1 Mandânə ə̂në ä tshî aâgbɔ̂ azü Laglizə Efazə nə tʉ gâ ye kɔ, ä zâ bato ə nâ ndji mâ Kɔsə. Tshekra, ä nâ mâ Rɔdə, ə âfɔ kôto ə nâ mâ Patara. 2 Ä sɔ̂tə̂ ə̈bə̈ bato mâ je ə̂në ə sə̂ kə na mâ Fenesi, bale, ä zâ ə rô. 3 Alɔ ə̂në ä ndô trö də Shiprə ə sə kə wu əgɔ nə ə wu kɔ, ä tshî əgɔ nə tʉ djoko ndə gəle ə rô gu nə ndə əgɔ Siri. Ä kâ gâ tə̂ ama ashɔ mâ Tirə, mâ je də̂ əndje kô akongbɔ lə bato nə gâ tʉ. 4 Alɔ ə̂në ä sɔ̂tə̂ atrawaya mâ je, ä dâka kôto də aəndje əlo mindû amanə bishi. Âgbɔ̂ Yîrə̂ gî əpʉ kə əndje, əndje pâ kə Palɔ ə pa tshə na na mâ Jeruzalamə ne. 5 Bale, ə̂në əlo səkɔ nglɔ̂ gâ ye kɔ, ä zâ äwä ndə kə ro nə. Əndje nɔ̂ də alawɔ əndje də aləvu əndje, gî ä gâ lə äwä ʉrrr ndjɔ gâ tə̂ ama tshelə gala nə. Ä gbə̂te gâ tə̂ ama ə̂ngû nə ə yû Ndjapä. 6 Mandânə ə̂në ä blâ tə̂ ä bale bale nɔ̂ gâ ye kɔ, ä ô gâ lə bato nə â əndje gû ənə̂ əndje na na ye.

7 Ana nə̂ ä nə ə̂në ä âfɔ mâ Tirə kɔ ə nglɔ̂ mâ Pətolemayisə. Mâ je, ä blâ alaye ə mâ əlo bale də aəndje kôto. 8 Tshekra ä rô ə yî kumu ä mâ Sezare. Mâ je, ä nâ ə lô mâ lə anda nə̂ Flipə, awomʉ Ə̂rɔ̂ Əpʉ, ə̂në tshə sə̂ lə takpa tə azü mindû amanə bishi ə̂në əndje kê əndje mâ Jeruzalamə kɔ. 9 Tshə sə̂ də aneshe yashe vəna ə̂në əndje wusə̂ akoshe wu ne â əndje sə̂ kə pa ndəma Ndjapä kə azü. 10 Bale, ə̂në ä sə̂ kôto ə mâ aəlo ngbatshe gâ ye kɔ, ə̈bə̈ awopandəma Ndjapä, əɨrɨ ye kə də̂ Agabusə, tô mâ Jude ə nâ gâ tə̂ ä. 11 Tshə zâ ə̂wû tshepa ləba nə̂ Palɔ nə ə î aə̈nü ye də akəna ye ə pâ: «Əpʉ ə̂në Âgbɔ̂ Yîrə̂ ə pa kɔ kə səye: əzü ə̂në tshə sə tə əyïnga ə̂wû tshepa ləba səye, Ajuwufu sə kə i ətshə rə mâ Jeruzalamə, ə sə kə za ətshə gâ lə kəna azü ə̂në əndje sə sə tə Ajuwufu ne kɔ.»

12 Alɔ ə̂në ä djî əpʉ sə rə kɔ, ä-ä də azü əgɔ Sezare nə ä kɨ̂ kə Palɔ nə ndə kə pa tshə na na mâ Jeruzalamə nə ne. 13 Bale, Palɔ nə kîrə əpʉ ə pa: «E sə kə kɨ əkɨ ə sə kə toworo əmə ndə yekɔ? Mbrə ə̂në, əmə, mə sə trö ndə kə pa əndje i əmə, mə tshu ndje mâ Jeruzalamə mbrə əɨrɨ Âgbɔ̂ Əyïngerə Jezu.» 14 Ə̂në ä pâ əpʉ kə ətshə tro gâ ye kɔ, ä kâtə̂ əpʉ nə gâ ye ə pâ: «Âgbɔ̂ Əyïngerə mbrə̈ ərə ə̂në tshelə ye yində nə!»

15 Mandâ aəlo səkɔ, ä gâmba tə̂ ä ə nâ mâ Jeruzalamə. 16 Alabə̈ atrawaya mâ Sezare je gî ä na na ye ə nâ də ä mâ ndə ə̈bə̈ əzü ə̂në əɨrɨ ye kə də̂ Mənasɔ kɔ, tə əzü əgɔ Shiprə, ndə kə pa ä lo mâ je; tshə sə̂ tə trawaya kerə.

