Azü-awla 25

Palɔ gâ ətshi komandâ Festusə

1 Əlo vəta mandânə ə̂në Festusə yî kumu ye gâ lə əgɔ nə gâ ye kɔ, tshə âfɔ mâ Sezare ə nâ mâ Jeruzalamə. 2 Aâgbɔ̂ azü nə̂ aawotokrɔ gâ ndə əgbro azü nə̂ Ajuwufu nə nâ də əpʉ nə̂ Palɔ nə gâ ətshi ye. Əndje yû ətshə rô pâ nə 3 ə pa tshə ma ə̂rɔ̂tə̂ ye kə alane ə na də Palɔ nə mâ Jeruzalamə. Mbrə ə̂në əndje lê ə̂kû ndə kə pa əndje wo Palɔ nə lə äwä. 4 Festusə nə kîrə əpʉ ə pa Palɔ nə sə̂ lə anda kânga mâ Sezare â əne də ə̂tə̂ əne, əne sə kə do tə̂ əne ə do katshä katshä səye gu na ye. 5 Tshə pâ kwatə̂ye ə pa: «Alabə̈ e ə̂në əndje lî gâ ye kɔ, əndje tê gâ ndə əmə, ä də aəndje gu mâ Sezare je, kədə ə̈bə̈ əmbrʉ əpʉ kə sə lə kumu koshe səkɔ, əndje yisə̂ əpʉ nə gâ ətshi əmə.»

6 Festusə nə mâ kʉtə̂ əlo mindû amanə vəta wala morofo mâ Jeruzalamə nə ə dô tə̂ ye â gû mâ Sezare je. Tshekra, tshə sə̂ gâ tʉ gâ lə anda ngbanga ə zâ ama ə pa əndje na ə za Palɔ nə ə gu də ətshə. 7 Alɔ ə̂në Palɔ nə yî kumu ye gâ ye kɔ, Ajuwufu nə ə̂në əndje tô mâ Jeruzalamə nə ə nâ kɔ, əndje kpê dji ətshə ə vɔ̂tə̂ kə lea ətshə tə̂ aâgbɔ̂ aəpʉ ə̂në ə ngba ə ngba kɔ. Əndje lî lî ndə kə pa əndje yisə̂ ə̈bə̈ ərə ə̂në ə yîsə̂ nə ə pa aəpʉ nə sə tə djatra əpʉ kɔ ne. 8 Bale, Palɔ nə shêra aəpʉ səkɔ ə pâ: «Mə mbə̂ mbrə̂ ə̈bə̈ əmbrʉ ərə bale ə̂në ə wəra tə̂ ye tə̂ âgbɔ̂ əpʉ nə̂ Ajuwufu, wala tə̂ Anda Ndjapä wala tə̂ Sezarə kɔ ne.» 9 Bale, Festusə nə yîndə kə pa tshə za ə̂rû gâ tə̂ lɔsu Ajuwufu nə; rəkɔ, tshə kîrə əpʉ kə Palɔ nə ə pâ: «Bə yində kə pa bə na mâ Jeruzalamə əndje wa tshelə əpʉ nə̂ zə nə ətshi əmə a?» 10 Bale, Palɔ nə pâ: «Mə ka gâ ətshi ngbanga nə̂ Sezarə, əndje wa ngbanga gâ lə kumu əmə kotəye. Mə mâ mâ ə̈bə̈ əmbrʉ ərə bale kə Ajuwufu ne, mata ə̂në əbə də ə̂tə̂ zə, bə wûsə̂ nə ngâ gâ ye kɔ. 11 Kədə mə â mâ əmbrʉ ərə kə ə̈bə̈ əzü gâ ye, wala kədə mə â mbrə̂ ə̈bə̈ ərə ə̂në ə lï də kuzu gâ ye kɔ, mə wəra tə̂ əmə wəra ndə kə pa mə tshu ne. Bale, kədə ə̈bə̈ djatra əpʉ bale kə sə sə lə aəpʉ sə̂ ə̂në əndje lêa əmə tə̂ nə kɔ ne, ə̈bə̈ əzü bale lï lï ndə kə pa tshə za əmə gâ lə kəna əndje ne. Mə yində kə wu Sezarə də əpʉ səye.» 12 Bale ə̂në Festusə nə də azü tshe ngotə̂ ye têgbɔ kumu əndje gâ ye kɔ, tshə kîrə əpʉ kə Palɔ nə ə pa: «Bə pâ bə yində kə wu Sezarə də əpʉ səye gâ ye kɔ, rəkɔ, bə sə kə na gâ ətshi ye.»

