1 Ə̂në e sə tə aneshe ə̂në Ndjapä ə yində e ngbatshe kɔ, e mbrə̈ ərə mata Ndjapä nə, 2 kə sə e sə̈ lə kə yi tə̂, mata ə̂në Kristə nə ndje yîndə əzə̂ â kâ tə̂ ye tə ə̈bə̈ ərə əkrɔ, ə̂në ə fʉ ə fʉ kɔ, kə Ndjapä nə mbrə əzə̂ gâ ye kɔ.

3 E sə tə azü nə̂ Ndjapä, rəkɔ əpʉ kə mbrə ə̂trû də âkâ aəmbrʉ aərə gana nɔ̂ gâ ndə əgo aərə nɔ̂, əndje djï ndə nə djï lə takpa tə̂ e ne. 4 E pä pä aəpʉ kene də aəpʉ gana gâ ndə aəpʉ əndɨ ne, ə sə sə də äwänə ne. Bale, e pä də̂ aəpʉ kə za mərshe kə Ndjapä. 5 Mbrə ə̂në, e wüsə̂ nə ə pa, ə̈bə̈ əyïə̂trû wala awombrə aərə gana wala awoma əgo aərə nɔ̂ bale – kə ma əgo aərə nɔ̂ kə də̂ kə vrɔ amba ndjapä – sə sə kə li gâ lə Əgɔngerə nə̂ Kristə də Ndjapä ne.

6 Ə̈bə̈ əzü bale fɔ̈ frɔ̈ e tə̂ äwä aəpʉ ə̂në ə tɔ tɔ gâ tə̂ ə̈bə̈ ərə bale ne kɔ ne, mbrə ə̂në lə kumu ərə sə̂ də̂ əkɔ nə̂ Ndjapä ə te gâ pâ azü ə̂në əndje wəra tə̂ əndje tə̂ aəpʉ nə̂ ye kɔ. 7 Rəkɔ, e të të gâ lə aərə nə̂ əndje bale ne. 8 Leme-e, e sə̂ lə əbutshe, bale kpəsəye, e sə lə ə̂yîtshe lə Âgbɔ̂ Əyïngerə. E mbrə̈ tə̂ e tə azü tshelə ə̂yîtshe nə. 9 Mbrə ə̂në ə̂yîtshe wutu də âkâ kə mbrə ə̂rɔ̂ ərə də kə mbrə ərə də äwänə gâ ndə kə mbrə ərə tə̂ äwä djatra əpʉ gashu. 10 E wüsə̂ äwä kə yerɔ ərə ə̂në ə fʉ tə̂ Âgbɔ̂ Əyïngerə kɔ. 11 E yï yï tə̂ e gâ lə kə mbrə aərə nə̂ azü tshelə əbutshe ə̂në ə̈bə̈ ə̂rɔ̂ ərə sə sə lə nə ne kɔ ne; bale e pä ndə əpʉ nə gashu. 12 Mbrə ə̂në ə sə ndje tə ərə gana ndə kə pa ndəma aərə ə̂në əndje mbrə lə angbanə kɔ. 13 Bale, aərə sə nɔ̂ kɔ, kədə əpʉ nə kə wutu ngbʉ̂ gashu, ə̂yîtshe sə kə wutu də nə gashu orâ. 14 Mbrə ə̂në əpʉ ərə ə̂në ə wûtu ngâ gashu gâ ye kɔ kə də̂ ərə ə̂yîtshe. Âdârə ə̂në əndje pa əpʉ ə pa:

«Jö lə əlo, əbə ə̂në bə lo kɔ,

äfɔ gâ lafɔ lə takpa tə̂ akuzu,

ka Kristə nə tshe dji əbə»* kɔ kə sə̂.

15 Rəkɔ, ala e në tə̂ äwä kə mbrə tə̂ e: e mbrə̈ tə̂ e mbrə̈ mata aəndɨ ne, bale e mbrə̈ tə̂ e tə azü ə̂në kumu e sə tə̂ nə. 16 Alɔ rö rö tə̂ e ambanə ne, mbrə ə̂në aəlo tshe kpəsəye sə tə əmbrʉ nə. 17 Rəkɔ, e sə̈ sə̈ tə aəndɨ ne, bale e wüsə̂ ərə ə̂në Âgbɔ̂ Əyïngerə nə yində nə kɔ.

18 Ə̂pî mbrə̈ e mbrə̈ ne: ə sə kə na də əzü gâ tə̂ äwä kə mbrə əmbrʉ ərə. Bale, e kätə̂ äwä kə Âgbɔ̂ Yîrə̂ tshə su e ə su trɔ̂. 19 E pä əpʉ lə takpa tə̂ e lə aətshi də aətshi kə vrɔ ətshe gâ ndə aətshi ə̂në Âgbɔ̂ Yîrə̂ nə ə ko kə e kɔ. E vï aətshi ə tɔ̈lɔ Âgbɔ̂ Əyïngerə də lɔsu e nɔ̂. 20 E zä mərshe alɔnɔ̂ kə ətshə ə̂në tshə sə tə Abä də Ndjapä kɔ mbrə aərə nɔ̂ də əɨrɨ Âgbɔ̂ Əyïngerə nə̂ əzə̂ də Jezu Kristə nə.

21 E mbrə̈ tə̂ e teashe lə takpa tə̂ e mbrə kə kpe rawa Kristə nə ə̂në e kpe kɔ. 22 Rəkɔ, ayashe mbrə̈ tə̂ əndje teashe gâ ətshi aläkɔ̈ əndje, a pa də gâ ətshi Âgbɔ̂ Əyïngerə kə sə̂, 23 mbrə ə̂në koshe sə tə kumu yashe, mata ə̂në Kristə nə sə tə kumu Laglizə ə̂në ə sə tə tshekotə̂ ye â tshə sə tə Awoshe nə kɔ. 24 Mata ə̂në Laglizə sə kə mbrə tə̂ ye teashe ətshi Kristə kɔ, lə aərə nɔ̂, ayashe mbrə̈ tə̂ əndje teashe ətshi aläkɔ̈ əndje.

25 Akoshe, e yïndə alawɔ e mata ə̂në Kristə nə yîndə Laglizə nə kɔ: tshə kâ tə̂ ye mbrə nə, 26 ndə kə pa tshə yutu də ə̂ngû* gâ ndə Əpʉ kanika ə za kpî mbrə ətshə 27 ə wutu də Laglizə səkɔ lə ə̂yî gashu ətshi ye ka ə̈bə̈ ərə tshe tshekotə̂ nə tshe bale ne, wala tshekotə̂ nə ngbu ngbru gâ tə̂ nə ne, wala ə̈bə̈ əmbrʉ ərə sə sə tə̂ nə bale ne, bale ə sə kpî ə sə mvo. 28 Äwä bale ndje, akoshe lï ndə kə pa əndje yində alawɔ əndje mata tshekotə̂ əndje də ə̂tə̂ əndje. Əzü ə̂në tshə yində əwɔ nə, tshə yində ə̂tə̂ ye də ə̂tə̂ ye. 29 Mbrə ə̂në, alɔ bale tshelə ə̈bə̈ əzü wa wəra tə̂ ye də ə̂tə̂ ye tə̂ ye ne. Bale, əzü sə kə ko rəgo kə əndu ye â sə kə ga ndə nə, mata ə̂në Kristə nə ə mbrə mbrə Laglizə nə kɔ, 30 mbrə ə̂në əzə̂ sə tə aərə tshekotə̂ ye nə. 31 Mata ə̂në əndje tâ lə Fraka nə̂ Ndjapä ə pa: «Âdârə ə̂në koshe sə kə katə̂ abä nə də əyï nə tʉ â tɔ popo əwɔ nə â əndje bishi sə kə sə tə əzü kpiabale kɔ kə sə̂.»* 32 Ə̈bə̈ âgbɔ̂ djatra əpʉ ə̂në ə zâ tə̂ ye wû kɔ sə lə əpʉ səkɔ, â əmə, mə pa əpʉ səkɔ sə gâ pâ əpʉ nə̂ Kristə də Laglizə. 33 Əpʉ səkɔ wu e ndje: əzü bale bale lə takpa tə̂ e yïndə əwɔ nə mata ə̂në tshə yində ə̂tə̂ ye də ə̂tə̂ ye kɔ, ndje yashe kpë rawa äkɔ̈ nə.