1 Əmə, Palɔ, tə əzü-awla nə̂ Jezu Kristə, tə̂ äwä ə̂në tshelə Ndjapä yində nə, əmə gâ ndə aye əmə də Timɔte; 2 ä wla ngrowô səye kə azü ə̂në əndje sə tə azü nə̂ Ndjapä, lə gala Kɔlɔsə, əndje ə̂në əndje zâ lɔsu əndje kə Kristə gâ ye ə tɔ popo ətshə kɔ.

Abä əzə̂ də Ndjapä mä ə̂rɔ̂tə̂ ye kə e ə zä blatshe kə e!

3 Alɔ ə̂në ä sə kə yu Ndjapä mbrə e, ä sə kə za mərshe alɔnɔ̂ kə Ndjapä nə, Abä Âgbɔ̂ Əyïngerə nə̂ əzə̂ də Jezu Kristə. 4 Mbrə ə̂në ä djî ndə əpʉ lɔsu ə̂në e sə də nə tə̂ äwä Jezu Kristə kɔ gâ ndə äwä ə̂në e yində azü nə̂ Ndjapä nɔ̂ də nə kɔ gâ ye. 5 Ngâ, e za lɔsu e gâ pâ ərə ə̂në Ndjapä gâmba mbrə e mâ lafɔ kɔ gâ ye. Tə̂ alɔ ə̂në Ə̂rɔ̂ Əpʉ ə̂në ə sə tə djatra əpʉ kɔ, wûtu mâ ndə e kɔ, ə yîsə̂ əpʉ ərə nə ə̂në e za lɔsu e gâ pâ nə kɔ kə e gâ ye. 6 Ə̂rɔ̂ Əpʉ səkɔ wûtu mâ ndə e gâ ye â sə kə gerə na na ye â azü sə kə wu aərə tshemandâ nə ndje pâ ashɔ nɔ̂. Ərə nə sə kʉ rə lə takpa tə̂ e, ə vɔ̂tə̂ nə tə̂ alɔ ə̂në e djî ndə əpʉ ə̂rɔ̂tə̂ Ndjapä â wûsə̂ nə tə djatra əpʉ gâ ye kɔ. 7 Epafrasə, tə gbɔbəngâ kosəra nə̂ ä ə̂në ä yində ye rô pâ nə kɔ kə yîsə̂ əpʉ sə̂ kə e gâ ye kɔ. Tshə sə mbrə e tə əyïkosəra nə̂ Kristə, ə̂në e lï ndə kə za lɔsu e nɔ̂ gâ pâ ye. 8 Tshə pâ ndje ndə əpʉ kə yi tə̂ ə̂në Âgbɔ̂ Yîrə̂ zâ gâ tə̂ lɔsu e kɔ kə ä gâ ye.

9 Âdârə ə̂në, ä-ä ndje, ə vɔ̂tə̂ nə tə̂ əlo ə̂në ä djî ndə aəpʉ səkɔ, ä ka katə̂ kə yu Ndjapä mbrə e ne â sə kə pa kə Ndjapä nə ndə kə pa tshə za kə wusə̂ âdâ ərə nɔ̂ də kə wusə̂ ərə ə̂në ə afɔ tə̂ äwä Âgbɔ̂ Yîrə̂ nə̂ ye kɔ kə e. Â rə də̂, e lï ndə kə wusə̂ aərə nɔ̂ ə̂në tshelə ye yində nə kɔ, 10 ndə kə pa e mbrə tə̂ e ə lï də ərə ə̂në tshelə Âgbɔ̂ Əyïngerə yində nə ə mbrə ərə ə̂në ə fʉ lə ala ye kɔ lə aərə nɔ̂. E sə kə mbrə adongo aə̂rɔ̂ aərə nɔ̂ ə sə kə wusə̂ Ndjapä ro pâ nə alɔnɔ̂. 11 Awlra ə̂yî ye sə kə gbɔgbɔ e lə aərə nɔ̂ â bale, e sə kə ru tshelə e lə aərə nɔ̂ ə ru ə ru ʉrrr ndjɔ gâ tə̂ ama nə. 12 Də ə̂rû tə̂ lɔsu e, e zä mərshe kə Abä ə̂në tshə mbrə̂ e tə azü ə̂në e lï ndə kə pa e sɔtə̂ aə̂rɔ̂ aərə ə̂në tshə bâta mbrə azü nə̂ ye lə Əgɔngerə ə̂yîtshe gâ ye kɔ. 13 Ndjapä nə djɔ̂ əzə̂ tshekudu awlra əbutshe gâ ye â kô əzə̂ ə rô də əzə̂ gâ lə əgɔngerə nə̂ Ɨrɨ nə ə̂në tshə yində ye rô pâ nə kɔ gâ ye. 14 Tə̂ äwä Ɨrɨ nə səkɔ də̂ tshə djɔ̂ əzə̂ lə əmbrʉ ərə gâ ye â gbâ tshelə anyaka lə kumu əzə̂ gâ ye kɔ.

