1 «Əmə, mə də̂ djatra ayɔ vinyə, Abä əmə sə tə əyïnga vinyə nə. 2 Ayana ayɔ nə nɔ̂ ə̂në ə tɔ tə̂ əmə, ə̂në ə le le ne kɔ, tshə sə kə de nə gâ tʉ, â ayana ayɔ nə nɔ̂ ə̂në ə le kɔ, tshə sə kə de aəmbrʉ nə lə nə, ndə kə pa ə le kwatəndje ro pâ nə. 3 E-e, e sə̂ ənə̂ e mvo gâ ye mbrə əpʉ ə̂në mə yîsə̂ nə kə e gâ ye kɔ. 4 E däka pə lə əmə, mata ə̂në mə sə lə e kɔ. Yana ayɔ vinyə lï lï ndə kə le nə də ə̂tə̂ ye ne, kədə ə da daka pə tə ayɔ nə ne, äwä bale ndje, e-e, e lï lï ndə kə le nə ne, kədə e da daka pə lə əmə ne.

5 «Əmə, mə də̂ ayɔ vinyə nə, e-e, e sə tə ayana ayɔ nə. Əzü ə̂në tshə daka pə lə əmə, â əmə, mə daka pə lə ye, tshə sə kə le nə ngbatshe, mbrə ə̂në e â gi tə̂ e gashe tə̂ əmə, e lï lï ndə kə mbrə ə̈bə̈ ərə bale ne. 6 Kədə ə̈bə̈ əzü kə da daka pə lə əmə ne, əndje sə kə wli ətshə gashu mata yana ayɔ, tshə sə kə orɔ nə; əndje sə kə rɔ ayana ayɔ nə ə ko wli gâ lə ala əwo â ə ju. 7 Kədə e daka pə lə əmə â aəpʉ nə̂ əmə daka pə tə̂ lɔsu e, e yü tshuku aərə nɔ̂ ə̂në tshelə e yində nə, e sə kə sɔtə̂ nə. 8 Kədə e le ngbatshe â yisə̂ nə rə ə pa e sə tə atrawaya nə̂ əmə, e sə kə mbe Abä əmə kə sə̂. 9 Mata ə̂në Abä yində əmə kɔ, əmə ndje, mə yində e. E däka pə lə kə yində e ə̂në mə yində e kɔ. 10 Kədə e sə kə bata aəpʉ ə̂në mə za ama də nə kɔ, e sə kə daka pə lə kə yi tə̂ nə̂ əmə, mata ə̂në mə bâta aəpʉ ə̂në Abä əmə zâ ama də nə kɔ â mə daka pə lə kə yi tə̂ nə̂ ye nə kɔ.

11 «Mə pâ əpʉ kə e rə ndə kə pa ə̂rû nə̂ əmə sə tə̂ lɔsu e ka ə̂rû nə̂ e nə lï nɔ̂. 12 Əpʉ ə̂në mə sə kə za ama də nə kə e kɔ kə səye: e yï tə̂ e lə takpa tə̂ e, mata ə̂në mə yîndə e kɔ. 13 Ə̈bə̈ âgbɔ̂ kə yi tə̂ ə̂në ə ro ənə̂ sə̂ ə̂në əzü ka tə̂ ye də sorô ye nɔ̂ mbrə agbɔbəngâ nə kɔ guta gu ne. 14 E-e, e sə tə agbɔbəngâ əmə kədə e sə kə mbrə ərə ə̂në əmə, mə za ama də nə kə e kɔ. 15 Mə sə sə kə e e kwatə̂mə tə alayïkosəra ne, mbrə ə̂në əyïkosəra wusə̂ ərə ə̂në âgbɔ̂ əzü nə̂ ye ə mbrə kɔ wu ne. Mə ê e tə agbɔbəngâ, mbrə ə̂në, aərə nɔ̂ ə̂në mə djî lə ama Abä əmə kɔ, mə yîsə̂ nə kə e gâ ye. 16 Ə də̂ e də̂ kə kê əmə kɔ ne, əmə, mə kê e ə wlâ e ndə kə pa, e-e, e na na ye ə le ka kə le e nə daka pə je, kanika aərə nɔ̂ ə̂në e sə kə yu tshuku nə kə Abä də əɨrɨ əmə kɔ, tshə sə kə ko kə e. 17 Ərə ə̂në mə sə kə za ama də əpʉ nə kə e kɔ kə də̂ kə pa e yi tə̂ e lə takpa tə̂ e.»

