1 Əgbro azü, e mbrə̈ tə̂ akanga nə̂ e tə ə̂rɔ̂nə də äwänə, ə wüsə̂ nə ə pa, e-e ndje, e sə də âgbɔ̂ əzü nə̂ e ə̂në tshe sə mâ lafɔ kɔ.

2 E zä tə̂ e alɔnɔ̂ gâ tə̂ äwä kə yu Ndjapä. E gbɔ̈ də äwänə, ə wüsə̂ kə za mərshe kə Ndjapä. 3 E yü Ndjapä ndje mbrə ä kanika Ndjapä nə krɔ äwä kə ä ndə kə yisə̂ əpʉ nə̂ ye, ndə kə yisə̂ lengerə əpʉ ərə ə̂në tshə gâmba gâ pâ əpʉ Kristə gâ ye kɔ gashu, ə̂në mbrə nə də̂ mə sə lə anda kânga kɔ. 4 E yü Ndjapä nə ndə kə pa mə pa ndə əpʉ nə orâ orâ, ə lï də äwä kə pa ndə nə.

5 E mbrə̈ tə̂ e tə azü kə wusə̂ ərə gâ tə̂ azü ə̂në əndje sə sə tə azü nə̂ Kristə nə ne kɔ. Alɔ rö rö tə̂ e tə ambanə ne. 6 Aəpʉ tshelə ama e sə̈ tə aə̂rɔ̂ aəpʉ alɔnɔ̂, ə̂në ə to ə to tə̂ azü kɔ, kanika e wusə̂ äwä kə kirə əpʉ Lïndə̂ nə kə əzü bale bale.

7 Tishikə, tə aye əzə̂ ə̂në mə yində ye tə bandanə kɔ, ə pa ndəma aəpʉ nɔ̂ gâ pâ əpʉ əmə kə e je. Tshə sə tə əyïkosəra ə̂në tshə lï â sə tə gbɔbəngâ əmə lə kosəra nə̂ Âgbɔ̂ Əyïngerə. 8 Mə wla ətshə kə e tshî ndə kə pa e wusə̂ əpʉ gâ pâ kə sə ä, ndje ndə kə pa tshə gbɔgbɔ lɔsu e. 9 Mə wla əndje də Ɔnezimə ə̂në tshə sə tə aye ə̂në mə yində ye tə bandanə kɔ, ə̂në tshə lï, ə̂në tshə sə tə ə̈bə̈ əzü nə̂ e kɔ. Əndje pa ndə əpʉ aərə nɔ̂ ə̂në ə wutu mâtəye kɔ kə e je.

10 Arisətarkə, gbɔbəngâ əmə lə anda kânga, gâ ndə Markə, aye Barənabasə, bla e. E djî aəpʉ gâ pâ əpʉ nə̂ Markə nə gâ ye: kədə tshə na ndə kə wu e, e zä ətshə gâ tə̂ e tə ə̂rɔ̂nə. 11 Jezu, ə̂në əndje ê ətshə ndje ə pa Justusə kɔ, bla e ndje. Lə takpa tə̂ Ajuwufu ə̂në əndje zâ lɔsu əndje kə Kristə gâ ye kɔ, kʉtə̂ əndje də̂ ä də aəndje ə mbrə kosəra mbrə Əgɔngerə nə̂ Ndjapä nə kɔ. Əndje kə gbɔgbɔ lɔsu əmə kɔ.

12 Epafrasə, ə̂në tshə sə ndje tə ə̈bə̈ əzü nə̂ e kɔ bla e; tshə sə tə əyïkosəra nə̂ Jezu Kristə, tshə ka katə̂ kə ma awlra mbrə e tə̂ äwä kə yu Ndjapä ne, kanika lɔsu e daka pə kpə mandânə, ka e nê lə əpʉ lɔsu ə mbrə aərə ə lï də ərə ə̂në tshelə Ndjapä yində nə kɔ. 13 Mə sə kə pa ə̂rɔ̂ əpʉ səye gâ pâ əpʉ nə̂ ye ə pa tshə sə kə wu əyo ngbatshe mbrə e, mbrə azü əgɔ Lawodise gâ ndə azü gala Hiyerapɔlisə. 14 Luki, tə dokotɔrə ə̂në mə yində ye tə bandanə kɔ, gâ ndə Demasə bla e.

15 E blä alaye ə̂në əndje sə mâ Lawodise nə kɔ, də Nefa gâ ndə Laglizə ə̂në ə sə lə anda nə̂ ye kɔ kə ä. 16 Alɔ ə̂në e dɨ əpʉ tshelə fraka səye lə takpa tə̂ e gâ ye, e mbrə̈ nɔ̂ ndə kə pa əndje dɨ ndje lə Laglizə gala Lawodise nə, â, e-e ndje, e dɨ̈ ndje ənə̂ sə̂ ə̂në ə to mâ Lawodise je ə wutu mâ ndə e nə kɔ. 17 E pä kə Arshipə ə pa ala ye në tə̂ kosəra ə̂në tshə sɔ̂tə̂ nə ə mbrə kə Âgbɔ̂ Əyïngerə kɔ, ndə kə pa tshə mbrə də äwänə.

18 Əmə Palɔ, mə ta aəpʉ səke də kəna əmə kə e, ndə kə bla e. E lï tshelə e gâ pâ kə sə əmə lə anda kânga! Ndjapä mbrə̈ ə̂rɔ̂tə̂ ye kə e!