1 Ə̂dû əpʉ nə, alaye, ä sə kə kɨ kə e ə pa əpʉ kə e də əɨrɨ Âgbɔ̂ Əyïngerə Jezu: ä yîsə̂ äwä kə e, də äwä kə sə e ə̂në ə fʉ lə ala Ndjapä kɔ gâ ye. Ngâ, e mbrə̂ rə gâ ye. Rəkɔ, e kwätə̂-e ə mbrə̈ rə ə ro pâ ənə̂ ətshinə kɔ. 2 Bale, e wûsə̂ aəpʉ kə za ama ə̂në Âgbɔ̂ Əyïngerə Jezu zâ ə̂në ä yîsə̂ nə kə e kɔ gâ ye. 3 Ərə ə̂në Ndjapä yində nə kə də̂ kə pa e sə kpî mbrə Ndjapä, e kätə̂ äwä əpʉ ə̂trû. 4 Əzü bale bale lə takpa tə̂ e wüsə̂ äwä kə za yashe tə̂ äwä ə̂në ə sə tə ə̂rɔ̂nə kɔ, tə̂ äwä kə lʉ tə̂ ye*, 5 kanika əgo aəmbrʉ aərə ro pâ e ro ne, mata adulu ə̂në əndje wusə̂ Ndjapä wu ne kɔ. 6 Lə əpʉ səkɔ, ə̈bə̈ əzü bale mbrə̈ mbrə̈ ərə ndə kə za əkɔ gâ tə̂ lɔsu ə̈bə̈ ngâ nə wala ə ndɨ äwä ərə nə̂ ye ne. Ä pâ ndə əpʉ səye kə e ə gbə̂tɔ ətu e gâ pâ nə gâ ye: Âgbɔ̂ Əyïngerə sə kə wa ngbanga gâ pâ azü ə̂në əndje sə kə mbrə marä tə̂ aərə səkɔ nɔ̂. 7 Mbrə ə̂në Ndjapä ê əzə̂ e ndə kə pa a sə lə əmbrʉ ərə ne, bale, tshə ê əzə̂ ndə kə pa a sə kpî mbrə ətshə. 8 Rəkɔ, əzü ə̂në tshə wəra tə̂ ye tə̂ əpʉ səye, tshə wəra tə̂ ye wəra tə̂ əzü ne, bale, tshə wəra tə̂ ye tə̂ Ndjapä ə̂në tshə za ndje Âgbɔ̂ Yîrə̂ nə̂ ye kə e kɔ.

9 Əpʉ gâ pâ əpʉ kə yi tə̂ lə takpa tə̂ e, ə sə sə tə ə̈bə̈ ərə ə̂në əzü ə sə də əgo ndə kə ta fraka də nə ə ta kə e ne, mbrə ə̂në Ndjapä yîsə̂ äwä kə yi tə̂ e lə takpa tə̂ e kə e də ə̂tə̂ e gâ ye; 10 ə sə ndje tə ərə ə̂në e sə kə mbrə nə kə alaye nɔ̂ lə əgɔ Masedwanə nɔ̂. Bale, ä sə kə pa əpʉ kə e, alaye, ndə kə pa e kwatə̂-e ə ma ə ro ənə̂ səkɔ. 11 E prä äwä nɔ̂ ndə kə pa e sə də blatshe, e gä ndə akosəra nə̂ e də ə̂tə̂ e ə mbrə̈ kosəra də kəna e, mata ə̂në ä zâ ama də əpʉ nə kə e gâ ye kɔ. 12 E mbrə̈ rə ndə kə pa kə mbrə tə̂ e sə də äwänə lə ala azü ə̂në əndje wusə̂ Ndjapä wu ne kɔ ka e lishi li kʉ gâ lə kəna azü ndə kə pa e sɔtə̂ ərə ne.

13 Alaye, ä yində kə yisə̂ djatra əpʉ kə e gâ pâ əpʉ nə̂ azü ə̂në əndje tshû gâ ye kɔ, kanika əyo ro pâ e ro mata ə̂dû azü ə̂në lɔsu əndje ka ka mbrə ə̈bə̈ ərə bale ne kɔ. 14 Bale, kədə a yində əpʉ nə də lɔsu əzə̂ ə pa Jezu tshû gâ ye â Ndjapä shê ətshə lə takpa tə̂ akuzu gâ ye kɔ, a yïndə əpʉ nə ndje də lɔsu əzə̂ ə pa azü ə̂në əndje zâ lɔsu əndje kə Jezu â tshû gâ ye kɔ, Ndjapä sə kə she əndje ə ngbo əndje də a-Jezu tə̂ ə̂sə̂ nə bale je.

15 Rəkɔ, əpʉ ə̂në ä sə kə pa kə e Lïndə̂ ə̈bə̈ əpʉ nə̂ Âgbɔ̂ Əyïngerə kɔ kə səye: əzə̂ də̂ asorô, ə̂në a daka pə mbrə əlo kə gu Âgbɔ̂ Əyïngerə nə kɔ, a sə sə kə ro ətshinə tə̂ azü ə̂në əndje tshû gâ ye kɔ ne. 16 Mbrə ə̂në, tə̂ alɔ ə̂në əndje ta râwâ, ə̂në tshema ə̈bə̈ makɔndji nə̂ atrawaya kɨ, ə̂në ängɔ̈ nə̂ Ndjapä sə kə kɨ nə, Âgbɔ̂ Əyïngerə də ə̂tə̂ ye, sə kə afɔ mâ lafɔ ə jerə, bale, azü ə̂në əndje zâ lɔsu əndje kə Kristə nə gâ ye â tshû kɔ, əndje sə kə she angbʉlînə. 17 Mandânə, əzə̂ də̂ asorô nə, ə̂në a daka pə ənə̂ əzə̂ je kɔ, Ndjapä sə kə ko əzə̂ də aəndje äwä bale ə o də əzə̂ mâ lafɔ lə andra ndə kə pa a te Âgbɔ̂ Əyïngerə nə lə əyi, â rəkɔ, a sə kə sə alɔnɔ̂ gâ ngotə̂ Âgbɔ̂ Əyïngerə nə. 18 Rəkɔ, e gbɔ̈gbɔ lɔsu e lə takpa tə̂ e tə̂ äwä aəpʉ səkɔ.