1 Əpʉ səye sə tə djatra əpʉ: kədə əbə əzü kə ma əgo kə sə gâ tə̂ kumu Laglizə, ə̂rɔ̂ kosəra kə sə̂ â tshə ma əgo nə kɔ. 2 Rəkɔ, ə lï ndə kə pa əzü ə̂në tshə sə gâ tə̂ kumu Laglizə nə kɔ, ə̈bə̈ əpʉ bale sə sə lə kumu ye ne, tshə sə̈ də yashe kʉ bale, tshə mbrə̈ ərə mbrə̈ kʉ ngbaa ne, ə wüsə̂ kə tegbɔ kumu ye, tshə mbrə̈ tə̂ ye tə əzü ə̂në tshə lʉ tə̂ ye, tshə wüsə̂ kə ko ayirə gâ tə̂ ye, tshə sə̈ tə əzü ə̂në tshə lï ndə kə yisə̂ ərə kə azü, 3 tshə sə̈ sə̈ tə awondju ə̂pî wala tə awombrə koshe ne, bale, tshə mbrə̈ tə̂ ye lə zɨtɨnə, tshə sə̈ tə əzü ə̂në blatshe sə lə takpa tə̂ ye də angâ nə, əgo ngendja sə̈ sə̈ tə̂ lɔsu ye ne, 4 tshə wüsə̂ kə yisə̂ äwä kə azü tshelə anda nə̂ ye tə ə̂rɔ̂nə, tshə bäta aneshe nə̂ ye tə̂ äwä kə dji əpʉ ama, də kə lʉ azü. 5 Mbrə ə̂në kədə ə̈bə̈ əzü kə wusə̂ kə yisə̂ äwä wu kə azü tshelə anda nə̂ ye də ə̂tə̂ ye ne, tshə sə kə bata Laglizə nə̂ Ndjapä nə atâ a? 6 Əzü ə̂në tshə sə gâ tə̂ kumu Laglizə, tshə lï lï ndə kə sə tə əzü ə̂në tshə zâ lɔsu ye kə Kristə nə tə tafa nə ne, kanika wuma bu ala ye bu ka tshə te gâ tshekudu ngbanga mata djablo ne. 7 Ə lï ndje ndə kə pa azü ə̂në əndje sə sə lə Laglizə nə ne kɔ pa ə̂rɔ̂ əpʉ nə̂ ye, ndə kə pa azü pa tə̂ ye pa, tshə te te ndje lə ə̂kû nə̂ djablo ne.

8 Adiakrə, äwä bale ndje, lï ndə kə pa əndje lʉ tə̂ əndje, ə sə̈ sə̈ də əpʉ ama bishi bishi ne, əndje ndjü duva ndjü ə mbrə̈ əndje ə mbrə̈ ne, əndje sə̈ sə̈ də əgo kə sɔtə̂ aərə tə̂ äwä aərə gana ne. 9 Əndje lï ndə kə pa əndje bata əpʉ lɔsu ə̂në əndje yîsə̂ nə gashu kɔ də lɔsu ə̂në ə sə mvo kɔ. 10 Ə lï ndə kə pa əndje tra əndje angbʉlînə ə wu gâ ye kane, ka gâ mandânə, əndje mbrə kosəra nə, kədə əpʉ kə sə sə lə kumu əndje ne. 11 Ayashe nə ndje lʉ̈ tə̂ əndje, ə sə̈ sə̈ tə azü kə pa tə̂ angâ əndje ne, əndje mbrə̈ ərə mbrə̈ kʉ ngbaa ne, əndje sə̈ tə azü ə̂në əndje lï ndə kə pa azü za lɔsu əndje gâ pâ əndje lə aərə nɔ̂. 12 Adiakrə lï ndə kə pa əndje sə də yashe kʉ kpiabale, ə wüsə̂ kə yisə̂ äwä tə ə̂rɔ̂nə kə aneshe nə̂ əndje də azü tshelə anda nə̂ əndje də ə̂tə̂ əndje nɔ̂. 13 Mbrə ə̂në azü ə̂në əndje mbrə kosəra diakrə nə tə ə̂rɔ̂nə, azü sə kə lʉ əndje â əndje sə sə də awa lə əpʉ lɔsu nə ə̂në əndje zâ kə Jezu Kristə nə kɔ ne.

14 Mə ta fraka səye kə əbə ə wusə̂ nə ə pa mə na katshä katshä səye ə wu əbə je, 15 kanika, kədə əndʉ əmə sə pə kə dɨ nə, bə wusə̂ äwä ə̂në bə lï ndə kə pa bə mbrə tə̂ zə lə takpa tə̂ azü nə̂ Ndjapä, ə̂në ə tə nə də̂ Laglizə nə̂ Ndjapä ə̂në tshə sə tə sorô kɔ, ə̂në ə sə kə tɨ djatra əpʉ gâ lafɔ â sə kə bata äwä nə kɔ. 16 Â ə lï ndə kə pa a wusə̂ nə ə pa lengerə əpʉ lɔsu nə sə tə âgbɔ̂ ərə, əpʉ nə kə də̂:

Kristə nə mâ tə̂ ye gashu tə əzü kə azü nɔ̂,

Âgbɔ̂ Yîrə̂ yîsə̂ nə ə pa tshə sə tə ə̂rɔ̂ əzü,

atrawaya nə̂ Ndjapä wû ətshə.

Əndje mʉ̂ əpʉ ye lə takpa tə̂ amarä ə̂në əndje sə sə tə Ajuwufu ne kɔ,

azü tshepashɔ zâ lɔsu əndje kə ətshə,

əndje zâ ətshə o na ye gâ lafɔ lə ə̂yî.