1 Tə̂ alɔ nə səkɔ, atrawaya ngbâ ə rô pâ nə â Ajuwufu ə̂në əndje pâ ama grakə kɔ vɔ̂tə̂ kə pa tə̂ Ajuwufu ə̂në əndje pâ ənə̂ əndje də̂ ama ebrʉ kɔ. Əndje wû ə pa Ajuwufu nə ə̂në əndje pâ ama ebrʉ nə kɔ gâ ndə ayashe koya nə̂ alane gâ ne alɔ ə̂në əndje sə̂ kə kru tshelə rəgo lə əlo bale bale kɔ. 2 Bale, azü-awla nə morofo amanə bishi nə ngbô ə̂kpû atrawaya nə gâ tə̂ nə ə pâ kə əndje ə pa: «Ə sə sə də äwänə ndə kə pa ä katə̂ kə yisə̂ Əpʉ Ndjapä gâ ye ə kru tshelə rəgo tə̂ azü ne. 3 Rəkɔ, alaye, e kë alabə̈ akoshe mindû amanə bishi lə takpa tə̂ e, akoshe ə̂në azü pa əpʉ əndje tə ə̂rɔ̂nə, ə̂në Âgbɔ̂ Yîrə̂ su əndje ə su kɔ, akoshe kə wusə̂ âdâ ərə. Ä zä kosəra kə kru tshelə rəgo nə gâ lə kəna əndje. 4 Ənə̂ ä, ä daka pə kʉ tə̂ äwä kə yu Ndjapä də kə yisə̂ Əpʉ Ndjapä.»

5 Əpʉ nə̂ əndje nə tô tə̂ ə̂kpû azü nə. Bale, azü nə kê Etianə, tə əyï âgbɔ̂ lɔsu â Âgbɔ̂ Yîrə̂ sû ətshə, də Flipə, də Prɔkɔrə, də Nikanɔrə, də Timɔ, də Parəmenasə gâ ndə Nikola, əzü əgɔ Atiɔshə, ə̂në tshə mbrə̂ leme-e aərə Ndjapä nə̂ Ajuwufu kɔ. 6 Azü nə mâ əndje kə azü-awla nə â azü-awla nə yû Ndjapä mbrə əndje â kô kəna əndje gâ pâ əndje.

7 Əpʉ Ndjapä zâ ətshe na na ye. Mâ Jeruzalamə, atrawaya ngbâ â kə ngba əndje nə rô pâ nə, â ə̈bə̈ əgerə ə̂kpû aawotokrɔ zâ lɔsu əndje kə Jezu.

8 Ndjapä mbrə̂ ə̂rɔ̂tə̂ ye kə Etianə tə bandanə â zâ awlra kə ətshə, â tshə sə̂ kə mbrə əgbro aərə ə̈lü də aərə kə za awa gâ lə azü lə takpa tə̂ azü əgɔ nə. 9 Alabə̈ azü âfɔ ə pâ ashera də a-Etianə nə: azü nə sə̂ lə takpa tə̂ əndje ə̂në əndje li anda aangbɔ ə̂në əndje djî əɨrɨ nə ə pa «anda aangbɔ nə̂ aangbrɔ akanga» kɔ, ndje lə takpa tə̂ azü gala Siranə də azü gala Alegəzandri gâ ndə azü lə takpa tə̂ azü əgɔ Silisi də azü ashɔ Azi. 10 Bale, azü nə lî lî ndə kə pa əndje ro ətshə də əpʉ ne, mbrə ə̂në Etianə pâ əpʉ tə̂ äwä kə wusə̂ âdâ ərə ə̂në Âgbɔ̂ Yîrə̂ nə zâ kə ətshə kɔ. 11 Bale, əndje kô ngendja kə alabə̈ azü ndə kə pa əndje pâ əterə ə pa: «Ä djî ətshə, tshə pâ əpʉ ə gû Mayïzə gâ ndə Ndjapä.» 12 Rəkɔ, əndje frɔ̂ azü əgɔ nə də aâgbɔ̂ azü gâ ndə aawoyisə̂ âgbɔ̂ əpʉ nə̂ Mayïzə ndə Etianə nə. Mandânə, əndje gû ndə Etianə nə ə têgbɔ ətshə də awlra ə nâ də ətshə gâ ətshi aangbɔ ngbanga nə̂ Ajuwufu. 13 Əndje nâ ndje də alabə̈ azü gâ ətshi aangbɔ ngbanga nə â əndje pâ əpʉ əterə ə pa: «Koshe səye sə kə pa kʉtə̂ aəmbrʉ aəpʉ gâ tə̂ Anda Ndjapä, ndje gâ tə̂ âgbɔ̂ əpʉ nə̂ Mayïzə. 14 Mbrə ə̂në ä djî ətshə, tshə pâ əpʉ ə pa Jezu nə̂ əgɔ Nazaratə sə kə ngɔ Anda Ndjapä səye gâ tʉ â sə kə yisə̂ alabə̈ amandʉ aərə kpî tə̂ ənə̂ sə̂ ə̂në Mayïzə yîsə̂ nə kə əzə̂ kɔ.»

15 Azü nə nɔ̂ lə anda aangbɔ ngbanga nə shêkɔ kʉtə̂ Etianə nə ə wû tshitshi ye, ə sə̂ mata ənə̂ ə̈bə̈ trawaya nə̂ Ndjapä.