1 Bale, âgbɔ̂ awotokrɔ nə yû Etianə nə ə pa: «Əpʉ nə sə rə ngâ a?» 2 Etianə nə kîrə əpʉ ə pa: «Alaye, alabä, e djï əpʉ nə̂ əmə! Ndjapä ə̂yî mâ tə̂ ye kə ätä əzə̂ də Abraamo, alɔ ə̂në tshə dâka pə mâ Mezɔpotami kɔ, angbʉlînə ndə kə pa tshə nâ ə mâ əgɔ mâ Hara kɔ. 3 Ndjapä nə pâ kə ətshə ə pa: "Wütu lə əgɔ nə̂ zə, də tshelə bəngʉ nə̂ zə ə nä mâ lə əgɔ ə̂në mə sə kə yisə̂ nə kə əbə kɔ."* 4 Bale, Abraamo nə âfɔ lə əgɔ Kalde ə nâ ə mâ əgɔ mâ Hara. Mandâ kuzu abä nə, Ndjapä zâ ətshə kôto, lə əgɔ Hara nə â nâ də ətshə mâ lə əgɔ səye ə̂në e sə lə nə kpəsəye kɔ. 5 Lə əgɔ nə, Ndjapä zâ ə̈bə̈ ashɔ wala ə̈bə̈ ətshe teashe zâ kə ətshə tə ənə̂ ye bale ne. Bale, Ndjapä zâ ama ndə kə za əgɔ nə kə ətshə tə ənə̂ ye də angwa ye ndje mandâ ye. Kandää, Abraamo nə sə̂ sə̂ də əgblə tə̂ tshekɨ nə səkɔ ne. 6 Ndjapä nə pâ əpʉ ə pa: "Angwa zə sə kə ma əgɔ lə ə̈bə̈ əgɔ tshângâ, azü sə kə ko əndje tə akanga ə gi əyo tə̂ əndje lə ə̂ngû ngbangbo vəna (400). 7 Bale, azü əgɔ nə ə̂në əndje mbrə angwa zə tə akanga nə je kɔ, əmə kə wa ngbanga əndje. Mandânə, əndje sə kə wutu lə əgɔ kanga nə ə na ə vrɔ əmə tə̂ ətshe səye."* 8 Mandânə, Ndjapä mbrə̂ mbʉkʉ də Abraamo nə â kə wa gandja sə̂ tə ərə mbʉkʉ nə. Rəkɔ, Abraamo nə zû Izakə ə wâ ətshə də gandja tə̂ mindû amanə vəta əlo nə. Izakə nə wâ ndje Jakɔbə də gandja â Jakɔbə nə wâ ndje aləvu nə morofo amanə bishi də gandja, əndje ə̂në əndje sə̂ tə alätä əzə̂ kɔ.