17 Alɔ ə̂në ä yî kumu ä mâ Jeruzalamə nə gâ ye kɔ, alaye wə̂ra ä də ə̂rû tə̂ lɔsu əndje. 18 Tshekra, Palɔ nə nâ də ä mâ ndə Zake. Mâ je, aâgbɔ̂ azü Laglizə nɔ̂ ngbô tə̂ əndje gâ tə̂ nə. 19 Palɔ nə blâ əndje â mandânə, tshə vɔ̂tə̂ kə pa ndəma ərə ə̂në Ndjapä mbrə̂ tə̂ äwä kosəra nə̂ ye lə takpa tə̂ azü ə̂në əndje sə̂ sə̂ tə Ajuwufu ne kɔ bale bale kə əndje. 20 Alɔ ə̂në əndje djî əpʉ səkɔ, əndje mbê Ndjapä. Mandânə, əndje pâ kə ətshə ə pa: «Aye, wü, Ajuwufu sake sake sake zâ lɔsu əndje kə Âgbɔ̂ Əyïngerə gâ ye, ə sə də əgo tə̂ lɔsu əndje ndə kə pa əndje bata âgbɔ̂ əpʉ nə̂ Mayïzə. 21 Kandää, azü pâ kə əndje ə pa bə sə kə yisə̂ ərə kə Ajuwufu nɔ̂ ə̂në əndje sə lə takpa tə alabə̈ amarä kɔ ə pa əndje tshi äwä âgbɔ̂ əpʉ nə̂ Mayïzə tʉ. Bə pâ əndje katə̂ kə wa aneshe nə̂ əndje də gandja gâ ye ə tshi äwä mandʉ aərə nə̂ alätä tʉ. 22 Rəkɔ, a sə kə mbrə atâ a? Əndje sə kə wusə̂ nə ngâ ə pa bə nâ gâ ye. 23 Rəkɔ, mbrə̈ ərə ə̂në ä sə kə yisə̂ nə kə əbə kɔ. Alabə̈ azü vəna sə̂ lə takpa tə̂ əzə̂ kotəye ə̂në əndje drâ ama əndje gâ ye. 24 Kö əndje, e də aəndje yɔ tshekotə̂ ndə kə pa e sə mvo, pïyi aərə nə lə kumu əndje ndə kə pa əndje lʉ sukumu əndje. Rəkɔ, azü nɔ̂ sə kə wusə̂ nə ə pa əpʉ ə̂në azü pâ gâ lə kumu zə kɔ, sə sə tə djatra əpʉ ne. Bale, əndje sə kə wusə̂ nə ndje ə pa əbə ndje, bə sə kə bata âgbɔ̂ əpʉ nə̂ Mayïzə nə. 25 Ənə̂ azü ə̂në əndje sə sə tə Ajuwufu ne kɔ ə zâ lɔsu əndje kə Âgbɔ̂ Əyïngerə gâ ye kɔ, ä-ä, ä wû tə ə̂rɔ̂nə â tâ fraka kə əndje ətshinə gâ ye ə pa: əndje zɨ̈ zɨ̈ dɔ̂ngɔ̂ ə̂në əndje tô də əkrɔ kə aamba andjapä kɔ ne; əndje zɨ̈ zɨ̈ ə̈ndjï ne; əndje zɨ̈ zɨ̈ aagia ə̂në ə̂kû têgbɔ angrɔ əndje ə têgbɔ â əndje tshû kɔ ne; e kpë äwä əpʉ ə̂trû!»

26 Tshekra, Palɔ nə kô akoshe vəna səkɔ, əndje də aəndje yɔ̂ tshekotə̂ əndje ndə kə pa əndje sə mvo. Mandânə, tshə lî gâ lə Anda Ndjapä ndə kə pa tshə yisə̂ əlo kə to əkrɔ mbrə əzü bale bale, alɔ ə̂në əlo kə sə əndje mvo nə nglɔ.