18 «Kədə tshelə azü tshepashɔ kə wəra tə̂ əndje tə̂ e, e wusə̂ nə ə pa tshelə əndje wə̂ra tə̂ əndje tə̂ əmə angbʉlînə tə̂ e gâ ye. 19 Kədə e sə̂ kəmə tə azü tshepashɔ nə, tshepashɔ nə sə̂ kə yi kəmə ndə e mbrə ə̂në e sə̂ tə ənə̂ tshepashɔ nə. Bale, mbrə ə̂në, e sə sə tə azü tshepashɔ nə ne, ə̂në mə kê e lə takpa tə̂ azü tshepashɔ nə gâ ye kɔ, mbrə nə, tshelə azü tshepashɔ nə sə kə wəra tə̂ əndje tə̂ e. 20 E lï tshelə e gâ pâ əpʉ ə̂në, əmə, mə pâ kə e ə pa: "Əyïkosəra ro ro âgbɔ̂ əzü nə̂ ye ne." Ə̂në əndje gî əyo tə̂ əmə gâ ye kɔ, əndje gi əyo tə̂ e ndje je; kədə əndje bâta aəpʉ nə̂ əmə, əndje bata aəpʉ nə̂ e ndje je.

21 «Bale, əndje sə kə mbrə aərə səkɔ nɔ̂ gâ tə̂ e mbrə əɨrɨ əmə, mbrə ə̂në əndje wusə̂ əzü ə̂në tshə wlâ əmə kɔ wu ne. 22 Kədə mə nâ kəmə nâ ne â pâ kəmə əpʉ pâ kə əndje ne, nyaka sə̂ sə̂ kə sə kəmə lə kumu əndje ne. Bale, kpəsəye, əndje sə sə də ə̈bə̈ əpʉ kə pa nə mbrə nyaka nə̂ əndje nə ne.

23 «Əzü ə̂në tshelə ye wəra tə̂ ye tə̂ əmə, tshelə ye wəra tə̂ ye ndje tə̂ Abä əmə. 24 Kədə mə mâ mâ kəmə, lə takpa tə̂ əndje, aərə ə̂në ə̈bə̈ əzü kpî mâ mâ ne kɔ, nyaka sə̂ sə̂ kə sə kəmə lə kumu əndje ne. Bale kpəsəye, əndje wû gâ ye, â tshelə əndje wə̂ra tə̂ əndje tə̂ ä, əmə gâ ndə Abä əmə. 25 Bale, ə sə ndə kə pa, əpʉ sə̂ ə̂në əndje tâ lə âgbɔ̂ əpʉ nə̂ əndje kɔ, ndəma nə mbrə, ə̂në əndje tâ ə pa: "Tshelə əndje wəra tə̂ əndje tə̂ əmə yera ambanə."*15.25 Wu Ətsh 35.19; 69.5.

26 «Alɔ ə̂në Awotɨ azü nə, ətshə ə̂në, əmə, mə sə kə za ətshə mâ ndə Abä ə wla ətshə kɔ, tə Yîrə̂ djatra əpʉ ə̂në tshə to mâ ndə Abä kɔ â na kɔ, ətshə kə pa əpʉ gâ pâ əpʉ nə̂ əmə. 27 Â e-e ndje, e pa əpʉ gâ pâ əpʉ nə̂ əmə je, mbrə ə̂në a də e sə kpə ə̂sə̂ nə kerə pə tə̂ ama nə.»