9 «Alätä əzə̂ nə zâ tshelə əndje gâ tə̂ Jozafu, aye əndje â kâ ətshə tə kanga â azü rô də ətshə gâ lə əgɔ Ejipətə. Bale, Ndjapä sə̂ gâ ndə ye, 10 ə djɔ̂ ətshə lə aərə əyo nə̂ ye nɔ̂. Tshə zâ kə wusə̂ âdâ ərə kə ətshə ə mbrə̂ â Faraɔ, əyïngerə əgɔ Ejipətə nə, wû ətshə tə ə̂rɔ̂nə. Rə də̂ əyïngerə nə zâ Jozafu nə tə komandâ gâ pâ əgɔ nə nɔ̂ ə zâ ndje ətshə ndə kə pa tshə lishi gâ pâ aərə tshelə anda nə̂ əne nɔ̂. 11 Bale, ə̈bə̈ əgerə əgo tê lə əgɔ Ejipətə nə nɔ̂ də əgɔ Kanaa. Azü wû əyo tə bandanə â alätä əzə̂ nə sɔ̂tə̂ rəgo sɔ̂ ndə kə pa əndje zɨ ne. 12 Alɔ ə̂në Jakɔbə nə djî ə pa rəgo sə̂ mâ Ejipətə nə kɔ, tshə wlâ alätä əzə̂ nə mâ je tə̂ angbʉlî ana. 13 Tə̂ bishi ana nə, Jozafu nə mâ tə̂ ye â alaye nə yêrɔ ətshə kpro â Faraɔ wûsə̂ alayɔ Jozafu nə. 14 Bale, mandânə, Jozafu nə wlâ ətshe ndə kə pa əndje gu də abä əne də Jakɔbə də alayɔ nə nɔ̂ ə̂në əndje sə̂ zazü vəta də grʉvəta kɔ. 15 Rəkɔ, Jakɔbə nə nâ mâ Ejipətə je ə tshû mâ je, də alätä əzə̂ nə ndje. 16 Əndje kô aəko əndje ə gû də nə mâ lə əgɔ Sishamə ə shî əndje gâ lə ə̂dû ə̂në Abraamo yɔ̂ də ngendja lə kəna aləvu Hamɔrə mâ Sishamə nə je kɔ.

17 «Bale, ə̂në alɔ ndə kə pa Ndjapä mbrə tshelə ndəma əpʉ ə̂në tshə pâ kə Abraamo nə ndô trö gâ ye kɔ, azü lə marä əzə̂ nə mâ Ejipətə nə zû tə bandanə ə ngbâ ə rô pâ nə. 18 Ʉrrr mandânə, ə̈bə̈ tafa əyïngerə, ə̂në tshə wûsə̂ Jozafu nə wû ne kɔ, sə̂ gâ pâ əgɔ Ejipətə nə. 19 Əyïngerə səkɔ frɔ̂ azü lə marä əzə̂ nə ə gî əyo tə̂ alätä əzə̂ nə. Tshə kô əndje də awlra ndə kə pa əndje tshi aə̂ngê aneshe nə̂ əndje tʉ kanika əndje tshu. 20 Tə̂ tshekɨ nə səkɔ də̂ əndje zû Mayïzə, tshə fʉ̂ əgblə lə ala Ndjapä. Əndje bâta ətshə də angɔ, yipʉ vəta lə anda nə̂ abä nə. 21 Bale, alɔ ə̂në əndje tshî ətshə tʉ, əgblə yashe nə̂ Faraɔ zâ ətshə ə bâta ətshə tə əgblə nə̂ ye. 22 Rəkɔ, əndje yîsə̂ ərə kə Mayïzə tə̂ äwä kə wusə̂ âdâ ərə nɔ̂ nə̂ azü əgɔ Ejipətə nə. Mayïzə sə̂ tə ə̈bə̈ âgbɔ̂ əzü tə̂ äwä kə pa əpʉ də kə mbrə aərə nə̂ ye.

23 «Alɔ ə̂në tshə sə̂ də ə̂ngû zazü bishi gâ ye kɔ, ə̈bə̈ ərə zâ gâ tə̂ lɔsu ye ndə kə pa tshə na ə wu alaye nə, azü əgɔ Isərayalə nə. 24 Tshə nâ ə wû ə̈bə̈ aye nə ə̂në ə̈bə̈ əzü əgɔ Ejipətə nə sə̂ kə gi əyo tə̂ ye kɔ. Tshə tê gâ ndə aye nə nə ə̂në tshə sə̂ kə wu əyo kɔ â də əkɔ ye, tshə wô əzü əgɔ Ejipətə nə. 25 Tshə wû ənə̂ ye ə pa alaye əne nə ə dji tshelə əpʉ nə kəmə je ə pa Ndjapä sə kə djɔ alane lə aərə əyo tə̂ äwä əne. Bale, əndje djî tshelə nə djî ne. 26 Əlo bale mandânə, Mayïzə nə nâ ə wû alabə̈ alaye nə bishi, əndje sə̂ kə da tə̂ əndje â tshə yîndə kə she tshelə takpa tə̂ əndje gâ mandânə. Tshə pâ kə əndje ə pa: "E-e, e sə tə alaye azü, e sə kə gi əyo tə̂ angâ e lə takpa tə̂ e mbrə yekɔ?" 27 Bale, ətshə ə̂në tshə sə̂ kə gi əyo tə̂ bəngâ nə nə kɔ gû Mayïzə nə ə pâ kə ətshə ə pa: "Əde kə za əbə tə makɔndji də awowa tshelə əpʉ nə̂ ä? 28 Bə yində kə wo əmə mata ə̂në bə wô əzü əgɔ Ejipətə nə wɔlumə kɔ a?" 29 Alɔ ə̂në Mayïzə nə djî əpʉ səkɔ, tshə kpê ə nâ ə mâ əgɔ mâ Madia; mâ je, tshə zû aneshe koshe bishi.

