔtə̂ nə tə̂ tshelə anda nə̂ Ndjapä kɔ kə sə̂. Kandää, kədə ə vɔtə̂ nə ətshinə tə̂ əzə̂, yekɔ kə wutu gâ tə̂ azü ə̂në əndje wəra tə̂ əndje ndə kə yində Ə̂rɔ̂ Əpʉ nə̂ Ndjapä də lɔsu əndje kɔ? 18 Mata ə̂në Fraka nə̂ Ndjapä pâ:

«Kədə kə tshɔ ə̂rɔ̂ əzü

lə kuzu kə gbɔ ə gbɔ,

ənə̂ əmbrʉ əzü də əyïnyaka

sə kə sə atâ a?»*

19 Rəkɔ, azü ə̂në əndje sə kə wu əyo, Lïndə̂ ərə ə̂në tshelə Ndjapä yində nə kɔ, əndje kö tə̂ əndje gâ lə kəna Awoso tshepashɔ, ə̂në tshə sə kə ma tshelə ndəma ye alɔnɔ̂ kɔ, ə däka pə tə̂ äwä kə mbrə ə̂rɔ̂ ərə nə.