Palɔ gâ ətshi əyïngerə Agripa

13 Ə mâ aəlo teashe mandânə, əyïngerə Agripa gâ ndə kobɔ nə də Berenisə yî kumu əndje mâ Sezare ndə kə pa əndje wu Festusə nə. 14 Ə̂në əndje mâ əlo mâ je ə lô ngbatshe kɔ, Festusə nə yîsə̂ əpʉ nə̂ Palɔ nə kə əyïngerə nə ə pâ: «Felikəsə tshî ə̈bə̈ əzü tʉ lə kânga 15 ə̂në aâgbɔ̂ azü nə̂ aawotokrɔ gâ ndə aâgbɔ̂ azü nə̂ Ajuwufu nâ də əpʉ nə̂ ye gâ ətshi əmə ndə kə pa mə wa ngbanga gâ lə kumu ye, alɔ ə̂në mə nâ mâ Jeruzalamə kɔ. 16 Mə pâ kə əndje ə pa mandʉ ərə nə̂ azü əgɔ Rɔmə sə sə ndə kə pa əndje za əzü ə̂në əndje lêa ətshə kɔ gâ lə kəna alayïngbanga ətshinə gâ ye kanika ə she ətshə də aawolea ətshə nə gâ tə̂ nə ka ə dji ətshə gâ pâ əpʉ nə ne. 17 Bale, ə̂në ä də aəndje yî kumu ä kotəye kɔ, mə kâ kâ ə kâ ʉrrr ne. Tshekra trale, mə sə̂ gâ tʉ gâ ə̂sə̂ ngbanga ə zâ ama ə pa əndje na də koshe səkɔ. 18 Aawolea ətshə nə nâ, bale, əndje yî yîsə̂ ə̈bə̈ əpʉ ə̂në ə sə tə əmbrʉ nə kɔ ə̂në mə pa də ə sə lə kumu ye kɔ bale ne. 19 Əndje də aəndje pâ ashera kʉ gâ pâ əpʉ kə vrɔ Ndjapä nə̂ əndje, ndje gâ pâ ə̈bə̈ əzü ə̂në əndje ê ətshə ə pa Jezu ə̂në tshə tshû gâ ye kɔ â Palɔ nə pâ tshə sə tə sorô kɔ. 20 Ənə̂ əmə, mə wû âdâ kumu əmə wû də kə wa tshelə marä tə̂ əpʉ rəke ne. Âdârə ə̂në mə yû Palɔ nə ə pa kədə tshə â yində nə, tshə na mâ Jeruzalamə ndə kə pa əndje wa ngbanga ye gâ pâ əpʉ səkɔ. 21 Bale, Palɔ nə pâ əne yində kə na gâ ətshi Sezarə də əpʉ nə, ndə kə pa Sezarə nə kanika ə wa tshelə ngbanga nə̂ əne nə. Rəkɔ, mə zâ ama ə pa əndje bata ətshə mâ lə anda kânga ʉrrr gâ tə̂ alɔ ə̂në mə sə kə wla ətshə kə Sezarə nə.» 22 Bale, Agripa nə pâ kə Festusə nə ə pa: «Əmə ndje, mə yində kə dji əpʉ nə̂ koshe səkɔ.» Festusə nə kîrə əpʉ ə pa: «Əmbʉ, bə dji ətshə je.»

23 Rəkɔ, tshe nə krâ, Agripa nə gâ ndə Berenisə nə nâ tə əgbro azü əgɔ ə lî gâ lə anda ngbanga nə də akomandâ nə̂ atrugu nə gâ ndə əgbro azü tshelə gala nə mandâ əndje. Festusə nə zâ ama â əndje nâ də Palɔ nə. 24 Bale, Festusə nə pâ əpʉ ə pa: «Əyïngerə Agripa, də e-e nɔ̂ ə̂në e sə je gâ ndə ä kotə̂ye kɔ, e wü koshe səye ə̂në gâ pâ əpʉ nə̂ ye, ə̂kpû Ajuwufu nɔ̂ mâ Jeruzalamə, kotəye ndje, nâ gâ tə̂ əmə ə pâ tshə lï lï ndə kə pa tshə daka pə tə sorô ne kɔ. 25 Ənə̂ əmə, mə wûsə̂ nə ə pa tshə mâ mâ ə̈bə̈ ərə bale ə̂në ə lï də kuzu kɔ ne. Bale, ətshə də ə̂tə̂ ye, tshə yîndə kə na gâ ətshi âgbɔ̂ əyïngerə əgɔ Rɔmə, mə wû tə ə̂rɔ̂nə ndə kə pa mə wla ətshə kə ətshə. 26 Mə sə sə də ə̈bə̈ əpʉ bale ə̂në mə ta kʉtə̂ nə ngâ gâ lə fraka kə âgbɔ̂ əyïngerə nə gâ pâ əpʉ nə̂ ye nə ne. Âdârə ə̂në mə ê ətshə gâ ətshi e, ə rô nɔ̂ gâ ətshi zə, əyïngerə Agripa, ndə kə pa a yu ətshə kanika mə sɔtə̂ ə̈bə̈ əpʉ ə̂në mə ta gâ lə fraka nə je kɔ. 27 Mbrə ə̂në, ə sə tə ərə nə̂ aəndɨ ndə kə pa mə wla əyïkânga mâ Rɔmə ə yisə̂ âdâ əpʉ ə̂në ə sə lə kumu ye kɔ yi ne.»