30 «Ə̂ngû zazü bishi mandânə, ə̈bə̈ trawaya nə̂ Ndjapä bʉ̂ gâ tə̂ ye, lə əwo ə̂në ə sə̂ kə tshe tə̂ ə̈bə̈ ə̂mî, mâ lə ngbûndû kaga Sinayi kɔ. 31 Alɔ ə̂në Mayïzə nə wû ətshə rəkɔ, kumu ye kpê pâ əndu ye. Bale, alɔ ə̂në tshə sə̂ kə gi tə̂ ye trö ndə kə pa tshə shekɔ ərə nə kɔ, tshə djî tshema Əyïlingû ə pâ: 32 "Mə də̂ Ndjapä nə̂ alätä zə, Ndjapä nə̂ Abraamo, Ndjapä nə̂ Izakə, Ndjapä nə̂ Jakɔbə." Bale, Mayïzə nə vɔ̂tə̂ kə gugu nə ə yî yîndə kə shekɔ ərə nə kwatə̂ye ne. 33 Əyïlingû nə pâ kə ətshə kwatə̂ye ə pa: "Vërə tama nə̂ zə tə̂ ə̈nü zə mbrə ə̂në ətshe ə̂në bə ka gâ tə̂ nə kɔ, ə sə tə ətshe ə̂në ə sə kpî. 34 Mə wû ərə əyo nə̂ azü nə̂ əmə ngâ, ə̂në əndje sə kə ma tə̂ əndje lə əgɔ Ejipətə nə kɔ gâ ye, mə djî əkɨ əndje gâ ye â jêrə ndə kə pa mə djɔ əndje lə nə kɔ. Nä gâ əmə koye ndə kə pa mə wla əbə mâ lə əgɔ Ejipətə nə je."*

35 «Mayïzə nə sə̂ ə̂në azü əgɔ Isərayalə wə̂ra tə̂ əndje tə̂ ye ə pa: "Əde kə zâ əbə tə makɔndji də awowa tshelə əpʉ kɔ?", ətshə də̂ Ndjapä nə wlâ ətshə tə makɔndji də awodjɔ azü nə lə kanga, tə̂ äwä trawaya nə̂ Ndjapä nə ə̂në tshə bʉ̂ gâ tə̂ ye lə ə̂mî nə kɔ. 36 Ətshə, Mayïzə nə kə kô əndje ə wûtu də əndje lə əgɔ Ejipətə nə. Tshə mbrə̂ aərə ə̈lü də aərə kə za awa gâ lə azü lə əgɔ Ejipətə nə, la ə̂drô ə̂ngû əngbrʉ ndje lə ngbûndû lə ə̂ngû zazü bishi. 37 Ətshə, Mayïzə nə kə pâ kə azü əgɔ Isərayalə ə pa: "Ndjapä sə kə e ə̈bə̈ awopandəma Ndjapä gashu kə e mata əmə lə takpa tə̂ alaye e."* 38 Alɔ ə̂në azü əgɔ Isərayalə ngbô tə̂ əndje gâ tə̂ nə mâ lə ngbûndû kɔ, ətshə, Mayïzə nə kə kâ gâ ə̂grû tə̂ trawaya nə̂ Ndjapä nə də alätä əzə̂ nə, ə̂në trawaya nə sə̂ kə pa əpʉ kə ətshə pâ kaga Sinayi nə kɔ. Ətshə kə sɔ̂tə̂ aəpʉ sorô nə̂ Ndjapä nə ndə kə yisə̂ nə kə əzə̂ kɔ.

39 «Bale, alätä əzə̂ nə wə̂ra tə̂ əndje ndə kə dji əpʉ ama ye, əndje wə̂ra tə̂ əndje tə̂ ye ə yîndə kə do tə̂ əndje gu na ye gâ lə əgɔ Ejipətə nə. 40 Əndje pâ kə Aarɔ ə pa: "Mbrə̈ andjapä ə̂në əndje sə kə na ana ətshi əzə̂ kɔ kə ä. Mbrə ə̂në ä wu wusə̂ ərə ə̂në ə wûtu gâ tə̂ Mayïzə sə̂ ə̂në tshə kô əzə̂ ə wûtu də əzə̂ lə əgɔ Ejipətə nə kɔ ne." 41 Bale, tə̂ alɔ nə səkɔ, əndje mbrə̂ ə̈bə̈ aya pagra tə ə̈bə̈ ndjapä ə tô əkrɔ kə ətshə. Tshelə əndje mɔ̂ wââ â əndje mbrə̂ sandaga mbrə aya pagra nə ə̂në əndje mbrə̂ ətshə də kəna əndje kɔ. 42 Bale, Ndjapä dô tshepa ye gbo əndje ə kâtə̂ əndje â əndje vrɔ̂ aambrepe tshelafɔ, mata ə̂në əndje tâ əpʉ nə gâ lə fraka nə̂ aawopandəma Ndjapä kɔ ə pa:

"Azü əgɔ Isərayalə,

e wô aagia, ə tô əkrɔ

lə ə̂ngû zazü bishi lə ngbûndû kə əmə a?

43 E zâ gbända nə̂ Mɔlɔkə, tə ndjapä ə nâ ana də nə,

ə zâ ndje ambrepe nə̂ Refa, tə ndjapä gâ lə kumu e,

andjapä səkɔ ə̂në e mbrə̂ əndje də kəna e ndə kə pa e vrɔ əndje kɔ.

Âdârə ə̂në, mə sə kə ko e tə akanga

ə na də e ngrʉ̂ tə̂ əgɔ Babilɔnə kɔ kə sə̂."*

44 «Mâ lə ngbûndû je, alätä əzə̂ nə sə̂ də gbafa ə̂në Ndjapä ə na ə te əndje lə nə kɔ. Ndjapä zâ ama kə Mayïzə nə ə pa tshə mbrə̂ gbafa nə Lïndə̂ ənə̂ sə̂ ə̂në tshə wû kɔ. 45 Alɔ ə̂në alätä əzə̂ nə sɔ̂tə̂ gbafa nə gâ ye kɔ, əndje lî də nə gâ lə əgɔ ə̂në əndje zâ lə kowɔ tə̂ alabə̈ amarä ə̂në Ndjapä grɔ̂ əndje ətshi alätä əzə̂ nə kɔ, alɔ ə̂në Jozuwe sə̂ gâ pâ əndje kɔ. Gbafa nə dâka pə lə əgɔ nə ʉrrr ndjɔ gâ tə̂ alɔ Davidə. 46 Davidə nə sɔ̂tə̂ ə̂rɔ̂tə̂ Ndjapä nə, ə yû Ndjapä nə ə pa tshə katə̂ äwä kə əne, əne mbrə anda mbrə Ndjapä nə̂ Jakɔbə. 47 Bale, Salomɔ kə sə̂ â mbrə̂ anda nə mbrə Ndjapä nə.

