1 Mâ Ikɔniɔmə je, Palɔ gâ ndə Barənabasə lî ndje gâ lə anda aangbɔ nə̂ Ajuwufu ə pâ əpʉ â ə̂kpû Ajuwufu nə gâ ndə azü ə̂në əndje sə̂ sə̂ tə Ajuwufu ne kɔ zâ lɔsu əndje kə Âgbɔ̂ Əyïngerə. 2 Bale, alabə̈ Ajuwufu nə ə̂në əndje wə̂ra tə̂ əndje tə̂ əpʉ nə̂ Âgbɔ̂ Əyïngerə nə kɔ, frɔ̂ azü ə̂në əndje sə̂ sə̂ tə Ajuwufu ne kɔ ə mbrə̂ ndə kə pa tshelə əndje wəra tə̂ əndje tə̂ alaye. 3 Bale, Palɔ nə gâ ndə Barənabasə nə dâka pə mâ Ikɔniɔmə nə je ʉrrr əndʉ nə dɨ̂. Əndje pâ əpʉ pâ də awa ne ə zâ lɔsu nɔ̂ kʉ gâ pâ Âgbɔ̂ Əyïngerə. Tshə zâ awlra kə əndje ndə kə pa əndje mbrə aərə ə̈lü də aərə kə za awa gâ lə azü ndə kə yisə̂ nə ə pa əpʉ ə̂në əndje pa gâ pâ ə̂rɔ̂tə̂ ye kɔ sə tə djatra əpʉ. 4 Tshelə ə̂kpû azü tshelə gala nə krû: alabə̈ nə tê gâ ndə Ajuwufu nə â alabə̈ əndje tê gâ ndə azü-awla nə.

5 Bale, Ajuwufu nə də azü ə̂në əndje sə sə tə Ajuwufu nə ne kɔ gâ ndə amakɔndji nə̂ əndje gâmba tə̂ əndje ndə kə pa əndje gi əyo tə̂ Palɔ nə gâ ndə Barənabasə nə ə gbo əndje də badja ə wo əndje. 6 Bale, azü-awla bishi səkɔ djî ndə nə ə kpê ə sə̂ lə agala Listrə də Darəbə, gâ ndə aəgɔ ə̂në ə sə̂ ngotə̂ nə kɔ, lə ashɔ Likaoni. 7 Mâ je, əndje mʉ̂ Ə̂rɔ̂ Əpʉ kə azü.

8 Mâ Listrə, ə̈bə̈ koshe sə̂ je ə sə̂ kʉ gâ tʉ, aə̈nü ye tshû gâ ye. Aə̈nü ye nə ndɨ̂ pə lə əyï nə â tshə nâ ana nâ alɔ bale ne. 9 Ndə ə̈bə̈ alɔ, tshə sə̂ kə dji əpʉ ə̂në Palɔ nə sə̂ kə yisə̂ nə kɔ. Palɔ nə lîshi kʉ kpə lə ala ye ə wû ə pa tshə sə̂ də lɔsu ndə kə pa rəka nə̂ ye nglɔ. 10 Bale, Palɔ nə pâ kə ətshə tə âgbɔ̂ ə pa: «Äfɔ ə kä ndji gâ pâ aə̈nü zə!» Koshe nə rɨ̂ ə âfɔ ə vɔ̂tə̂ kə na ana. 11 Alɔ ə̂në ə̂kpû azü nə wû ərə ə̂në Palɔ nə mbrə̂ kɔ, əndje tâ râwâ ə pâ də ama Likaoni nə ə pa: «Andjapä kô akwa azü â jêrə gâ tə̂ əzə̂ kɔ!»