27 Alɔ ə̂në aəlo mindû amanə bishi nə ndô trö ndə kə nglɔ nə gâ ye kɔ, Ajuwufu əgɔ ashɔ Azi wû Palɔ lə Anda Ndjapä nə, əndje mbrə̂ ə̂kpû azü nə ndə ye ə zâ ətshə. 28 Əndje tâ râwâ ə pa: «Azü əgɔ Isərayalə, e kpë ndə ä! Koshe sə̂ ə̂në tshə yisə̂ əpʉ tə̂ aətshe nɔ̂ kə azü nɔ̂ ndə kə pa tshelə əndje wəra tə̂ əndje tə̂ azü əgɔ Isərayalə, tə̂ âgbɔ̂ əpʉ nə̂ Mayïzə, tə̂ Anda Ndjapä kɔ kə səye. Tshə kô ndje Agrakə ə lî də əndje gâ lə Anda Ndjapä nə ə ndɨ̂ ətshe səye ə̂në ə sə kpî kɔ gâ ye.» 29 Mbrə ə̂në, ətshinə, əndje wû Trɔfimə nə̂ əgɔ Efazə də Palɔ nə lə gala nə ə wû ənə̂ əndje ə pa Palɔ nə zâ ətshə ə lî də ətshə gâ lə Anda Ndjapä nə gâ ye.

30 Əpʉ âfɔ lə gala nə nɔ̂ â azü nɔ̂ âfɔ tə̂ aətshe bale bale ə kpê na nə. Əndje têgbɔ Palɔ nə ə gbə̂tɔ ətshə lə Anda Ndjapä nə gashu ə tshû amanda nə katshä gâ tə̂ nə. 31 Əndje sə̂ kə pra äwä ndə kə pa əndje wo Palɔ nə, bale, komandâ nə̂ atrugu əgɔ Rɔmə djî ə pa əpʉ âfɔ lə gala Jeruzalamə nɔ̂. 32 Tshə kô atrugu də alabə̈ aâgbɔ̂ azü nə̂ atrugu nə katshä â əndje kpê ärɔ̈ na nə gâ tə̂ azü nə. Alɔ ə̂në azü nə wû komandâ nə̂ atrugu nə də atrugu nə kɔ, əndje kâtə̂ kə da Palɔ nə gâ ye. 33 Bale, komandâ nə̂ atrugu nə nâ trö ə têgbɔ ətshə ə zâ ama ə pa əndje i ətshə də aə̂wû kowɔ bishi. Mandânə, tshə yû ətshe ə pa: «Əde kə sə̂? Yekɔ də̂ tshə mbrə̂?» 34 Bale, lə ə̂kpû azü nə, alabə̈ əndje sə̂ kə ta râwâ də ə̈bə̈ əpʉ kpî â ə̂dû əndje sə̂ ndje kə ta râwâ də ə̈bə̈ ata əpʉ kpî. Rəkɔ, komandâ nə̂ atrugu nə lî lî ndə kə pa tshə wusə̂ ə̈bə̈ djatra əpʉ bale ne, bale tshə zâ ama ə pa əndje gu də Palɔ nə mâ lə kɔpiɔ nə̂ atrugu. 35 Alɔ ə̂në Palɔ nə wûtu gâ ə̂sə̂ ana nə ə̂në ə sə mata mbradja kɔ, atrugu nə wû sɨ̂ɨ̂ ə zâ ətshə ə zâ gâ lafɔ mbrə ə̂në ə̂kpû azü nə yîndə kə da ətshə ə da. 36 Mbrə ə̂në azü nə nɔ̂ zâ äwä ye ə sə̂ kə ta râwâ ə pa: «E wö ətshə!»

37 Alɔ ə̂në əndje sə̂ kə li də Palɔ nə gâ lə kɔpiɔ nə̂ atrugu nə, tshə pâ kə komandâ nə̂ atrugu nə ə pa: «Äwä ndə kə pa mə pa ə̈bə̈ əpʉ kə əbə sə je a?» Komandâ nə yû ətshə ə pa: «Bə wusə̂ kə pa ama grakə a? 38 Bale, bə sə sə tə əzü əgɔ Ejipətə sə̂ ə̂në lə aəlo sə̂ ə rô kɔ, tshə frɔ̂ azü, əndje âfɔ də awlra â kô alayïkowɔ sake vəna (4 000) ə rô də əndje gâ lə ngbûndû kɔ ne a?» 39 Palɔ nə pâ əpʉ ə pa: «Əmə, mə sə tə Juwufu, əndje zû əmə mâ Tarsə, lə ashɔ əgɔ Silisi, əgblə əgɔ ə̂në ə sə tə âgbɔ̂ gala kɔ. Mə tegbɔ ə̈nü zə, zä äwä kə əmə, ndə kə pa mə pa əpʉ kə azü nə.»

40 Bale, komandâ nə̂ atrugu nə zâ äwä kə ətshə. Palɔ nə kâ gâ lafɔ pâ mbradja nə ə mâ kəna ye kə azü nə. Azü nə nɔ̂ sə̂ ngboo â ətshe nə sə̂ kokoko. Bale, tshə pâ əpʉ kə əndje də ama ebrʉ ə pa: