1 Ə̂dû əpʉ nə, alaye əmə, tshelə e sə̈ də ə̂rû mbrə Âgbɔ̂ Əyïngerə. Ə mbrə ə̈bə̈ ərə mbrə ndə kə pa mə kwatə̂mə ə ta kʉtə̂ aəpʉ sə̂ kə e ne, â mbrə e, ə sə tə aərə kə bata e. 2 Ala e gbɔ̈ tə̂ aəmbrʉ alayïkosəra, tə̂ ayavrɔ səkɔ ə̂në əpʉ gandja zâ lɔsu əndje ngbatshe kɔ. 3 Djatra azü ə̂në əndje wâ gandja gâ ye kɔ kə də̂ əzə̂, əzə̂ ə̂në a sə kə vrɔ Ndjapä tə̂ äwä Âgbɔ̂ Yîrə̂, â sə kə da əkro əzə̂ mbrə Jezu Kristə nə kɔ â za za lɔsu əzə̂ nɔ̂ kə əzü də ərə ə̂në tshə ma kɔ ne kɔ. 4 Bale, əmə, mə lî kəmə ndə kə pa mə za lɔsu əmə nɔ̂ gâ tə̂ ərə ə̂në əzü sə kə ma nə kɔ. Kədə ə̈bə̈ əzü kə wu ə pa əne lî ndə kə pa əne za lɔsu əne gâ tə̂ ərə ə̂në əzü sə kə ma nə kɔ, ənə̂ əmə lî ndə kə pa ə ro ənə̂ ye nə. 5 Əndje wâ əmə də gandja tə̂ mindû amanə vəta əlo mandâ kə zu əmə, mə sə tə angwa Isərayalə, lə marä Bejama, tə djatra Ebrʉ; gâ pâ əpʉ kə mbrə ndəma âgbɔ̂ əpʉ, mə sə tə Fariza. 6 Ə də̂ əpʉ əgo kə mbrə ərə, mə sə̂ tə awogi əyo tə̂ azü Laglizə; gâ pâ əpʉ kə mbrə ərə də äwänə Lïndə̂ âgbɔ̂ əpʉ, ə̈bə̈ əpʉ bale sə̂ sə̂ lə akrɔ əmə ne. 7 Bale, ərə ə̂në mə sə̂ kə sɔtə̂ aərə mandâ nə kɔ, mə wû lə ala əmə mbrə Kristə nə tə ərə ə̂në ə sə kə ndɨ aərə ə ndɨ tə̂ əmə. 8 Ngâ, mə wu aərə nɔ̂ tə ərə ə̂në ə sə kə ndɨ aərə ə ndɨ tə̂ əmə mbrə kə wusə̂ Jezu Kristə, Âgbɔ̂ Əyïngerə nə̂ əmə, tə ərə ə̂në ə rô aərə sə̂ nɔ̂ gâ ye. Mbrə ətshə, mə yîndə nə â tshî aərə nɔ̂ tʉ gâ ye, â mə wû aərə nɔ̂ tə grishi lə ala əmə, ndə kə pa mə sɔtə̂ Kristə nə, 9 əndje sɔtə̂ əmə lə ye. Ə də̂ də kə mbrə ərə də äwänə də ə̂tə̂ əmə, tə̂ äwä âgbɔ̂ əpʉ də̂ ne, bale də kə mbrə ərə də äwänə ə̂në ə sə tə̂ äwä lɔsu ə̂në mə zâ kə Kristə nə gâ ye kɔ, ə̂në Ndjapä ə za kə azü ə̂në əndje zâ lɔsu əndje kə Kristə nə gâ ye kɔ. 10 Ərə bale ə̂në mə yində nə kə də̂ kə pa mə yerɔ ətshə kpro də awlra ə̂në ə shê ətshə lə takpa tə̂ akuzu gâ ye kɔ ə wu marä tə̂ aəyo ə̂në tshə wû kɔ ə tshu marä tə̂ kuzu ə̂në tshə tshû kɔ 11 ndə kə pa, äwä nə â sə je, mə tɔ gâ tə̂ äwä kə she lə takpa tə̂ akuzu.

12 Ə sə sə ə pa mə tɔ̂ gâ tə̂ âdâ ərə nə gâ ye wala mə tɔ̂ gâ tə̂ äwä kə lï nɔ̂ gâ ye ne. Bale mə daka pə ndə kə grɔ äwä nə ndə kə pa mə tegbɔ nə, mbrə ə̂në Jezu Kristə têgbɔ əmə ndje gâ ye. 13 Alaye əmə, mə wu ənə̂ əmə wu ə pa mə têgbɔ gâ ye ne; bale ərə bale kə sə ndə kə pa mə mbrə nə: mə do tshepa əmə gbo ərə ə̂në ə sə djoko mandâ əmə kɔ ə lishi kʉ gâ tə̂ ərə ə̂në ə sə djoko ətshi nə kɔ, 14 mə sə kə kpe ärɔ̈ gu ndə âdâ ərə nə ndə kə pa mə sɔtə̂ ərə mandâ kə e əzə̂ ə̂në Ndjapä ê əzə̂ mâ lafɔ tə̂ äwä Jezu Kristə nə kɔ.

15 Rəkɔ, kədə əzə̂ sə tə azü ə̂në a nê lə əpʉ lɔsu gâ ye, əpʉ səke sə kpə lə akrɔ əzə̂. Â kədə, gâ pâ ə̈bə̈ əpʉ, e tegbɔ kumu kpî, Ndjapä ə yisə̂ ərə gashu kə e gâ pâ nə je. 16 Kʉtə̂ əpʉ bale, ətshe ə̂në a tɔ̂ gâ tə̂ nə kɔ, a nä gâ ətshi nə mvrɔ.

17 Alaye əmə, e mbrə̈ ərə mata əmə ə kö ala e gâ tə̂ azü ə̂në əndje sə kə mbrə tə̂ əndje mata ə̂në e wû ä də kə mbrə nə kɔ. 18 Mbrə ə̂në azü ngbatshe sə kə mbrə tə̂ əndje tə alayïkowɔ masheyɔ nə̂ Kristə. Mə pâ ndə nə kə e alɔnɔ̂ gâ ye, bale mə sə kə pa ndə nə kpəsəye də əkɨ lə ala əmə. 19 Ərə ə̂në ə ka tə̂ əndje kɔ kə də̂ äwä kuzu; ndjapä nə̂ əndje kə də̂ ə̈vü əndje, əndje sə kə da əkro əndje tə̂ ərə ə̂në ə sə tə ərə gana tə̂ əndje kɔ, əndje li tshelə əndje kʉ gâ tə̂ aərə tshepashɔ. 20 Ənə̂ əzə̂, əgɔ nə̂ əzə̂ sə mâ lafɔ-e, â mâ je də̂ Âgbɔ̂ Əyïngerə Jezu Kristə ə to â gu, ə̂në a sə kə ka mbrə ətshə tə Awoshe azü kɔ. 21 Mbrə ə̂në tshə do tshekotə̂ əzə̂ nə̂ gana nə mata tshekotə̂ ye nə̂ ə̂yî je tə̂ äwä awlra ə̂në tshə lï ndə kə ko aərə nɔ̂ də nə gâ tshekudu ye kɔ.