15 Kristə nə sə tə foto Ndjapä ə̂në əzü bale wu ətshə wu ne kɔ. Tshə sə tə yiya lə aərə nɔ̂ ə̂në Ndjapä mbrə̂ gâ ye kɔ. 16 Mbrə ə̂në tə̂ äwä ye də̂ Ndjapä mbrə̂ aərə nɔ̂ ə̂në ə sə mâ lafɔ â sə ndje pâ ashɔ kɔ, aərə ə̂në azü wu ə wu kɔ də aərə ə̂në azü wu wu ne kɔ, ambata ngerə də angerə, aawlra gâ ndə ayirə̂ ə̂në əndje za ama kɔ. Tə̂ äwä ye, ndje mbrə ətshə də̂ Ndjapä nə mbrə̂ aərə nɔ̂ kɔ. 17 Tshə sə angbʉlînə je tə̂ aərə nɔ̂ â aərə nɔ̂ daka pə kpə mandânə tə̂ äwä ye. 18 Ətshə kə sə tə kumu tshekotə̂ ə̂në ə tə nə kə də̂ Laglizə kɔ. Tshə sə tə kumu kə vɔtə̂ aərə nɔ̂, tə əlî əzü kə she lə takpa tə̂ akuzu, kanika, lə aərə nɔ̂, tshə sə əlî nə. 19 Mbrə ə̂në Ndjapä nə wû tə ə̂rɔ̂nə ndə kə pa əne sə tshegege lə ye, 20 â, tə̂ äwä ye, əne she tshelə takpa tə̂ əne də ə̂tə̂ əne də aərə nɔ̂ gâ mandânə, aərə ə̂në ə sə pâ ashɔ də aərə ə̂në ə sə mâ lafɔ kɔ; â, tə̂ äwä ə̈ndjï Ɨrɨ nə ə̂në ə tû la masheyɔ kɔ, tshə mbrə̂ blatshe.

21 Ə də̂ ənə̂ e, e sə̂ leme-e tə atshângâ, tə alayïkowɔ nə̂ Ndjapä tə̂ äwä kə tegbɔ kumu e də aəmbrʉ aərə ə̂në e mbrə̂ gâ ye kɔ. 22 Bale kpəsəye, Ndjapä nə shê tshelə takpa tə̂ ye də e gâ mandânə gâ ye tə̂ äwä kuzu Ɨrɨ nə ə̂në tshekotə̂ ye nə̂ əzü wû əyo gâ ye, ndə kə pa tshə ko e, e ka gâ ətshi ye tə azü ə̂në əndje sə kpî ə sə mvo, ə sə sə də əpʉ lə kumu əndje bale ne kɔ. 23 Bale, ə lï ndə kə pa e daka pə tə̂ äwä əpʉ lɔsu, e kä kpirə̂ gâ pa nə, ə tshï tshï äwä ərə ə̂në Ə̂rɔ̂ Əpʉ ə pa ndə nə ə̂në e za lɔsu e gâ pâ nə kɔ tʉ ne. E djî Ə̂rɔ̂ Əpʉ səkɔ gâ ye; əndje mʉ̂ lə takpa tə̂ aərə nɔ̂ ə̂në ə sə pâ ashɔ kɔ, â əmə Palɔ, mə sə tə əyïkosəra Ə̂rɔ̂ Əpʉ səkɔ.

24 Kpəsəye, lɔsu əmə sə də ə̂rû mbrə əyo ə̂në mə sə kə wu nə mbrə e kɔ. Mbrə ə̂në, lə akwa əmə, mə daka pə kə wu əyo mandâ Kristə nə mbrə Laglizə ə̂në ə sə tə tshekotə̂ ye kɔ. 25 Mə dô tə̂ əmə tə əyïkosəra nə̂ Laglizə nə ndə kə pa mə mbrə kosəra ə̂në Ndjapä zâ kə əmə ndə kə mbrə nə kɔ: mə lï ndə kə mʉ Əpʉ Ndjapä nɔ̂ kə e. 26 Əpʉ səkɔ sə tə lengerə əpʉ ə̂në Ndjapä zâ wû tə̂ azü nɔ̂ leme-e kerə. Bale kpəsəye, tshə yîsə̂ tshelə âdâ nə gashu kə azü nə̂ ye gâ ye. 27 Mbrə ə̂në Ndjapä nə yində kə yisə̂ kə gerə lengerə əpʉ səkɔ də ə̂rɔ̂ ərə nə kə azü ə̂në əndje sə sə tə Ajuwufu ne kɔ, â lengerə əpʉ səkɔ kə səye: Kristə sə tə̂ lɔsu e, tə ərə ə̂në e za lɔsu e gâ pâ nə mbrə ə̂yî ə̂në ə na gu nə je kɔ. 28 Ətshə, Kristə nə, də̂ ä pa əpʉ ye kə azü kɔ. Ä sə kə gbətɔ kakotu azü nɔ̂ ə sə kə yisə̂ ərə kə azü nɔ̂ tə̂ äwä kə wusə̂ âdâ ərə nɔ̂, kanika azü nɔ̂ do tə̂ əndje tə azü ə̂në əndje nê gâ ye lə əpʉ Kristə nə. 29 Âdârə ə̂në mə sə kə mbrə kosəra, â sə kə mbrə awlra tə̂ äwä awlra nə̂ Kristə nə ə̂në ə sə kə mbrə kosəra lə əmə də awlra kɔ.