1 Aneshe, e djï əpʉ ama alabä e də alayï e lə Âgbɔ̂ Əyïngerə nə, mbrə ə̂në ə sə də äwänə. 2 «Lʉ̈ abä zə də əyï zə» sə tə əlî əpʉ, lə aâgbɔ̂ aəpʉ morofo, ə̂në Ndjapä zâ ama də ə̈bə̈ əpʉ mandânə kɔ ə pa: 3 «kanika bə sə tə ə̂rɔ̂nə ə lo ʉrrr pâ ashɔ.»*

4 E-e ndje, alabä, e zä əkɔ zä gâ tə̂ lɔsu aneshe nə̂ e ne, bale e bäta əndje tə̂ äwä kə yisə̂ äwä kə əndje də kə mʉ aəpʉ nə̂ Âgbɔ̂ Əyïngerə gâ lə ətu əndje.

5 Akanga, e djï əpʉ ama alayïnga e pâ ashɔ səye də awa də kə gugu nə, də lɔsu e bale, a pa də Kristə də̂ e dji əpʉ ama ye kɔ. 6 Ə də̂ kʉ də ala əndje də̂ e mbrə ndə kə pa e za ə̂rû gâ tə̂ lɔsu azü kɔ ne, bale e mbrə̈, tə akanga nə̂ Kristə, ə̂në e sə kə mbrə ərə ə̂në tshelə Ndjapä yində nə də lɔsu e nɔ̂ kɔ. 7 E mbrə̈ kosəra də ə̂rɔ̂ lɔsu e, tə akanga nə̂ Âgbɔ̂ Əyïngerə ə də̂ tə əndje nə̂ azü də̂ ne. 8 E wusə̂ nə ə pa əzü bale bale, tə kanga wala tə amba əzü, ə sɔtə̂ ə̂rɔ̂ ərə ə̂në tshə sə kə mbrə nə də ə̂tə̂ ye kɔ lə kəna Âgbɔ̂ Əyïngerə je.

9 Ə də̂ ənə̂ e, alayïnga akanga nə, e mbrə̈ ndje kʉ rə kə akanga nə̂ e nə. E kätə̂ äwä kə yi kəna e gâ ətshi əndje gâ ye. E wusə̂ nə ə pa Əyïnga əndje ə̂në tshə sə ndje tə ənə̂ e nɔ̂ kɔ sə mâ lafɔ â tshə wu tshelə azü wu ə wu ne.

10 Ə̂dû əpʉ nə nɔ̂, e gbɔ̈ ə gbɔ̈ lə Âgbɔ̂ Əyïngerə nə, lə awlra nə̂ ye ə̂në ə rô aərə nɔ̂ gâ ye kɔ. 11 E yï aərə koshe nɔ̂ ə̂në Ndjapä kô kə əzə̂ kɔ gâ tə̂ e, kanika ə ka kpirə̂ ətshi aafrɔ aərə nə̂ djablo. 12 Mbrə ə̂në ə də̂ azü də̂ a də aəndje ə mbrə awlra nə kɔ ne, bale a sə kə mbrə awlra nə də aərə ə̂në ə sə də awlra kɔ, də aərə ə̂në ə sə kə za ama kɔ, də aərə ə̂në ə sə kə mbrə ngerə gâ pâ ashɔ ə̂në ə sə lə əbutshe kɔ gâ ndə aəmbrʉ ayirə̂ tshelə əyi djoko lafɔ kɔ. 13 Rəkɔ, e kö aərə koshe nɔ̂ ə̂në Ndjapä nə kô kə əzə̂ kɔ, kanika ə ka tə akoshe tə̂ alɔ əmbrʉ ərə ə ka kpirə̂, mandânə ə̂në e mbrə̂ awlra nə ʉrrr ndjɔ gâ tə̂ ama nə gâ ye kɔ.

14 E kä kpirə̂: e ï djatra əpʉ gâ lə e mata ə̂wû tshepa ləba ə yï kə mbrə ərə də äwänə gâ tə̂ e mata kandalinga kowɔ; 15 e yï əgo kə mʉ Ə̂rɔ̂ Əpʉ blatshe gâ tə̂ aə̈nü e tə tama; 16 lə aərə nɔ̂, e tëgbɔ əpʉ lɔsu e mata blângbâ, ə̂në e lï ndə kə pa e rɨ əwo aakora nə̂ djablo də nə kɔ; 17 e zä ndje əpʉ kə she e lə kuzu gâ tə̂ akrɔ e tə kpɔtɔ kowɔ ə zä Əpʉ Ndjapä tə ə̈ngrʉ̈ kamba Yîrə̂ gâ lə kəna e. 18 E yü Ndjapä alɔnɔ̂ tə̂ äwä Âgbɔ̂ Yîrə̂ də adongo aəpʉ nɔ̂ də kə kɨ ə̂sə̂ əyo tə̂ e. Rəkɔ, e sə̈ də ə̈kü ala e ə zä tə̂ e nɔ̂ alɔnɔ̂ ndə kə pa e kɨ mbrə azü nə̂ Ndjapä nɔ̂, 19 mbrə əmə ndje, ndə kə pa, alɔ ə̂në mə sə kə a ama əmə, Ndjapä za əpʉ kə əmə, kanika mə yi yisə̂ âdâ Ə̂rɔ̂ Əpʉ nə ə̂në ə za tə̂ ye wû kɔ də awa ne. 20 Mə sə tə awomʉ Ə̂rɔ̂ Əpʉ nə â mbrə nə də̂ mə sə lə kânga kɔ. E yü Ndjapä nə kanika mə pa ndə nə pa də awa ne, mə pa ndə nə ə lï də äwä kə pa ndə nə nə.Aərə koshe nə̂ Ndjapä

21 Ndə kə pa, e-e ndje, e wusə̂ kə sə əmə də ərə ə̂në mə sə kə mbrə nə kɔ, Tishikə* ə̂në tshə sə tə aye ə̂në ä yində ye lə Âgbɔ̂ Əyïngerə wââ, ndje tə əyïkosəra ə̂në tshə lï kɔ, tshə sə kə pa ndəma aərə nɔ̂ kə e. 22 Mə wla ətshə də ə̂tə̂ əmə kə e ndə kə pa e wusə̂ əpʉ gâ pâ kə sə ä, ndje ndə kə pa tshə gbɔgbɔ lɔsu e.

23 Abä də Ndjapä gâ ndə Âgbɔ̂ Əyïngerə Jezu Kristə zä blatshe də kə yi tə̂ gâ ndə əpʉ lɔsu kə alaye azü nɔ̂! 24 Ə̂rɔ̂tə̂ Ndjapä sə̈ də azü nɔ̂ ə̂në əndje yində Âgbɔ̂ Əyïngerə nə̂ əzə̂ də Jezu Kristə də kə yi tə̂ ə̂në ə ro ro tə̂ ərə ne kɔ!