1 Əlo mindû mandânə, âgbɔ̂ awotokrɔ nə, Ananiasə, yî kumu ye mâ Sezare də alabə̈ aâgbɔ̂ azü gâ ndə ə̈bə̈ əyïkɔkɔ̂ ə̂në əndje ê ətshə ə pa Tertulusə kɔ. Əndje nâ də əpʉ nə̂ Palɔ nə gâ ətshi Felikəsə, komandâ əgɔ nə. 2 Əndje ê Palɔ nə â Tertulusə nə vɔ̂tə̂ kə lea ətshə ə pâ: «Əgerə əzü, Felikəsə, mbrə əbə, ä sə lə blatshe tshegege, â azü nɔ̂ lə əgɔ nə sə tə ə̂rɔ̂nə mbrə tafa kə gamba əgɔ ə̂në bə nâ də nə kɔ. 3 Alɔnɔ̂, tə̂ aətshe nɔ̂, ä sə kə sɔtə̂ aə̂rɔ̂ aərə nɔ̂ â ä sə kə za mərshe kə əbə də lɔsu ä nɔ̂. 4 Bale, mə yi yində ndə kə pa mə toworo əbə ʉrrr ne. Mə tegbɔ ə̈nü zə ndə kə pa bə dji əpʉ nə̂ ä teashe gâ ye kane lə ə̂rɔ̂tə̂ zə. 5 Ä wû ə pa koshe səye sə tə ə̈bə̈ əmbrʉ rəka, ə̂në tshə nâ də kəpʉ lə takpa tə̂ Ajuwufu nɔ̂ pâ ashɔ kɔ. Tshə sə gâ tə̂ kumu əmbrʉ aangbɔ nə̂ azü tshe Nazaratə. 6 Tshə trâ ndje ndə kə pa tshə ndɨ əndʉ Anda Ndjapä â ä têgbɔ ətshə kɔ. [Ä yî kəmə ndə kə pa ä wa ngbanga gâ lə kumu ye Lïndə̂ âgbɔ̂ əpʉ nə̂ ä, 7 bale, Liziasə, komandâ nə̂ atrugu nâ ə zâ ətshə lə kəna ä də awlra, 8 ə zâ ama ə pa aawolea ətshə na də əpʉ nə gâ ətshi zə.]* Bə â yu ətshə də ə̂tə̂ zə, bə sə kə dji əpʉ sə̂ nɔ̂ ə̂në ä lêa ətshə tə̂ nə kɔ.» 9 Ajuwufu nə yîndə əpʉ səkɔ kə ətshə ə pâ əpʉ nə sə rə.

10 Bale, komandâ nə mâ kəna ye kə Palɔ nə ndə kə pa tshə pa əpʉ â Palɔ nə pâ əpʉ ə pa: «Mə wusə̂ nə ə pa bə sə tə awopa ngbanga nə̂ azü əgɔ səye lə ə̂ngû ngbatshe. Ə sə rə də̂ mə za lɔsu əmə nɔ̂ gâ pâ zə ndə kə pa mə pa əpʉ gâ pâ əpʉ ə̂në əndje lêa əmə tə̂ nə kɔ. 11 Ə mâ mâ əlo morofo amanə bishi kpəsəye ne, bə â yu azü, bə dji je, mə nâ mâ Jeruzalamə ndə kə pa mə vrɔ Ndjapä. 12 Ə̈bə̈ əzü wû əmə wû lə Anda Ndjapä wala lə aanda aangbɔ, wala lə gala, ä də ə̈bə̈ əzü sə kə pa ashera, wala mə sə kə mbrə ə̂kpû azü gâ lafɔ də ə̈bə̈ əpʉ ne. 13 Bale, kpəsəye, azü səye lï lï ndə kə pa əndje yisə̂ nə gashu orâ âdâ əpʉ sə̂ ə̂në əndje lêa əmə tə̂ nə kɔ ne. 14 Bale, mə pa orâ gashu lə ala zə: mə sə kə vrɔ Ndjapä nə̂ alätä əmə Lïndə̂ äwä Âgbɔ̂ Əyïngerə, ə̂në əndje pa ə sə sə də äwänə ne kɔ. Mə yində əpʉ aərə nɔ̂ ə̂në əndje tâ gâ lə âgbɔ̂ əpʉ nə̂ Mayïzə də fraka nə̂ aawopandəma Ndjapä kɔ. 15 Bale, mə za lɔsu əmə gâ pâ əpʉ nə ə pa, tə̂ äwä Ndjapä, aə̂rɔ̂ azü də aəmbrʉ azü ə she je; əndje nɔ̂, əndje wusə̂ nə lə əndje rə. 16 Âdârə ə̂në, əmə ndje, mə sə kə mbrə alɔnɔ̂ ndə kə pa kə mbrə tə̂ əmə sə də äwänə lə ala Ndjapä, ndje lə ala azü kɔ kə sə̂.