12 Əndje ê Barənabasə nə «Zʉsə» ə ê Palɔ nə «Erəmesə»*, mbrə ə̂në ətshə də̂ Palɔ nə kə pâ əpʉ nə kɔ. 13 Awotokrɔ nə̂ ndjapä Zʉsə nə, ə̂në anda kə vrɔ ətshə lə nə sə̂ tə̂ manda tshelə gala nə kɔ, kô aäkɔ̈ apagra ə̂në əndje î andɔkɔ ayɔ gâ lə ə̂wû gâ tə̂ əndje kɔ ə nâ də əndje gâ lə manda nə. Ətshə gâ ndə ə̂kpû azü nə yîndə kə to əkrɔ kə azü-awla nə. 14 Bale, alɔ ə̂në Palɔ nə gâ ndə Barənabasə nə djî ndə əpʉ nə, əndje sûru tshelə aləba nə̂ əndje ə kpê katshä mâ lə ə̂grû tə ə̂kpû azü nə ə tâ râwâ tə̂ əndje ə pâ: 15 «Azü, e mbrə rə ndə yekɔ? Ä-ä, ä sə tə azü ndje mata e. Ä sə kə yisə̂ Ə̂rɔ̂ Əpʉ kə e ə pa e tshi äwä andjapä səye ə̂në əndje tɔ̂ tɔ̂ gâ tə̂ ə̈bə̈ ərə bale ne kɔ tʉ ə do tə̂ e gu nə gâ tə̂ Ndjapä ə̂në tshə sə tə sorô ə mbrə̂ tshelafɔ də tshepashɔ də ə̂ngû əngbrʉ gâ ndə aərə tshelə nə nɔ̂ kɔ. 16 Leme-e, Ndjapä nə kâtə̂ azü lə amarä nɔ̂ əndje zâ äwä ə̂në tshelə əndje yîndə nə kɔ. 17 Bale, tshə yîsə̂ ə̂rɔ̂tə̂ ye kə azü alɔnɔ̂ tə̂ äwä aərə ə̂në tshə mbrə kɔ: mâ lafɔ, tshə sə kə wla yavrɨ də tshekɨ kə le arəgo kə e, tshə sə kə ko rəgo kə e ə sə kə za ə̂rû gâ tə̂ lɔsu e.»

18 Alɔ ə̂në azü-awla nə pâ əpʉ sə̂ nɔ̂ rə kɔ, ama əndje kâ əndje ə kâ ʉrrr â azü nə kâtə̂ äwä kə to əkrɔ nə kə əndje nə.

19 Mandânə, alabə̈ Ajuwufu tô mâ Atiɔshə lə əgɔ Pisidi gâ ndə Ikɔniɔmə ə nâ ə rô pâ ə̂kpû azü nə gâ ye də əpʉ. Əndje gbô Palɔ nə də badja ə gbə̂tɔ ətshə wutu nə gashu lə gala nə ə wû ənə̂ əndje ə pa tshə tshû gâ ye. 20 Bale, alɔ ə̂në atrawaya nâ ə kpê dji ətshə, tshə âfɔ ə gû mâ lə gala nə. Tshekra, əndje də Barənabasə nə rô mâ Darəbə.

21 Lə gala Darəbə nə, Palɔ nə gâ ndə Barənabasə nə mʉ̂ Ə̂rɔ̂ Əpʉ kə azü â ə̂kpû azü mbrə̂ tə atrawaya. Mandânə, əndje gû mâ Listrə, ə gû mâ Ikɔniɔmə ə gû ndje mâ Atiɔshə lə əgɔ Pisidi. 22 Əndje pâ əpʉ ə gbɔ̂gbɔ lɔsu atrawaya nə, ə mʉ̂ əpʉ kə əndje ndə kə pa əndje sə pə kʉ tə̂ äwä Ndjapä ə pâ kə əndje ə pa: «Tə̂ äwä aərə əyo ngbatshe ʉrrr də̂ əzə̂ lï ndə kə pa əzə̂ li gâ lə Əgɔngerə nə̂ Ndjapä.»

23 Palɔ nə də Barənabasə nə kê alabə̈ aâgbɔ̂ azü ə kô əndje gâ pâ azü nə lə Laglizə bale bale. Əndje rû tshelə əndje tə̂ rəgo ə yû Ndjapä â mandânə əndje kô aâgbɔ̂ azü səkɔ gâ lə kəna Âgbɔ̂ Əyïngerə, ətshə ə̂në əndje zâ lɔsu əndje kə ətshə kɔ. 24 Mandânə, əndje rô lə ashɔ əgɔ Pisidi ə nâ mâ lə ashɔ əgɔ Pafili. 25 Əndje mʉ̂ Əpʉ Ndjapä kə azü mâ Perjə â mandânə əndje nâ mâ Atali. 26 Əndje âfɔ kôto ə zâ bato ə gû mâ Atiɔshə, lə ashɔ əgɔ Siri, ə̂në azü nə kô əndje gâ lə kəna Ndjapä mbrə ə̂rɔ̂tə̂ ye mbrə kosəra nə ə̂në əndje mbrə̂ ə gû kɔ.

27 Alɔ ə̂në əndje gû gâ ye kɔ, əndje ngbô azü Laglizə nə gâ tə̂ nə ə pâ ndəma əpʉ aərə nɔ̂ ə̂në Ndjapä mbrə̂ tə̂ äwä əndje kɔ kə azü nə. Əndje pâ ndje ndəma ərə ə̂në Ndjapä mbrə̂ ndə kə krɔ äwä kə azü ə̂në əndje sə sə tə Ajuwufu ne kɔ ndə kə pa əndje za lɔsu əndje kə Ndjapä ndje. 28 Palɔ nə də Barənabasə nə dâka pə kôto də atrawaya nə əlo ngbatshe.