48 «Bale, Ndjapä nə ə̂në tshə sə mâ ngâ lafɔ kɔ, sho sho gâ lə anda ə̂në kəna əzü kə mbrə̂ kɔ ne, Lïndə̂ əpʉ ə̂në awopandəma Ndjapä nə pâ gâ ye kɔ ə pa:

49 "Tshelafɔ sə tə mbata ngerə nə̂ əmə,

ashɔ sə tə mbata ə̈nü əmə.

Anda yekɔ də̂ e sə kə mbrə kə əmə?

Ətshe kə wu tə̂ əmə tə̂ nə sə kotâ a?

50 Ə də̂ kəna əmə də̂ kə mbrə̂ aərə səkɔ nɔ̂ ne a?"*

51 «E-e, azü ə̂në kumu e gbɔ wââ kɔ! Lɔsu e wə̂ra tə̂ ye tə̂ aəpʉ nə̂ Ndjapä, â aətu e djî aəpʉ nə̂ ye djî ne kɔ. Alɔnɔ̂ də̂ e wəra tə̂ e tə̂ Âgbɔ̂ Yîrə̂ kɔ. E sə mata alätä e! 52 Awopandəma Ndjapä ənə̂ta də̂ alätä e gî əyo gî tə̂ ye ne? Alätä e wô azü ə̂në əndje mʉ̂ əpʉ əlînə gâ pâ kə na Ə̂rɔ̂ Əzü kɔ. Kpəsəye, e sə tə azü ə̂në e kâ Ə̂rɔ̂ Əzü nə, tə aawowo ətshə. 53 E-e, e sɔ̂tə̂ âgbɔ̂ əpʉ nə̂ Ndjapä tə̂ äwä atrawaya nə̂ Ndjapä gâ ye, bale, e mbrə̂ tə̂ e mbrə̂ Lïndə̂ nə ne!»

54 Alɔ ə̂në azü aangbɔ ngbanga nə djî əpʉ səkɔ, tshelə əndje kô əndje tə bandanə â əndje zɨ̂ tshelə əji əndje ə zɨ̂ tə̂ Etianə nə. 55 Bale, Âgbɔ̂ Yîrə̂ sû Etianə nə, tshə lîshi gâ lafɔ ə wû ə̂yî Ndjapä ə wû ndje Jezu, tshə kâ gâ lafɔ tə̂ ndəkɔ Ndjapä nə. 56 Tshə pâ: «E wü-a! Mə wu tshelafɔ ə krɔ̂, mə wu Əgblə nə̂ Əzü, tshə ka gâ lafɔ tə̂ ndəkɔ Ndjapä.»

57 Bale, azü nə tâ râwâ tə âgbɔ̂ ə bî aətu əndje gâ tə̂ nə ə gû nɔ̂ mvrɔ gâ pâ Etianə nə. 58 Əndje wûtu də ətshə gashu lə gala nə ə gbô ətshə də badja. Əndje ə̂në əndje zâ əpʉ nə gâ lə kumu ye kɔ, əndje kô aləba nə̂ əndje gâ tʉ gâ tshekudu ə̈bə̈ mɔdɔ ə̂në əɨrɨ ye kə də̂ Sɔlə kɔ. 59 Ə̂në əndje sə̂ kə gbo ətshə də badja nə kɔ, Etianə nə yû Ndjapä ə pa: «Âgbɔ̂ Əyïngerə Jezu, zä yîrə̂ əmə!» 60 Mandânə, tshə tê gâ tʉ ə gbə̂te ə tâ râwâ tə âgbɔ̂ ə pa: «Âgbɔ̂ Əyïngerə, gbä tshelə nyaka səye lə kumu əndje!» Mandâ əpʉ sə̂ ə̂në tshə pâ kɔ, tshə tshû.