1 Alaye əmə, e ngbä ngbä ndə kə pa e sə tə aawoyisə̂ ərə kə azü ne! E wusə̂ nə ə pa Ndjapä ə wa ngbanga gâ lə kumu əzə̂ də̂ aawoyisə̂ ərə ə ro ə̂dû azü je. 2 Əzə̂ nɔ̂, a sə kə djingli äwä lə aərə ngbatshe. Kədə ə̈bə̈ əzü kə djingli äwä djingli lə əpʉ ama ye ne, tshə sə tə əzü ə̂në tshə nê gâ ye, tshə lï ndə kə pa tshə ru tshelə ye də əndu ye nɔ̂. 3 Kədə a ko aə̂wû gâ lə aama ambrata ndə kə pa əndje mbrə ərə Lïndə̂ äwä ə̂në a sə kə yisə̂ nə kə əndje kɔ, a sə ndje kə yisə̂ äwä kə əndu əndje nə nɔ̂. 4 E wü ndje abato: ə̂në ə gbo ə gbro kɔ, â ə̂në âgbɔ̂ əyi gi ə gi na na ye kɔ, aawokpe də nə kə yisə̂ äwä kə əndje tə̂ äwä ə̈bə̈ aya kaye, Lïndə̂ äwä ə̂në tshelə aawokpe də nə yində nə kɔ. 5 Äwä bale ndje, tima sə tə ə̈bə̈ aya ərə tshekotə̂ əzü, bale ə sə kə tra tə̂ ye tə̂ əgbro aərə ngbatshe.Ə̂wû tshelə ama mbrata

E wü äwä ə̂në ə̈bə̈ aya əwo lï ndə kə pa ə ju əgerə gbakɔ hao kɔ! 6 Kandää tima sə ndje tə əwo. Ə sə tə ə̂sə̂ əmbrʉ ərə. Tima sə tə ə̈bə̈ ərə tshekotə̂ əzü, ə sə kə dja tshekotə̂ əzü nɔ̂ â sə kə ju sorô əzü nɔ̂ pâ ashɔ, tə̂ äwä əwo ə̂në ə to tə̂ ətshe ə̂në əwo rɨ rɨ tə̂ ərə ne kɔ. 7 Əzü lï ndə kə pa tshə ko amarä aagia tshelə güsü nɔ̂, də ayanu, də aagia ə̂në əndje ɔ ə orɔ kɔ gâ ndə aagia tshelə aə̂ngû əngbrʉ ə mbrə əndje tə̂ aagia kə mbrə ərə Lïndə̂ aəpʉ ama ye. 8 Bale, ə̈bə̈ əzü bale lï lï ndə kə pa tshə mbrə tima tə ərə kə dji əpʉ ama ye ne. Tima sə tə ə̈bə̈ əmbrʉ rəka ə̂në ə kpe kʉ kra kra kra, ə su ə su də gîəsü kuzu lə nə. 9 Də tima əzə̂ də̂ a mbe Abä də Əyïlingû kɔ, â kʉ də tima əzə̂ nə də̂ a dra azü ə̂në Ndjapä mbrə̂ əndje ə̂në əndje ko ətshə kɔ. 10 Kʉ lə ama bale də̂ ə̂rɔ̂ əpʉ də əpʉ kə dra ətshe ə wutu lə nə kɔ. Alaye əmə, ə lï lï ndə kə pa ərə nə sə rə ne. 11 Lə əgro yasa bale âtshɔ̂ ə̂ngû də əshu ə̂ngû lï ndə kə pa ə wutu a? 12 Alaye əmə, ayɔ figə lï ndə kə pa ə le aə̂lê ɔlivə a? Wala ayɔ vinyə le aə̂lê figə a? Rəkɔ, yasa ə̂ngû ə̂në ə sə də əngbrʉ kɔ lï lï ndə kə pa âtshɔ̂ ə̂ngû gu lə nə ne.

13 Əde kə sə tə awowusə̂ âdâ ərə də awowusə̂ ərə lə takpa tə̂ e? Əzü nə səkɔ yisə̂ aərə ə̂në tshə mbrə kɔ gashu tə̂ äwä ə̂rɔ̂ kə mbrə tə̂ ye, lə zɨtɨ nə, ndje tə̂ äwä kə wusə̂ ərə nə. 14 Bale, kədə e sə də əshu kə za tshelə e gâ tə̂ angâ e də əgo kə ro angâ e lə aərə tə̂ lɔsu e, e dä əkro e dä tə̂ nə ne, ə pä əterə pa gbo djatra əpʉ ne. 15 Marä tə̂ kə wusə̂ ərə rə tô tô mâ lafɔ-e â jêrə kɔ ne; ə sə tə ənə̂ tshepashɔ, tə ənə̂ əzü, tə ənə̂ djablo. 16 Mbrə ə̂në, tə̂ ətshe ə̂në azü sə kə za tshelə əndje gâ tə̂ angâ əndje rô pâ nə â sə də əgo kə ro angâ əndje nə lə aərə kɔ, kə mbrə ərə mbrə də äwänə ne də kə mbrə adongo aəmbrʉ aərə nɔ̂ sə kə sə je. 17 Bale, kə wusə̂ ərə ə̂në ə to mâ lafɔ kɔ, ə sə ənə̂ ye, angbʉlînə mvo, mandânə ə na də blatshe kə əzü, ə ngbo tshelə takpa tə̂ azü gâ mandânə, ə mbrə ərə kʉ lə zɨtɨ nə, ə na də əpʉ kə wu əyo azü gâ tə̂ lɔsu ngbatshe ə zu aə̂rɔ̂ aərə ngbatshe, ə wu tshelə azü wu ə wu lə aərə ne, ə mbrə ərə kʉ də lɔsu bale. 18 Kandää, azü kə mbrə blatshe də azü sə kə lu kə mbrə ərə də äwänə, mata angwa rəgo, lə blatshe nə mbrə əndje.