1 Alaye, gâ pâ əpʉ kə gu Âgbɔ̂ Əyïngerə Jezu Kristə gâ ndə kə ngbo tə̂ əzə̂ gâ ngotə̂ ye*2.1 Wu 1Tes 4.15-17., ərə ə̂në ä yu tshuku nə kə e kɔ kə də̂ kə pa, 2 alɔ ə̂në ə̈bə̈ əzü pa kə e ə pa alɔ kə gu Âgbɔ̂ Əyïngerə lî gâ ye ə pa ndəma Ndjapä kə sə̂, wala ndəma ä kə sə̂ wala ä-ä kə wlâ fraka də əpʉ rə kɔ, kumu e kpë kpë pâ əndu e katshä ne, e mbrə̈ ndje awa mbrə̈ ne. 3 Ə̈bə̈ əzü bale frɔ̈ e frɔ̈ də ə̈bə̈ əpʉ bale ne. Mbrə ə̂në, angbʉlînə ndə kə pa alɔ nə lï, ə̂kpû azü sə kə katə̂ äwä Ndjapä tʉ â əmbrʉ əzü sə kə yi kumu ye, ətshə ə̂në əndje liwu ətshə je kɔ. 4 Əyïkowɔ səkɔ ə̂në tshə sə kə afɔ ə ro ərə nɔ̂ ə̂në azü e ə pa Ndjapä də ərə ə̂në azü sə kə vrɔ nə kɔ, ə na ʉrrr ndjɔ ndə kə sə gâ tʉ mâ lə Anda Ndjapä ə pa əne də ə̂tə̂ əne, əne sə tə Ndjapä.*2.4 Wu Dan 11.36; Eze 28.2.

5 Ə̂sə̂ əpʉ sə̂ te te gâ lə e ə pa mə pâ əpʉ səye leme-e kə e gâ ye, alɔ ə̂në mə daka pə ngotə̂ e kɔ ne a? 6 Bale, mandânə səye, e wûsə̂ ərə ə̂në ə daka pə ndə kə kânga äwä tə̂ ye kɔ tə ə̂rɔ̂nə gâ ye, ndə kə pa tshə yi kumu ye kʉ tə̂ alɔ ye nə. 7 Mbrə ə̂në awlra nə̂ əmbrʉ əzü nə vɔ̂tə̂ kosəra nə̂ ye gâ ye. Kʉtə̂ əzü nə ə̂në tshə daka pə kə kânga äwä tə̂ ye nə kɔ, tshə ro gâ ye kane. 8 Bale, əmbrʉ əzü nə sə kə yi kumu ye â Âgbɔ̂ Əyïngerə Jezu sə kə liwu ətshə də əwu tshelə ama ye â sə kə shi tshelə ye də ə̂yî kə gu ətshə.*2.8 Wu Eza 11.4. 9 Alɔ ə̂në əmbrʉ əzü nə sə kə yi kumu ye, tshə sə kə ma tə̂ ye gashu tə̂ äwä awlra nə̂ Sataa, də adongo aərə ə̈lü də aərə kə za awa gâ lə azü gâ ndə aərə ə̂në ə ro pâ kumu azü kɔ ndə kə frɔ azü.*2.9 Wu Mat 24.24. 10 Tshə sə kə mbrə adongo aəmbrʉ aərə ndə kə frɔ azü ə̂në əndje za äwä kuzu kɔ, mbrə ə̂në əndje yində djatra əpʉ yi tə̂ lɔsu əndje ndə kə pa əndje tshɔ lə kuzu ne. 11 Âdârə ə̂në, Ndjapä wla ə̈bə̈ awlra kə əndje ndə kə pa äwä yu tə̂ əndje kanika əndje za lɔsu əndje kʉ gâ pâ əpʉ əterə, 12 kanika Ndjapä wa ngbanga gâ pâ azü ə̂në əndje yində djatra əpʉ yi də lɔsu əndje ne kɔ, bale â tshelə əndje mɔ tə̂ äwä kə mbrə aəmbrʉ aərə kɔ.

13 Ənə̂ ä, alaye ə̂në Âgbɔ̂ Əyïngerə yində e rô pâ nə kɔ, ä lï ndə kə pa ä za mərshe alɔnɔ̂ kə Ndjapä mbrə e, mbrə ə̂në Ndjapä kê e pə tə̂ alɔ kə so tshepashɔ*2.13 Ndjapä kê e pə tə̂ alɔ kə so tshepashɔ: Alabə̈ afraka nə̂ Ndjapä də ama grakə pa: «Ndjapä kê e əlînə.» mbrə sorô nə̂ alɔnɔ̂ tə̂ äwä Âgbɔ̂ Yîrə̂ ə̂në tshə kô e kpî mbrə Ndjapä kɔ ndje tə̂ äwä lɔsu e ə̂në e zâ gâ tə̂ äwä djatra əpʉ kɔ. 14 Ərə ə̂në tshə ê e ndje mbrə nə tə̂ äwä Ə̂rɔ̂ Əpʉ ə̂në ä mʉ̂ kə e kɔ kə sə̂ ndə kə pa e sɔtə̂ äwä kə li gâ lə ə̂yî Âgbɔ̂ Əyïngerə nə̂ əzə̂ də Jezu Kristə. 15 Rəkɔ, alaye, e kä gbʉ gbʉ gbʉ ə bata aəpʉ ə̂në ä yîsə̂ nə kə e gâ ye kɔ, wala də ama ä wala tə̂ äwä fraka.

16 Abä əzə̂ də Ndjapä yində əzə̂. Tshə zâ, tə̂ äwä ə̂rɔ̂tə̂ ye, ərə kə zɨtɨ lɔsu əzə̂ ə̂në ə sə piii kɔ də ə̂rɔ̂ ərə ə̂në lɔsu əzə̂ ka mbrə nə kɔ kə əzə̂ gâ ye. Abä əzə̂ də Ndjapä gâ ndə Âgbɔ̂ Əyïngerə nə̂ əzə̂ Jezu Kristə də ə̂tə̂ ye, 17 zɨ̈tɨ lɔsu e ə gbɔ̈gbɔ e lə ə̂rɔ̂ kosəra nɔ̂ ə̂në e mbrə kɔ də ə̂rɔ̂ əpʉ nɔ̂ ə̂në e pa kɔ!