17 «Ə mâ ə̂ngû ngbatshe, mə sə̂ sə̂ lə Jeruzalamə ne, bale, mə nâ ndə kə pa mə ko aərə kə azü əgɔ nə̂ əmə ə to əkrɔ ndje kə Ndjapä. 18 Ərə ə̂në mə sə kə mbrə nə ə̂në əndje sɔ̂tə̂ əmə lə Anda Ndjapä kɔ kə sə̂. Bale, mandâ kə yɔ tshekotə̂ əmə ndə kə pa mə sə mvo, əndje sɔ̂tə̂ əmə lə Anda Ndjapä, ə̂kpû azü sə̂ sə̂ gâ ngotə̂ əmə wala əndje âfɔ â də ə̈bə̈ əpʉ ndje bale ne. 19 Bale, alabə̈ Ajuwufu ashɔ Azi sə̂ je. Əndje kəmə kə lï ndə kə pa əndje na gâ ətshi zə ə lea əmə, kədə ə̈bə̈ əpʉ â sə kəmə je lə kumu əmə. 20 Wala, azü səye ə̂në əndje lə ye, əndje yisə̂ âdâ əpʉ ə̂në ə sə lə kumu əmə kɔ alɔ ə̂në mə kâ gâ ətshi aangbɔ ngbanga nə̂ Ajuwufu nə kɔ. 21 Kʉtə̂ əpʉ ə̂në mə tâ râwâ də nə lə takpa tə̂ əndje ə pa: "Mbrə əpʉ kə she akuzu də̂ kpəsəye, əndje nâ də əmə gâ ətshi e də ngbanga kɔ!" Mbrə nə də̂ əndje nâ də əmə gâ ətshi zə kɔ.»

22 Bale, Felikəsə nə ə̂në tshə wûsə̂ əpʉ tə ə̂rɔ̂nə gâ pâ äwä Âgbɔ̂ Əyïngerə gâ ye kɔ, tshə gî əpʉ nə gâ tə̂ ə̈bə̈ alɔ ə pâ: «Alɔ ə̂në komandâ nə̂ atrugu, Liziasə, â na gâ ye, mə wu əpʉ nə̂ e je.» 23 Bale, tshə zâ ama kə kapita nə̂ atrugu nə ndə kə pa tshə bata Palɔ nə gâ lə anda kânga ə katə̂ ye tə ambanə, ə gbɔ tə̂ äwä gbɔ tə̂ agbɔbəngâ nə ndə kə pa əndje na ə mbrə ə̂rɔ̂nə kə ətshə ne.

24 Ə mâ əlo teashe mandânə, Felikəsə nə gâ ndə əwɔ nə də Drusilə ə̂në tshə sə̂ tə Juwufu kɔ nâ. Felikəsə nə wlâ ətshe ə pa əndje na də Palɔ nə â tshə djî əpʉ nə̂ ye gâ pâ əpʉ kə za lɔsu gâ pâ Jezu Kristə nə. 25 Bale, ə̂në Palɔ nə sə̂ kə pa əpʉ gâ pâ kə mbrə ərə də äwänə, gâ pâ kə ru tshelə, gâ pâ əpʉ ngbanga nə̂ Ndjapä ə̂në ə wutu je kɔ, awa mbrə̂ Felikəsə nə â tshə pâ kə Palɔ nə ə pa: «Ə̂në a lə ye, bə gu na ye ambanə. Alɔ ə̂në mə â sə kpirə̂ gâ ye, mə e əbə kwatə̂mə je.» 26 Tshə kâ ənə̂ ye ndje ə pa də Palɔ nə ə ko ngendja kə əne je. Âdârə ə̂në tshə wlâ ətshe ndə ye alɔnɔ̂ ndə kə pa əndje də ətshə pa əpʉ kɔ kə sə̂.

27 Ə̂ngû bishi rô kʉ rə â Pɔrsiusə Festusə sə̂ tə komandâ gâ mandâ Felikəsə nə. Ə̂në Felikəsə nə yîndə kə pa Ajuwufu nə wu əne tə ə̂rɔ̂nə lə ala əndje kɔ, tshə kâtə̂ Palɔ nə tʉ lə anda kânga nə.