1 «Djatra əpʉ, mə pa kə e, əzü ə̂në tshə li li gâ lə ângâ andalimi nə lə manda nə ne, bale â o ə o tə̂ ə̈bə̈ ətshe kpî, əzü səkɔ sə tə əyïangba, tə əmbrʉ əzü. 2 Bale, əzü ə̂në tshə li lə manda nə, tshə sə tə awobata andalimi nə. 3 Ətshə də̂ awobata manda ângâ nə sə kə krɔ manda nə kə ətshə, â andalimi nə sə kə dji tshema ye. Tshə sə kə e andalimi nə ə̂në əndje sə tə ənə̂ ye kɔ də əɨrɨ əndje, ə ko əndje ə wutu də əndje gashu. 4 Alɔ ə̂në tshə kô əndje ə wûtu də əndje nɔ̂ gashu gâ ye kɔ, tshə sə kə na ana ətshi əndje, â andalimi nə sə kə za äwä ye, mbrə ə̂në əndje dji tshema ye kpro. 5 Əndje sə sə kə za äwä ə̈bə̈ tshângâ alɔ bale ne; əndje sə kə kpe ngrʉ̂ tə̂ ye, mbrə ə̂në əndje yerɔ tshema atshângâ yerɔ ne.»

6 Jezu pâ əpʉ kəwû səkɔ kə əndje, bale əndje djî tshelə âdâ əpʉ nə ə̂në tshə pâ kə əndje kɔ djî ne.

7 Bale, Jezu kwâtə̂ye ə pâ kə əndje ə pa: «Djatra əpʉ, mə pa kə e, mə də̂ tshelə manda andalimi nə. 8 Azü nɔ̂ ə̂në əndje nâ angbʉlînə tə̂ əmə kɔ, əndje sə̂ tə alayïangba, tə aəmbrʉ azü. Bale, andalimi nə djî əndje djî ne. 9 Mə də̂ tshelə manda nə. Kədə ə̈bə̈ əzü kə li tə̂ äwä əmə, tshə sə kə tshɔ lə kuzu. Tshə sə kə li nə ə sə kə wutu nə â sə kə sɔtə̂ rəgo. 10 Əyïangba nə na tshî kʉ ndə kə zɨ angba, ə wo kuzu ə ndɨ ərə. Əmə, mə nâ ndə kə pa andalimi nə sɔtə̂ sorô, sorô ə̂në ə ro pâ nə kɔ.

11 «Əmə, mə də̂ ə̂rɔ̂ awobata andalimi. Ə̂rɔ̂ awobata andalimi nə za sorô ye mbrə andalimi nə̂ ye nə. 12 Bale, əzü ə̂në tshə sə kə mbrə kosəra ə mbrə ndə kə pa əndje piyi ye ə pi kɔ, ə̂në tshə sə sə tə awobata andalimi nə ne kɔ, ə̂në andalimi nə sə sə tə əndje nə̂ ye ne kɔ, alɔ ə̂në tshə wu tshɔndjɔ ə̂në tshə sə kə na gu nə, tshə sə kə tshi andalimi nə tʉ ə kpe ərə nə̂ ye. Â tshɔndjɔ nə sə kə tegbɔ əndje ə ndjɔ tshelə əndje. 13 Mbrə ə̂në tshə sə kʉ tə əyïkosəra â əpʉ andalimi nə sə sə tə̂ lɔsu ye bale ne. 14 Əmə, mə də̂ ə̂rɔ̂ awobata andalimi nə. Mə wusə̂ andalimi nə̂ əmə, â andalimi nə̂ əmə nə wusə̂ əmə, 15 mata ə̂në Abä wusə̂ əmə, â əmə, mə wusə̂ Abä ndje kɔ. Mə za sorô əmə mbrə andalimi nə̂ əmə. 16 Mə sə kwatə̂mə də alabə̈ aata andalimi nə ə̂në əndje sə sə lə ângâ nə kotəye ne. Əndje ənə̂ səkɔ ndje, ə lï ndə kə pa mə ko əndje ə gu də əndje; əndje sə kə dji tshema əmə, â ə̂kpû andalimi nə sə kə sə kʉ bale â awobata əndje sə kə sə kʉ bale.

17 «Abä yində əmə, mbrə ə̂në əmə, mə katə̂ sorô əmə tʉ â kwatə̂mə mə sə kə za əndʉ nə. 18 Əzü bale sə sə kə za sorô əmə tə̂ əmə ne, bale əmə kə sə̂ â katə̂ nə tʉ də ə̂tə̂ əmə. Mə sə də awlra ndə kə katə̂ nə tʉ, â sə də awlra ndə kə za əndʉ nə. Ama ə̂në Abä zâ kə əmə kɔ kə sə̂.»

19 Mbrə aəpʉ səkɔ, tshelə takpa tə̂ Ajuwufu nə kwatə̂ye ə sɔ̂. 20 Azü ngbatshe lə takpa tə̂ əndje pâ əpʉ ə pa: «Tshə sə də ə̈bə̈ afrɔ yîrə̂ lə ye. Yïrə̈ mbrə̂ ətshə gâ ye. E sə kə dji ətshə mbrə yekɔ?» 21 Alabə̈ əndje pâ əpʉ ə pa: «Aəpʉ səkɔ sə sə tə aəpʉ nə̂ əzü ə̂në afrɔ yîrə̂ sə lə ye kɔ ne. Ə̈bə̈ afrɔ yîrə̂ lï ndə kə mbrə ndə kə pa ala alayïbula sɔ a?»

