1 Ayî, mə yində nə ə pa e wusə̂ nə ə pa awlra ə̂në mə sə kə mbrə nə mbrə e, mbrə alaye mâ Lawodise, ndje mbrə azü nɔ̂ ə̂në əndje wu ala əmə wu alɔ bale ne kɔ gbɔ ə gbɔ. 2 Mə yində nə ə pa əndje gbɔ ə gbɔ, ə sə bale tə̂ äwä kə yi tə̂ əndje, ə sɔtə̂ kə wusə̂ ərə ro pâ nə, ndə kə pa əndje wusə̂ âdâ lengerə əpʉ nə̂ Ndjapä, ə̂në ə tə nə kə də̂ Kristə nə kɔ. 3 Ndjapä kô aə̂rɔ̂ aərə kə wusə̂ âdâ aərə də kə wusə̂ aərə nɔ̂ wû gâ ye lə Kristə nə. 4 Mə pa əpʉ səkɔ ndə kə pa ə̈bə̈ əzü bale frɔ e frɔ də aâtshɔ̂ aəpʉ tshelə ama ye ne. 5 Ngâ, ə̂në mə sə sə lə takpa tə̂ e də əndu əmə ne kɔ, lɔsu əmə sə gâ pâ e. Mə sə də ə̂rû ndə kə wu ə pa aərə nɔ̂ sə kə na də äwänə lə takpa tə̂ e, â lɔsu e daka pə nge nge nge lə Kristə nə.

6 Rəkɔ, mata ə̂në e sɔ̂tə̂ Jezu Kristə, Âgbɔ̂ Əyïngerə gâ ye kɔ, e mbrə̈ tə̂ e tə azü ə̂në əndje tɔ̂ popo ətshə gâ ye kɔ. 7 Aəshe e lï lə ye, e gërə lə ye ə gbɔ̈gbɔ tə̂ e lə əpʉ lɔsu, ə lï də ərə ə̂në əndje yîsə̂ nə kə e gâ ye kɔ, ə zä mərshe ngbatshe kə Ndjapä.

8 Ala e në kanika ə̈bə̈ əzü bale frɔ e frɔ ka e te gâ lə ə̂kû əpʉ kə wusə̂ ərə nə̂ azü tshepashɔ səye ne! Ə sə tə aəpʉ əterə ə̂në ə̈bə̈ ərə bale sə sə lə nə ne, ə̂në ə ka gâ pâ mandʉ ərə nə̂ azü də alabə̈ aərə tshepashɔ kɔ, ə̂në ə ka ka gâ pâ Kristə nə ne kɔ. 9 Mbrə ə̂në Ndjapä nə sə je tshegege lə Kristə nə də əndu ye. 10 Tə̂ äwä Kristə nə, e sɔ̂tə̂ aə̂rɔ̂ aərə ə̂në ə rô pâ nə gâ ye, mbrə ə̂në tshə sə gâ pâ aawlra nɔ̂ də ayirə̂ ə̂në əndje za ama kɔ nɔ̂.

