1 E-e, e tshû mbrə aəmbrʉ aərə nə̂ e də anyaka nə̂ e gâ ye 2 ə̂në e zâ tə̂ e, leme-e, gâ tə̂ nə alɔ ə̂në e sə̂ kə mbrə aərə Lïndə̂ aərə tshepashɔ səye, ə̂në e sə̂ tshekudu əyïngerə tshelə əyi, tə yîrə̂ əmbrʉ ərə ə̂në tshə sə kə mbrə kosəra kpəsəye lə azü ə̂në əndje wə̂ra tə̂ əndje tə̂ Ndjapä gâ ye kɔ. 3 Əzə̂ nɔ̂ ndje, a sə̂ leme-e lə takpa tə̂ əndje ə sə̂ kə mbrə tə̂ əzə̂ Lïndə̂ aəgo lɔsu əzə̂, â sə̂ kə mbrə aərə ə̂në ə na gâ tə̂ lɔsu əzə̂ ndje gâ lə akrɔ əzə̂ kɔ, â əzə̂ lï kəmə rə də əkɔ nə̂ Ndjapä, mata ə̂dû azü nɔ̂.

4 Bale, Ndjapä nə sə kə wu əyo azü ngbatshe â sə kə yində əzə̂ tə bandanə. 5 Âdârə ə̂në, əzə̂ ə̂në a tshû mbrə aəmbrʉ aərə nə̂ əzə̂ nə gâ ye kɔ, tshə mbrə̂ əzə̂ də a-Kristə tə asorô gâ ye. Tə̂ äwä ə̂rɔ̂tə̂ Ndjapä də̂ e shê lə kuzu gâ ye kɔ. 6 Lə Jezu Kristə nə, Ndjapä nə shê əzə̂ də a-Kristə nə gâ ye â kô əzə̂ â əzə̂ də aəndje sə̂ gâ tʉ mâ lafɔ gâ ye, 7 ndə kə pa tshə yisə̂ nə gashu, tə̂ alɔ ə̂në ə sə kə na gu nə kɔ, ə pa ə̂rɔ̂tə̂ ye sə gâ pâ nə gâ pâ nə mbrə əzə̂ lə Jezu Kristə nə. 8 Mbrə ə̂në tə̂ äwä ə̂rɔ̂tə̂ Ndjapä nə də̂ e shê lə kuzu gâ ye kɔ, tə̂ äwä əpʉ lɔsu e kɔ. Ə sə tə âkrâ nə̂ Ndjapä, ə sə sə tə ərə ə̂në ə to mâ ndə e kɔ ne. 9 Ə sə sə tə̂ äwä aərə ə̂në əzü sə kə mbrə nə kɔ ne, ndə kə pa ə̈bə̈ əzü bale da da əkro ye ne. 10 Mbrə ə̂në a sə tə aərə kəna ye, tshə mbrə̂ əzə̂ lə Jezu Kristə nə gâ ye ndə kə pa a mbrə aə̂rɔ̂ aərə ə̂në tshə gâmba ətshinə gâ ye kɔ, ka a za tə̂ əzə̂ gâ tə̂ nə.

11 E lï tshelə e gâ pâ kə sə e leme-e ətshinə. Əndje zû e zû tə Ajuwufu ne â Ajuwufu nə sə̂ kə e e tə azü ə̂në e wa gandja wa ne kɔ, â sə kə e tə̂ əndje nə tə azü ə̂në əndje wâ ənə̂ əndje gandja gâ ye kɔ, mbrə ə̂në azü wâ əndje də gandja tə̂ akwa əndje gâ ye. 12 Tə̂ tshekɨ nə sə̂ leme-e kɔ, e sə̂ sə̂ də Kristə ne, e sə̂ sə̂ də ə̈bə̈ ərə bale lə aərə nə̂ azü əgɔ Isərayalə ne, e sə̂ sə̂ lə mbʉkʉ ə̂në Ndjapä zâ ama də əpʉ nə gâ ye kɔ ne, e sə̂ sə̂ pâ ashɔ də ə̈bə̈ ərə ə̂në e zâ lɔsu e gâ pâ nə ne â sə̂ sə̂ ndje də Ndjapä ne. 13 Bale kpəsəye, lə Jezu Kristə nə, e-e ə̂në e sə̂ leme-e ngrʉ̂ kɔ, Ndjapä gî e trö tə̂ ye gâ ye, tə̂ äwä ə̈ndjï Kristə nə ə̂në ə tû gâ ye kɔ. 14 Mbrə ə̂në ətshə kə sə tə blatshe nə̂ əzə̂, â mbrə̂ Ajuwufu də azü ə̂në əndje sə sə tə Ajuwufu ne kɔ tə marä nə̂ Ndjapä kʉ kpiabale. Alɔ ə̂në tshə kâ tə̂ ye la masheyɔ kɔ, tshə ngɔ̂ dati kə ia ətshe ə̂në ə mbrə̂ â əndje sə tə alayïkowɔ lə takpa tə̂ əndje kɔ gâ tʉ gâ ye. 15 Tshə lîwu âgbɔ̂ əpʉ nə̂ Mayïzə nə də aəpʉ tshelə nə nɔ̂ gâ ye, ndə kə pa tshə mbrə Ajuwufu nə də azü ə̂në əndje sə sə tə Ajuwufu nə ne kɔ kʉ tə tafa marä bale lə ye nə. Tə̂ äwä rə də̂ tshə nâ də blatshe nə kɔ. 16 Tə̂ äwä kuzu ye la masheyɔ nə, tshə ngbô Ajuwufu nə də azü nə ə̂në əndje sə sə tə Ajuwufu nə ne kɔ gâ tə̂ nə kʉ tə tshekotə̂ bale, â shê tshelə takpa tə̂ əndje də Ndjapä gâ tə̂ nə gâ ye. Tə̂ äwä masheyɔ nə, tshə lîwu kə ia ətshe nə gâ ye. 17 Rəkɔ, Kristə nə nâ gâ ye ndə kə pa tshə mʉ Ə̂rɔ̂ Əpʉ blatshe kə e ə̂në e sə̂ leme-e ngrʉ̂ kɔ, ndje kə azü ə̂në əndje sə̂ leme-e trö kɔ. 18 Mbrə ə̂në, tə̂ äwä Kristə nə, əzə̂ nɔ̂, Ajuwufu nə gâ ndə azü nə ə̂në əndje sə sə tə Ajuwufu nə ne kɔ, a sɔ̂tə̂ äwä kə na gâ tə̂ Ndjapä nə gâ ye, tə̂ äwä Âgbɔ̂ Yîrə̂ kʉ bale.

19 Âdârə ə̂në e sə sə kwatə̂-e tə atshângâ wala tə azü tshelə äwä ne kɔ kə sə̂. Bale e sə tə djatra azü nə̂ Ndjapä nə gâ ye mata ə̂dû əndje nə â e sə tə azü tshelə bəngʉ nə̂ Ndjapä nə. 20 E yî tə̂ e gâ lə kə mbrə anda gâ ye, ə̂në azü-awla gâ ndə aawopandəma Ndjapä sə mata ə̈nü anda nə kɔ â Jezu Kristə nə də ə̂tə̂ ye sə tə əkpʉ ə̂ngʉ̂ nə kɔ. 21 Lə Kristə nə də̂ anda nə nɔ̂ gbɔgbɔ tə̂ ye â o gâ lafɔ ndə kə pa ə mbrə tə Anda Ndjapä ə̂në ə sə kpî kʉ mbrə Âgbɔ̂ Əyïngerə kɔ. 22 Lə Kristə nə, e-e ndje, e sə tə aərə anda nə ə̂në əndje mbrə̂ kɔ, ndə kə pa, e-e də ə̂dû azü nə nɔ̂, e do tə̂ e tə anda ə̂në Ndjapä nə sə lə nə tə̂ äwä Yîrə̂ ye kɔ.