22 Əndje sə̂ kə mbrə sandaga ndə kə za Anda Ndjapä kpî mâ Jeruzalamə. Ə sə̂ tə̂ tshekɨ əzɨ. 23 Jezu sə̂ kə na ana lə Anda Ndjapä nə, tshekudu anda ə̂në əndje ê ə pa Tshekudu anda nə̂ Salomɔ kɔ. 24 Ajuwufu nə kpê dji ətshə, ə pâ kə ətshə ə pa: «Ä sə kə ka ʉrrr gorɔ də̂ bə sə kə pa djatra əpʉ kə ä? Kədə əbə də̂ Kristə nə, pä ndə nə orâ kə ä.» 25 Jezu nə kîrə əpʉ kə əndje ə pa: «Mə pâ ndə nə kə e gâ ye, bale e yi yində kə dji əmə ne. Akosəra ə̂në, əmə, mə sə kə mbrə nə də əɨrɨ Abä kɔ, ə tə nə kə sə̂ â pa əpʉ gâ pâ əpʉ nə̂ əmə. 26 Bale, e-e, e yində nə yi də lɔsu e ne, mbrə ə̂në e sə sə lə takpa tə̂ andalimi nə̂ əmə ne. 27 Andalimi nə̂ əmə nə sə kə dji tshema əmə, â əmə, mə wusə̂ əndje, â əndje sə kə za äwä əmə. 28 Əmə, mə za sorô nə̂ alɔnɔ̂ kə əndje, əndje sə sə kə tshu nə alɔ bale ne, â əzü bale sə sə kə ko əndje də awlra lə kəna əmə ne. 29 Abä əmə ə̂në tshə kô əndje kə əmə kɔ, tshə rô azü nɔ̂ gâ ye â əzü bale lï lï ndə kə za ə̈bə̈ ərə bale də awlra lə kəna Abä əmə nə ne. 30 Əmə, ä də Abä, ä sə kʉ kpiabale.»

31 Ajuwufu nə kwâtə̂ndje ə rô abadja ndə kə gbo ətshə də nə. 32 Jezu zâ əpʉ ə pâ kə əndje ə pa: «Mə mbrə̂ aə̂rɔ̂ akosəra ngbatshe ə̂në ə tô mâ ndə Abä kɔ ə̂në e wû də ala e gâ ye. Mbrə ənə̂ta də̂ e yində kə gbo əmə də badja nə ndə kə wo əmə kɔ?» 33 Ajuwufu nə kîrə əpʉ kə ətshə ə pa: «Ə də̂ mbrə ə̈bə̈ ə̂rɔ̂ ərə ə̂në bə mâ də̂ ä yində kə gbo əbə ndə kə wo əbə kɔ ne, bale mbrə əpʉ ə̂gû ə̂në bə gû Ndjapä kɔ, mbrə ə̂në, əbə ə̂në bə sə tə əzü kɔ, bə mbrə tə̂ zə tə Ndjapä.» 34 Jezu kîrə əpʉ kə əndje ə pa: «Əndje tâ tâ lə âgbɔ̂ əpʉ nə̂ e ə pa: Əmə Ndjapä, mə pâ kə e: "E sə tə andjapä"* ne a? 35 A wusə̂ nə ə pa əpʉ ə̂në Fraka nə̂ Ndjapä pâ gâ ye kɔ, əzü lï lï ndə kə gba tshelə ne. Kandää, Ndjapä nə pâ əpʉ nə kə azü â pâ kɔ, â ê əndje tə andjapä kɔ. 36 Bale, ətshə ə̂në Abä zâ ətshə kpî â wlâ ətshə gâ pâ ashɔ kɔ, e-e, e pa mə gû Ndjapä! Mbrə ə̂në mə pâ əpʉ ə pa: "Mə sə tə Ɨrɨ Ndjapä kɔ a?" 37 Kədə akosəra nə̂ Abä əmə nə də̂ mə sə kə mbrə nə kɔ ne, e zä lɔsu ye za kə əmə nə ne. 38 Bale, kədə tə nə də̂ mə sə kə mbrə nə kɔ, â kədə e za lɔsu e za kə əmə ndje ne, e yïndə akosəra nə ə̂në mə sə kə mbrə kɔ də lɔsu e, kanika e wusə̂ nə ə yində nə ə pa Abä sə lə əmə â əmə, mə sə lə Abä.» 39 Əndje prâ äwä kwatəndje ndə kə tegbɔ Jezu nə, bale tshə rô tə̂ əndje.

40 Jezu dô tə̂ ye ə gû mâ ətshî Jurda, tə̂ ətshe ə̂në Zââ zâ batamo kə azü əlînə tə̂ nə kɔ â sə̂ mâ je. 41 Azü ngbatshe nâ gâ tə̂ ye, ə pâ əpʉ ə pa: «Zââ mâ ə̈bə̈ ərə ə̈lü mâ bale ne; bale aəpʉ nɔ̂ ə̂në Zââ nə pâ gâ pâ koshe səye kɔ sə tə banda əpʉ.» 42 Â kôto, azü ngbatshe zâ lɔsu əndje kə Jezu nə.