11 Lə Kristə nə də̂ e wâ ndje gandja ə̂në ə də̂ kəna əzü də̂ kə wâ e də nə kɔ ne. Bale, e wâ də̂ gandja ə̂në Kristə nə kə yu tshuku nə kɔ, gandja ə̂në ə djɔ e lə ərə ə̂në ə gi əzü gâ tə̂ äwä nyaka kɔ. 12 Tə̂ äwä batamo ə̂në e zâ kɔ, əndje shî e də Kristə nə äwä bale gâ ye, â lə ye, e də aəndje shê ndje äwä bale lə takpa tə̂ akuzu gâ ye, mbrə ə̂në e zâ lɔsu e gâ pâ awlra nə̂ Ndjapä ə̂në ə shê ətshə lə takpa tə̂ akuzu nə gâ ye kɔ. 13 Leme-e, e sə̂ tə azü ə̂në e tshû gâ ye mbrə anyaka ə̂në e mbrə̂ gâ ye kɔ, ndje mbrə ə̂në e wâ gandja wâ ne kɔ. Bale, Ndjapä nə mbrə̂ e tə asorô gâ ndə Kristə nə gâ ye. Tshə gbâ tshelə anyaka nə̂ əzə̂ nɔ̂ lə kumu əzə̂ gâ ye, 14 tshə gbâ tshelə fraka ə̂në əndje tâ tə̂ əzə̂ gâ ye, ə̂në ə yîsə̂ aərə ə̂në a mbrə̂ ə lï lï də aəpʉ tshelə âgbɔ̂ əpʉ ne kɔ. Tshə lîwu tshelə nə gâ ye alɔ ə̂në tshə kû gâ ala masheyɔ gâ ye kɔ. 15 Kôto, tshə djɔ̂ awlra tə̂ ayirə̂ awlra nɔ̂ də ayirə̂ ə̂në əndje za ama kɔ nɔ̂ gâ ye, â kô əndje ə mâ əndje gashu nga ətshi azü nɔ̂ tə ərə məlɔ â gbə̂tɔ əndje na na ye mandâ ye, alɔ ə̂në tshə wâ əndje la masheyɔ nə gâ ye kɔ.

16 Bale rəkɔ, ə̈bə̈ əzü bale wä wä ngbanga gâ lə kumu e mbrə ərə ə̂në e sə kə zɨ nə wala ə ndju kɔ ne, wala mbrə əpʉ sandaga wala əpʉ tafa yipʉ wala əpʉ saaba ne. 17 Aərə sə̂ nɔ̂ kɔ sə kʉ tə tshekojerɔ aərə ə̂në ə wutu je kɔ, bale djatra ərə nə kə də̂ Kristə nə. 18 E kä kätə̂ äwä kə azü ə̂në tshelə əndje ə mɔ tə̂ äwä kə mbrə tə̂ əndje tə aəngʉ azü ə vrɔ atrawaya nə̂ Ndjapä kɔ əndje wa ngbanga gâ lə kumu e ne. Əndje yi tə̂ əndje gâ lə aərə ə̂në əndje wu lə aə̈lü kɔ, wuma rô pâ əndje gâ ye mbrə aəpʉ lɔsu əndje nə̂ azü. 19 Əndje tɔ tɔ popo Kristə nə, ə̂në tshə sə tə kumu kɔ ne. Mbrə ətshə kumu də̂ tshekotə̂ tshegege sə kə gerə nə, mata ə̂në tshelə Ndjapä yində nə kɔ, mbrə ə̂në atshelə akəshe də akone sə kə mbrə kosəra kʉ bale ə sə kpə ə̂sə̂ nə kʉ bale.

20 Ə̂në e də a-Kristə tshû tə̂ aərə tshepashɔ gâ ye kɔ, bale mbrə yekɔ də̂, a pa də e daka pə tə azü tshepashɔ səye, â azü sə kə za ama kə e də amarä aəpʉ rəke ə̂në ə pa: 21 «Zä ərə səye zä ne! Trä ərə səye trä ne! Gö göro ne!» kɔ? 22 Aərə sə̂ nɔ̂ kɔ sə tə aərə ə̂në əndje gâmba gâ ye ndə kə pa əndje mbrə də ərə ə ro. Ə sə kʉ tə âgbɔ̂ əpʉ gâ ndə kə yisə̂ ərə nə̂ azü, 23 ə̂në, tə djatra əpʉ, ə ko əpʉ kə wusə̂ âdâ ərə, mbrə ə̂në aəpʉ mata: kə vrɔ Ndjapä ndə tshelə əzü, kə mbrə tə̂ əzü tə əngʉ nə, əzü za tshekotə̂ ye gi əyo kɔ, tɔ tɔ gâ tə̂ ə̈bə̈ ərə bale ne, bale ə sə kʉ tə ərə ndə kə pa ə lï də aəgo lɔsu əzü.